Tusimpi 24
24
-19-
1Bantu basizibi utabafwidi bbivwe, utabasukamini.
2Nkaambo myoyo yabo ilakanza bubi, milomo yabo ilaamba zyakubusya manyongwe.
-20-
3Ŋanda ilayakwa mubusongo, ntalisyo yayo ilabambwa kwiindila mukumvwisya zintu.
4Kwiindila mubusongo twaanda twayo tulazula zintu zidula, ziyandika alimwi zibotu.
-21-
5Muntu musongo ulaa nguzu kapati, alimwi muntu uujisi luzibo, wiinda muntu wanguzu.
6Kwiinda mukulaililwa kubotu ulakonzya kulwana nkondo. Kuti koyanda
nkondo weelede kuba abalailili banji.
-22-
7Busongo ncintu ciyumu kumvwisya kumufuba-fuba, baswaangana mbuli
mbungano kumulyango taakwe ancakonzya kwaamba pe.
-23-
8Ooyo uukanza kucita zibi ulaambwa kuti, ngusilupyopyongano.
9Kukanza zyabufuba-fuba ncinyonyoono, bantu balasesemwa sikasampu-sampu.
-24-
10Kuti watyompwa wajana mapenzi uli muteteete.
-25-
11Bavune aabo batolwa kulufu, bafutule aabo badadalikila kukujaigwa.
12Naa mwaamba kuti, “Taakwe ncotwakazi aceeci,” sena ooyo uulingula
myoyo yabantu tayeeyi? Sena ooyo uubamba buumi bwako tazi?
Sena takabweedezezyi muntu uuli woonse mbuli bweelede milimo yakwe?
-26-
13Mwanaangu, kolya buci, nkaambo mbubotu, mulolo uuzwa kucimbulwe ulalweela walabila.
14Weelede kuziba kuti abwalo busongo bulalweela mumoyo wako,
kuti naa wabujana uyooba ancolangila kumazuba aaza kumbele,
lulangilo lwako talukabi lwabuyo.
-27-
15Utayubilili mbuli sizibi mbwayubilila ŋanda yamululami, utasaali cilawo cakwe,
16nkaambo nikuba kuti muntu uululeme wawa ziindi zili ciloba, ulabuka
alimwi, pele basizibi balawida ansi akaambo kamapenzi.
-28-
17Utabotelwi naa sinkondonyoko wawa, utasekeleli naa walebwa.
18Ambweni inga Mwami Leza wabona eeco yebo ncoocita camubijila,
kwamana walo waleka kusubula sinkondonyoko.
-29-
19Utalipenzyi akaambo kabantu babi, nikuba kubafwida bbivwe basizibi.
20Nkaambo muntu taakwe ncalangila kumazuba aaza kumbele, alimwi lambe lyabasizibi liyoozimwa.
-30-
21Mwanaangu, kolemeka Mwami Leza amwami wacisi, utanooendi abazangi,
22mukuti bobilo bayoobanyonyoona kabatazi, ino nguni uuzi mapenzi ngobakonzya kuleta?
Tusimpi tumwi twabusongo
23Ntootu tusimpi tumwi twabusongo.
Tacili cibotu kusalulula mukubeteka makani.
24Kufumbwa ooyo waamba simulandu kuti, “Yebo unyina mulandu,”
bantu bayoomusinganya, alimwi misyobo yoonse iyoomusampaula.
25Pele aabo basubula balaamilandu,
zintu ziyoobeendela kabotu,
nkabela bayoolelekwa ncobeni.
26Kwiingula kubotu kuli mbuli kumyonta milomo.
27Manizya milimo yako yaanze, kunkula myuunda yako,
wamana oobo, uyake ŋanda yako.
28Utalengeleli mweenzinyoko uutakwe kaambo,
nikuba kubelesya milomo yako kwaamba zyakubeja.
29Utaambi kuti, “Ndiyoomucitila mbubonya awalo mbwaakandicitila.
Ndiyoomubweedezezya akaambo kaceeco ncaakacita.”
30Ndakainda kumuunda wamutolo,
ndakainda kumuunda wansaansa wamuntu uutakwe maanu,
31ndakajana kuti koonse-koonse kwakamenede mamvwa,
muunda woonse wakazwide nsaku,
bwaanda bwamabwe mbwaakayakide bwakaliwide.
32Nindakabona zeezi, ndakaziyeeyesya kapati.
Ndakazilanga, eelyo ndakaiya ciiyo.
33Kocoonoona, kojisi tuŋonzi,
kocili kumbete kuti kocilyookezya,
34abwalo bucete bulakusikila mbuli mubbi,
kubula kulakujana mbuli silumamba.
Currently Selected:
Tusimpi 24: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
