Tusimpi 23
23
-6-
1Ciindi nokkala ansi kuti ulye amuleli, ulangisye eezyo nzyoobikkilwa.
2Lino utaingani na uli sindya.
3Utanyomeneni zilyo zyakwe nzyalweeno.
-7-
4Utalikatazyi kuti ube muvubi, koba musongo akulilesya.
5Lubono walubona buyo lulamana, lulaba amababa,
lulauluka mbuli sikwaze uuya mujulu.
-8-
6Utalyi cilyo camuntu muunyu, utanyomeneni zilyo zyakwe zinono.
7Nkaambo muntu nguyooyo uuyeeya kudula kwazyo. Muntu ulakonzya
kukwaambila kuti, “Kolya, konywa,” Kwamana walo taziyandi.
8Ulaluka tukusu ooto ntoolide, majwi aakulumba ngooambide alaba aabuyo.
-9-
9Utaambauli mufuba-fuba kamvwide, nkaambo ulasampaula majwi aako aabusongo.
-10-
10Utatantamuni munyinza wakale, nikuba kunjila mumyuunda yabamusyaala,
11nkaambo Munununi wabo ngusinguzu, uyoobaambilila kaambo kabo kulinduwe.
-11-
12Bikka moyo wako kumalailile, uteye matwi aako kumajwi aaluzibo.
-12-
13Utaleki kulaya mwana, kuti naa wamuswipaula akasako takoofwa pe.
-13-
14Kuti wamuswipaula akasako ulavuna buumi bwakwe kulufu.
15Mwanaangu kuti kolaabusongo mumoyo wako, ambebo moyo wangu unookondwa.
16Njookondwa mukati mwangu mwini, milomo yako yanooamba zyabusongo.
-14-
17Moyo wako utafwidi basizibi bbivwe, pele lyoonse weelede kusungwaalila kulemeka Mwami Leza.
18Kasimpe uyooba ancolangila kumazuba aaza kumbele, kulangila kwako takukabi kwabuyo.
-15-
19Koswiilila mwanaangu notisongwaale, lyoonse moyo koweenzya munzila iiluzi.
20Utanookkali abantu banywisya waini, naaba akati kabantu balisya nyama,
21nkaambo bakolwi abasindya balaba bacete, alimwi butolo bucita kuti muntu kasama mazapu-zapu.
-16-
22Koswiilila uso ooyo wakakuzyala, alimwi toelede kusampaula banyoko bacembaala.
23Koula kasimpe kwamana utakauzyi, jana busongo, amalailile aakumvwisya zintu.
24Wisi muntu mululami ulabotelwa kapati, ooyo uujisi mwana musongo ulabotelwa mulinguwe.
25Uso abanyoko batangale, ooyo wakakuzyala asekelele.
-17-
26Mwanaangu, kondipa moyo wako, meso aako abe nzila zyangu.
27Nkaambo muvuule uli mbuli cilindi cilamfu, mukaintu njendeenda uli mbuli mukalo uumanikide.
28Ulayubilila mbuli mubbi, ulavuzya kutasyomeka akati kabantu.
-18-
29Nguni uuuside? Nguni uutongooka? Nguni uuli aazyuumo katakwe kaambo? Nguni uuli ameso aasalala pyu?
30Mbaabo bakkala ciindi cilamfu kabanywa waini, aabo bayandaula waini uuvweledwe.
31Atakutumpusyi waini nasalala, ciindi navwalauka munkomeki, ciindi natelemuka kabotu.
32Kumamanino ulaluma mbuli nzoka, ulaancefu mbuli cipile.
33Meso aako alabona zintu nzyotanabwene, moyo wako uyooyeeya zintu zipilingene.
34Ulaba mbuli uulala akati kalwizi, ulaba mbuli uulala ampela yacisamu cabwato.
35Ulati, “Balanduuma, pele tabandicisi, balanduuma,
pele taakwe ncendimvwa! Ino ndabuka lili kuti nkanywe alimwi?”
Currently Selected:
Tusimpi 23: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
