Tusimpi 30
30
Majwi aa Aguu
1Ngaaya majwi aa Aguu mwanaa Jake waku Masa, makani ngaakaambilwa.
Mwaalumi ooyu wakaambilizya kuti, “Leza tali aandime, Leza tali aandime ndanetuka.
2Kasimpe ndili mufuba-fuba, nsikwe maanu aabuntu.
3Tiindakaiisya zyabusongo, nsijisi luzibo lwa Usalala.
4Nguni wakatanta kujulu akuseluka ansi?
Nguni wakajata luuwo mumaanza aakwe?
Nguni wakaputaila maanzi mucibaki cakwe?
Nguni wakaimika masimpilo aanyika oonse?
Nguni zina lyakwe, alimwi zina lyamwanaakwe nguni?
Ndaambile naa ulizi!
5“Majwi aa Leza oonse ngabwini, nentobo yabaabo boonse batijila kulinguwe. 6Utayungizyi kumajwi aakwe, ulaba nakulailila, eelyo ulaboneka mubeji.”
Tusimpi tumwi
7Kuli zintu zyobilo nzekumbila kulinduwe, O Mwami Leza, utandiimi nzinzyo nketanafwa. 8Unditantamwide kubejelezya akubeja, utandipi bucete nibuba buvubi, pele kondipa buyo cakulya buzuba-abuzuba. 9Ambweni inga ndajana zinji ndakukaka akwaamba kuti, “Ani Mwami Leza nguni?” Ambweni inga ndaba necetaala, kwamana ndabba akusampuzya zina lya Leza wangu.
10Utabejelezyi mubelesi kuli simalelo wakwe,
inga waba nakusinganya, eelyo uyoocibona.
11Kuli bantu basinganya bamawisi, akutaleleka bamanyina.
12Kuli bantu bamwi balibona lwabo beni kuti balasalala,
nikuba kuti tabanasalazigwa kuzwa kubusofwaazi bwabo.
13Kuli bantu bamwi basikulisumpula, balanga cakulibikka aantu.
14Kuli bantu bamwi bajisi meno aali mbuli mapanga,
meno mbuli mesi, kuti balide bacete anyika.
Bamanizizye babulide akati kabantu.
15Musyundu ulijisi bana basimbi bobilo, Balati, “Kopa! Kopa!”
Kuli zintu zyotatwe zitakkuti, kuli azine zitaambi kuti, “Twalumba!”
16Eezi ncuumbwe, kutazyala kwamukaintu,
nyika iitamvwi maanzi, amulilo uutati, “Ndalumba!”
17Muntu uusampaula wisi, uutalemeki banyina,
bacikwangala beelede kunonkola liso lyakwe
abasikube balye mutumba wakwe.
18Kuli zintu zyotatwe zindikankamanisya mebo,
kwaambisya eezi zyone tandizimvwisyi pe:
19bweende bwasikube mujulu, bweende bwanzoka amwaala,
bweende bwabwato mukati kalwizi abweende bwamwaalumi anakalindu.
20Nzila yamukaintu mwaamu ili boobu:
ulalya akulisansamuna kumulomo akwaamba kuti,
“Taakwe cintu ncindabisya.”
21Kuli zintu zyotatwe zitenkaanya nyika,
kuli zintu zyone nziitakonzyi kwiimina eezi:
22Muzike naba Mwami, mufuba-fuba uulilekela kulya,
23mukaintu uulaabbamba akwatwa,
amusimbi mubelesi uunyanga uumulela mulumi.
24Kuli tuntu tone ansi tuniini,
nikuba boobo tulicenjede kapati.
25Tuuka tatujisi nguzu zinji,
nikuba boobo tulayobola mainza cakulya cato.
26Bacibila ntunyama tutajisi nguzu zinji,
nikuba boobo balayaka maanda aabo mumandomba.
27Cikwikwi tacijisi mwami,
nikuba boobo cileenda antoomwe mumakata-makata.
28Ntombela ulakonzya kujatwa ajanza,
nikuba boobo ulajanwa mumaanda aabami, aabulelo.
29Kuli zintu zyotatwe zigambya mukweenda kwazyo,
kwaambisya zyone zyeenda cakuyoosya,
30syuumbwa singuzu kwiinda banyama boonse uutayoowi munyamanyina.
31Mukombwe mukali, sijembwe, amwami uulaampi yakwe.
32Kuti naa walifubeede akulisumpula,
naa wali kukanza bubi, lijate kumulomo.
33Lino mbuli kusuka mukupa mbokuleta mafuta,
akunyonyoona mpemo mbokugwisya munoka,
mbubonya akuzwangana mbokubusya nkondo.
Currently Selected:
Tusimpi 30: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
