Myeelwe 31
31
Nkondo a Bamidiyani
1Lino Mwami Leza wakaambila Mozesi kuti, 2“Usubule Bamidiyani kaambo kaceeco ncibakacita Baisilayeli, lino waakumana kubasubula uyoofwa.”
3Mpoonya aawo Mozesi wakaambila bantu kuti, “Amulibambilile kulwana nkondo kuti musubule Bamidiyani mubusena bwa Mwami Leza. 4Kuzwa kumusyobo umwi aumwi wa Baisilayeli kuzwe bantu bali cuulu basinkondo.”
5Aboobo musyobo umwi aumwi wakatuma bantu bali cuulu mweelwe wabo wakasika kuzyuulu zili kkumi azibili. 6Nkaako Mozesi wakabatuma kuya kunkondo, aabo bali zyuulu zili kkumi azibili bazwa kumusyobo umwi aumwi, musololi wabo wakali Finihasi mupaizi. Ooyo nguwakatola zibelesyo zyakubusena busalala amyeembo yakulailizya bantu.
7Lino bakalwana Bamidiyani mbubonya mbuli Mwami Leza mbwaakalailila Mozesi, nkabela bakajaya baalumi boonse do. 8Bakajailizya abami baku Midiyani ba: Evi, Lekemu, Zuu, Huu, a Leba alimwi bakajailizya a Balaamu mwanaa Beyo. 9Baisilayeli bakajata bakaintu abana ba Bamidiyani, alimwi bakatola matanga aaŋombe aambelele, alubono lumwi loonse. 10Bakatenta minzi azilawo zyabo zyoonse mobakali kukkala, 11akutola lubono lwabo loonse abantu. 12Bakabaleta kuli Mozesi, Eliyazaa mupaizi, akuli babuleya Baisilayeli. Aabo bakali kuzivuka mumabanda aa Mowabu mutala lyamulonga wa Jolodani kuzwa ku Jeliko.
Kupiluka kwabasilumamba
13Lino Mozesi a Eliyazaa mupaizi abasololi boonse babantu bakazwa muzivuka kuyoocingauzya basinkondo. 14Lino Mozesi wakakalalila basololi babasinkondo, basololela zyuulu amyaanda bakapiluka kuzwa kunkondo. 15Wakababuzya kuti, “Nkaambo nzi ncomwatajailizya abakaintu? 16Tee bakaintu abalo bakatobela kulaya kwa Balaamu, alimwi mbibakacita kuti Baisilayeli bazangile Mwami Leza ku Peyo. Ncicakacita kuti kube cuumo akati kabantu ba Mwami Leza. 17Lino amujaye balombe boonse, bakaintu boonse. 18Pele mutajayi basimbi batazi basankwa mubaleke babe banu. 19Nywebo nyoonse nimwakajaya muntu nikuba kuguma mutumba muleelede kutanjila muzivuka kusikila kwamazuba aali ciloba. Buzuba bwatatu abwaciloba mulisalazye lwanu nobeni abaange banu. 20Musalazye zisani antoomwe azyoonse zyacikutu, boya bwampongo, aboya bwambelele.”
21Lino Eliyazaa mupaizi wakaambila aabo bakazwa kunkondo kuti, “Ngooyu mulawo Mwami Leza ngwaakapa Mozesi: 22Ngolida, nsiliva, mukuba, mundalila, mutofwe, 23alubulo lumwi loonse luumpwe mumulilo, ndendilyo nolutisalale. Kuzwa waawo zisalazigwe amaanzi aakusalazya. Kufumbwa citakonzyi kubikkwa mumulilo cisalazigwe amaanzi. 24Mubuzuba bwaciloba muleelede kusalazya zisani zyanu, ndendilyo nimuyoosalala mu Mulawo, kwamana waawo muyookonzya kunjila, muzivuka.”
Kwaabanya zyasaalwa
25Lino Mwami Leza wakaambila Mozesi kuti, 26“Yebo a Eliyazaa mupaizi abasololi babuleya, mubale zyakasaalwa zyoonse nkokuti bantu abanyama boonse. 27Muleelede kuzyaabanya muzipaanzi zyobilo, cimwi cibe cabasilumamba, cimwi cibe cababuleya. 28Kucipaanzi cabasilumamba, mugwisye akupa ku Mwami Leza comwe akati kazili myaanda yosanwe, naba muntu, ŋombe, mbongolo, mbelele, ampongo cipegwe ku Mwami Leza. 29Amuzipe kuli Eliyazaa mbuli cipego ku Mwami Leza. 30Kucipaanzi cababuleya, mugwisye comwe akati kamakumi osanwe, naba muntu, ŋombe, mbongolo, mbelele, mpongo abanyama bamwi. Eezi zipegwe ku Balevi babelekela mutente lya Mwami Leza.” 31Eelyo Mozesi a Eliyazaa bakacita mbubonya mbuli Mwami Leza mbwaakalailila Mozesi.
32Lino zyakasaalwa nzeezi, kwakali mbelele zili zyuulu zili myaanda iili cisambomwe amakumi aali ciloba azisanu. 33Kwakali ŋombe zili zyuulu zili makumi aali ciloba azibili. 34Kwakali mbongolo zili zyuulu zili makumi aali cisambomwe acimwi. 35Kwakali basimbi batazi basankwa bali zyuulu zili makumi otatwe azibili. 36Caabilo cabasilumamba cakali mbelele zili zyuulu zili makumi otatwe aciloba amyaanda yosanwe, 37cakapegwa ku Mwami Leza nimbelele zili myaanda iili cisambomwe amakumi aali ciloba azisanu. 38Ŋombe zyakali zyuulu zili makumi otatwe acisambomwe, cakapegwa ku Mwami Leza cakali ŋombe zili makumi aali ciloba azibili. 39Mbongolo zyakali zyuulu zili makumi otatwe amyaanda yosanwe, zyakapegwa ku Mwami Leza zyakali makumi aali cisambomwe. 40Bantu bakali zyuulu zili kkumi acisambomwe, bakapegwa ku Mwami Leza bakali makumi otatwe ababili. 41Mpawo Mozesi wakapa Eliyazaa cakapedwe ku Mwami Leza, mbubonya mbuli Mwami Leza mbwaakalailila.
42Lino caabilo cababuleya eeco Mozesi ncaakaandaanya kuzwa kuli cabasilumamba, 43cakali mbelele zili zyuulu zili myaanda yotatwe amakumi otatwe aciloba amyaanda yosanwe. 44Ŋombe zyakali zyuulu zili makumi otatwe acisambomwe. 45Mbongolo zyakali zyuulu zili makumi otatwe amyaanda yosanwe. 46Bantu bakali zyuulu zili kkumi acisambomwe. 47Kuzwa kucaabilo eeci Mozesi wakagwisya cipaanzi comwe cabantu bali makumi osanwe acipaanzi comwe cabanyama bali makumi osanwe, mbuli Mwami Leza mbwaakamulailila, eezyo wakazipa ku Balevi babelekela kutente lya Mwami Leza.
48Lino basololi babasilumamba bali zyuulu abali myaanda bakaya kuli Mozesi 49baakuti, “Simalelo wesu, twabala basilumamba boonse mbutwakali kulanga, taakwe awasweeka. 50Nkaako twaletela Mwami Leza ngolida, nkaya, ninga, bulungu, atunkwinta-nkwinta ntutwakasaala kuti tumanye busofwaazi bwesu ku Mwami Leza.” 51Mozesi a Eliyazaa bakatambula zyangolida azibelesyo zyoonse nzibakaleta, 52zyakaletwa ku Mwami Leza abasololi babasilumamba zyakali kulema masyekeli aali zyuulu zili kkumi acisambomwe amyaanda iili ciloba amakumi osanwe. 53Pele basilumamba buyo bakayobola eezyo nzibakasaala. 54Lino Mozesi a Eliyazaa mupaizi bakaleta ngolida eeyo kutente lyakuswaanganina kuti cibe cipego caciibalusyo ku Mwami Leza.
Currently Selected:
Myeelwe 31: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
