Intembauzyo 40
40
Lwiimbo lwa Devedi. Kumweendelezi wanyimbo
1Amoyo omwe ndakalilila Mwami Leza, mukulila kwangu wakandiceba akundivuwa.
2Mudindi bbyaabi mwaakandigwisya,
oomo mwakali matope antimba, wakandiimika aamwaala,
busena bubambasede mbwaakandipa kuti njimine mpawo.
3Wakandiiisya lwiimbo lupya, lwakutembauzya Leza wesu.
Banji baakubona oobo bayooyoowa, Bayoosyoma mu Mwami Leza.
4Muntu uusyoma mu Mwami Leza nguulelekedwe,
tacebukili kuli basikuupaupa ameso, aabo baleya akutobela mituni.
5Nzinji kapati zigambya nzyookacita,
O Mwami Leza wesu, eezyo nzyookayanda kutucitila,
nsikonzyi kuzyaamba nikuba kuzikanana, nkaambo nzinji tazibaliki.
6Zipaizyo azituuzyo toziyandi pe,
pele wandipa matwi aakuti nkeswiilila,
zipaizyo zyakutenta niziba zituuzyo zyakukombelezezya zinyonyoono toziyandi.
7Lino ndakati, “Bona, ndime aano, ndaboola, mubbuku kulembedwe zyandime.”
8Nzyoyanda, O Mwami Leza, nzyeticite, mumoyo wangu muuli mulawo wako.
9Mumbungano mpati mweambilizya zyabululami bwako,
nsiumuni buyo pe, ayebo ulizi O Mwami Leza.
10Nsisisi zyabululami bwako mumoyo wangu pe,
zyalufutuko ndopa azyakusyomeka kwako nzyekanana,
nsezisisi zyaluyando lwako lutazungaani,
kumbungano mpati nsisisi zyakasimpe kako.
11O Mwami Leza, utakaki kundeengelela,
luyando lutazungaani akasimpe kako, eezi zindikwabilile.
Kulomba lugwasyo
(Intembauzyo 70)
12Alindizingulukide mapenzi aatabaliki, zyandizunda zinyonyoono zyangu,
ameso oomfokela, zinyonyoono zyangu nzinji kwiinda masusu ngejisi, moyo wangu wawizuka.
13Fwambaana kundivuna, O Mwami Leza, fwambaana kundigwasya.
14Banyonyweede limwi, bausigwe nsoni aabo bayanda kundijaya,
boonse aabo bayanda kundinyonyoona basinganyizigwe, abagunwe, bapiluke.
15Boonse basekelela kabati, “Ee buya! Ee buya!”
Balijazye nsoni beni akubijilwa.
16Aabo bakuyandisya basekelele akukondwa muli nduwe,
aabo bayanda lufutuko lwako lyoonse baambe kuti,
“Mwami Leza ngusinguzu ncobeni.”
17Mebo ndemucete uubulide, O Mwami ndiyeeyele bumwi, muvuni amugwasyi
wangu nduwe, utamuki pe, akaka, Leza wangu.
Currently Selected:
Intembauzyo 40: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
