Mukambausi 1

Zintu zyoonse nzyabuyo

1Ngaaya majwi aa Mukambausi mwanaa Devedi mwami mu Jelusalemu.

2Nzyabuyo! Nzyabuyo! mbwaamba Mukambausi. Ncobeni nzyabuyo! Zintu zyoonse nzyabuyo. 3Ino muntu ujana mpindu nzi mumilimo yakwe yoonse njacita ansi aano? 4Mazyalani alaza alimwi alainda, pele nyika ilikkede lyoonse alyoonse. 5Zuba lilazwa akubbila, lilafwambaana kupilukila ooko nkolizwida. 6Luuwo lulaungila kumusanza, akunyonena kunyika, lulazinguluka akupilukila nkoluzwida. 7Milonga yoonse ikunkila mulwizi, nikuba boobo lwizi taluzuli. Milonga ilapilukila nkukonya ooko nkwiitalikila. 8Zintu zyoonse zilakatazya citaambiki. Liso talicimwi kubona, kutwi takucimwi zyakumvwa. 9Cakaliwo ciyoobako alimwi, cakacitika ciyoocitika alimwi. Taakwe nociba comwe ceenzu ansi aano. 10Sena kuli cimwi cintu muntu ncanga wati, “Bona, eeci ncipya?” Cakaliwo kale kaindi-kaindi, cakaliwo kale katutanazyalwa. 11Bantu bakaindi-kaindi tabaciyeeyegwi abalo baciyooboola tabakayeeyegwi abaabo bayooza musule lyabo mbubonya.

Busongo mbwabuyo

12Mebo nde Mukambausi, ndakali mwami mu Isilayeli mumunzi wa Jelusalemu. 13Ndakabikka moyo wangu mukwiiya kuti ndizibisye kwiindila mubusongo zyoonse eezyo zicitwa ansi aano. Ilakatazya milimo eeyo Leza njapede bantu!

14Ndakabona zintu zyoonse zicitwa ansi aano, zyoonse nzyabuyo, cili mbuli kutandaanya luuwo. 15Cintu cipilingene tacikonzyi koololwa, citazulide tacikonzyi kubalilizigwa.

16Ndakayeeya kuti, “Amubone ndakomena ndaba musongo kwiinda boonse aabo bakalela kale mu Jelusalemu nketana mebo. Ndimusongo alimwi ndijisi luzibo lunji.” 17Ndakayandisya kuti ndizibe zyabuyo, abufuba-fuba mbobubede, pele ndakajana kuti acalo eeci cili mbuli kutandaanya luuwo. 18Busongo bunji buletela mause manji, luzibo lunji luletela mapenzi manji.

Currently Selected:

Mukambausi 1: Tonga96

Highlight

Copy