Intembauzyo 147
147
Amumutembaule Mwami Leza
1Amumutembaule Mwami Leza, ncibotu kwiimbila Leza wesu,
cilabotezya alimwi cileelela kumutembaula.
2Mwami Leza ulayaka Jelusalemu, nguutiyobolole Baisilayeli bakali mubwaange.
3Batyompedwe ulabayumya, ulaanga zilonda zyabo.
4Mweelwe wanyenyenzi uluuzi, ulaziita zyoonse amazina aazyo.
5Mwami wesu mmupati, ulijisi nguzu zinji, luzibo lwakwe talukwe masimpilo.
6Mwami Leza nguusumpula babombe myoyo, pele basizibi ubabbuntila ansi.
7Amumulumbe Mwami Leza akumwiimbila, amumutembaule Leza wesu akantimbwa.
8Mwami Leza nguuvumbilila julu amakumbi, nguuwisya mvula anyika,
nguumeneka bwizu atulundu.
9Banyama nguubaabila zilyo zyabo, ulaabila abana babacikwangala nobalila.
10Tabotelwi munguzu zyabbiza, tabotelwi munguzu zyamuntu.
11Bamubotela Mwami Leza mbabaabo bamulemeka, aabo bajisi lulangilo
muluyando lwakwe lutamani.
12Mulumbaizye Mwami Leza, O Jelusalemu, O Ziyoni, tembaula Leza wako.
13Walo nguwayumya mingwala yamilyango yako, walo nguuleleka bantu bali mukati kako.
14Wakupa luumuno muminyinza yako, nguukukkutya abusu bunante bwamaila.
15Wapa mulawo wakwe ansi, majwi aakwe alafwambaana kumvwigwa.
16Nguukwapamika caanda mbuli boya bwambelele, nguumwaya sikunku mbuli twe.
17Nguuwisya civulamabwe ansi. Nguni uukonzya kuyumina kutontola kwaco?
18Walailila buyo civulamabwe cileenzemuka, lwaunga luuwo lwakwe maanzi alakunka.
19wakayubununa majwi aakwe kuli Jakobo, wayubununa milawo amalailile aakwe kuli Isilayeli.
20Taakwe cisi cimbi ncaakacitila boobo pe, milawo yakwe tabiizi.
Currently Selected:
Intembauzyo 147: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
