Tusimpi 31
31
Majwi aakulaya Lemuweli
1Ngaaya majwi mwami Lemuweli, ngaakaambilwa abanyina.
2“Yebo omwanaangu, yebo omwanaangu ngwindakazyala. Yebo omwanaangu wazikonkezyo,
3nguzu zyako zitamanini kubakaintu. Nikuba kuli baabo banyonyoona bami.
4Tacili cibotu kubami, yebo Lemuweli, tacili cibotu kubami kunywa waini, kubaleli kunywa zikola.
5Ambweni inga caba kuti mbabonya balube eeco ncobakalailila,
akutabeteka kabotu makani aabantu bapengede.
6Zikola azipegwe bayanda kuloba, waini kuli baabo bapengede kapati.
7Bapegwe banywe balube bucete bwabo kuti kabataciyeeyi limbi makatazyo aabo.
8“Baambilile aabo batakonzyi kulikananina,
beteka kabotu makani aabaabo babulide lugwasyo.
9Ubakananine akubeteka cakutasalulula. Endelezya kabotu zyeelelo zyabacete abapengede.”
Zyamukaintu uuli kabotu
10Nguni uukonzya kujana mukaintu uuli kabotu?
Uuyandika kapati kwiinda tubwe tweebesi tudula.
11Mulumi wakwe ulamusyoma, takabuli mpindu pe.
12Ulamucitila kabotu, tamubisizyi mumazuba oonse aabuumi bwakwe.
13Ulayandaula boya bwambelele abutonje,
ulabeleka amaanza aakwe cabunkutwe.
14Uli mbuli mato aabasambazi,
ulacela zyakulya zyakwe kuzwa kulaale.
15Ulabuka busiku kabucili kooko,
ulabambila mukwasyi wakwe zyakulya,
ulapa milimo kubasimbi bakwe babelesi.
16Ulayeeya zyamuunda akuuula,
ulasyanga muunda wansaansa kwiindila mucizyole camaanza aakwe.
17Ulalibambila kubeleka canguzu,
maboko aakwe alazuunyana mumilimo yakwe.
18Ulabona kuti nzyasambala zilamuletela mpindu,
lambe lyakwe masiku talizimi.
19Maanza aakwe alajata cakulusya,
maanza aakwe alajata cakupesya.
20Ulapa amaanza obilo kubacete ulatambika amaanza aakwe kulibabulide.
21Nokuli caanda mupeyo, kunyina
cimuyoosya abaŋanda yakwe,
nkaambo boonse basama zikasaala, zisalala.
22Ulaluka zyakuyala zivumba bulo,
ulisamide ndeketela iini-ini yacisombo.
23Mulumi wakwe ulalemekwa kumanjililo mapati aamunzi,
ooko nkwakkala cabulemu akati kabapati bamunzi.
24Ulaluka zisani zyandeketela nzyauzya,
nguuuzizya basimakwebo ntambo.
25Ngusinguzu alimwi ulalemekwa,
taakwe ciciboola kumbele ncayoowa.
26Ulakanana camaanu kwiisya kwakusyomeka nkokuzwa mumulomo wakwe.
27Nguubona zyabaŋanda yakwe tali syandyaabantu.
28Bana bakwe bamwiita kuti oolelekedwe,
mbubonya amulumaakwe alimwi ulamulumbaizya.
29Bakaintu banji bacita zilemekezya, pele ulabainda boonse.
30Zilisakatizyo zilacenga, bubotu bulamana,
pele mukaintu uulemeka Leza uleelede kulumbaizigwa.
31Amumupe bulumbu bumweelede milimo yakwe iimulemekezye kumanjililo mapati aamunzi.
Currently Selected:
Tusimpi 31: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
