Myeelwe 32
32
Misyobo iili kujwe lya Jolodani
(Ciibalusyo 3.12-22)
1Misyobo ya Lubeni a Gadi yakajisi ŋombe zinji, alimwi yakabona kuti nyika ya Jazee aya Giliyadi yakajisi macelelo mabotu. 2Nkaako bakainka kuli Mozesi a Eliyazaa mupaizi, akubasololi babuleya baakuti, 3“Twabona kuti zisi zya Ataloti, Diboni, Jazee, Nimula, Hesyiboni, Eliyale, Sebamu, Nebo, a Beyoni, 4eezyo Mwami Leza nzyaakazundila Baisilayeli nzibotu kweembelela. Mbuli mbotuli beembezi, 5mutufwide luzyalo mutupe zisi eezi tutalanduki kutala aamulonga wa Jolodani.”
6Mozesi wakaingula Balubeni a Bagadi kuti, “Sena ncibotu kuti beenzinyoko baye kunkondo nywebo kamukkede buyo kuno? 7Nkaambo nzi ncomuyanda kutyompya myoyo ya Baisilayelinyoko kuti batainki kunyika Mwami Leza njabapa? 8Eeci ncencico cakacita bamauso ciindi nindakabatumide kuzwa ku Kadesyibeniya. 9Nibakaakusika kukkuti lya Esyikolo akubona nyika, nibakaboola, bakazootyompya myoyo ya Baisilayelinyina kuti batainki kunyika Mwami Leza njaakabapa. 10Nkaako Mwami Leza wakanyema ciindi eeco, wakakonka akuti, 11‘Akaambo kakuti tiibanditobela amoyo woonse, taakwe muntu wamyaka iili makumi obilo akwiindilila wakazwida mu Ijipiti uuyoonjila munyika eeyo njendakasyomezya kuli Abulahamu, Izaka, a Jakobo, 12kuleka buyo Kelebi mwanaa Jefune Mukenizi, a Josyuwa mwanaa Nuni.’ Balo bakatobela Mwami Leza amoyo woonse. 13Mwami Leza wakabanyemena Baisilayeli, nkabela wakabaingaizya munkanda kwamyaka iili makumi one mane nibakamaninina aabo bakabisizya Mwami Leza. 14Lino sunu kwabuka ndinywe mubusena bwamauso basizibi, nywebo muyanda kwiindilizya bukali bwa Mwami Leza ku Baisilayeli. 15Kuti naa nywebo Nobalubeni a Bagadi mutamutobeli mulacita kuti abaleke bantu alimwi munkanda, kwamana mulanyonyoozya bantu aaba boonse.”
16Balo bakati, “Tusaangune kuyaka zimpati aminzi yabakaintu abana besu. 17Kwamana notutilibambile zyankondo, tulasolweda beenzuma kunkondo kusikila tukabasisye mumasena aabo. Katutana, bakaintu abana besu banooli muminzi iikwabililidwe akaambo kakuyoowa bantu bacisi cino. 18Tatunoobooli kuminzi yesu kusikila Baisilayelima bakatole nyika eeyo njibakapegwa. 19Tatukooyooabilwa nyika mutala limwi lya Jolodani, nkaambo swebo tulijisi kale caabilo cesu cili okuno.”
20Lino Mozesi wakabaingula kuti, “Kuti naa mwacita oobo akuunka kunkondo mukutobela Mwami Leza, 21akumulwanina kutala lyamulonga mane akatande basinkondonyina boonse, 22nyika yoonse yaakuzundwa, muyoopiluka kamwaangunwidwe a Mwami Leza, alimwi a Baisilayelinyoko, aawo eeyi nyika niizooba yanu ncobeni. 23Pele kuti naa mwakaka kucita oobo, mwabisizya Mwami Leza, alimwi muzibe kuti ncobeni-ncobeni zibi zyanu ziyoomupilukila. 24Amuyakile bakaintu abana banu minzi akuyaka zimpati, pele mukacite nzimwakasyomezya.”
25Balubeni a Bagadi bakaamba kuti, “Simalelo wesu, tulacita mbuli mbootulailila. 26Bakaintu, bana besu, ŋombe ambelele zyesu zilasyaala kuno kuminzi ya Giliyadi. 27Swebo tobabelesi bako tulalanduka, umwi aumwi kalibambilide kuya kunkondo kuyoolwanina Mwami Leza mbubonya mbuli mbootwaambila.”
28Lino Mozesi wakapa malailile aaya kuli Eliyazaa mupaizi a Josyuwa mwanaa Nuni akubasololi baziinga zya Baisilayeli. 29Wakati, “Kuti naa Balubeni a Bagadi bakalanduke Jolodani andinywe, akulwanina Mwami Leza alimwi akuzunda, nyika ya Giliyadi iyooba yabo yoonse mbwiibede, ndolukono lwabo. 30Pele kuti naa batakazubuki Jolodani akulwana andinywe, bakapegwe caabilo cabo mu Kenani, mbubonya mbuli ndinywe nyoonse.”
31Bagadi a Balubeni bakaingula kuti, “Zintu zyoonse Mwami Leza nzyaatwaambila tuyoozicita. 32Tulalanduka kuyoolwanina Mwami Leza ku Kenani, pele caabilo cesu cinooli kutala lino lya Jolodani.”
33Aboobo Mozesi wakapa Bagadi a Balubeni acisela camusyobo wa Manase mwanaa Josefa nyika yoonse ya Sihoni mwami wa Baamoli, nyika ya Ogi waku Basyani, kubikkilizya aminzi yoonse iizingulukide. 34Bagadi bakayakulula minzi ya Diboni, Ataloti, Aloyeli, 35Atiloti Syofani, Jazee, Jogibeha. 36Betemimula, a Betehalani, biiyakila bwaanda azimpati mukati. 37Balubeni bakayakulula Hesyiboni, Eliyale, Kiliyataimu 38Nebo, Baalameyoni (zina eeli lyakasandulwa) a Sibuma. Bakapa mazina mapya kuminzi njibakayakulula.
39Lino balunyungu lwa Makii mwanaa Manase bakainka kunyika ya Giliyadi baakwiitola, batanda Baamoli bakali kukkala mumo. 40Aboobo Mozesi wakapa Giliyadi kuli Bamakii, balunyungu lwa Manase, balo bakakkala nkuko. 41Jaili awalo walunyungu lwa Manase wakatola minzi imwi yalo njaakaulika kuti Havotijaili. 42Noba wakatola Kenati aminzi iizungulukide akwiita kuti Noba, kweendelana azina lyakwe.
Currently Selected:
Myeelwe 32: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
