Myeelwe 33
33
Lweendo lwakuzwa ku Ijipiti kusika ku Mowabu
1Lino ngaaya makani aamba zyamasena aakayakide Baisilayeli nibakazwa mu Ijipiti mumisyobo yabo kabasolwedwa a Mozesi a Aloni. 2Kalaililwa a Mwami Leza Mozesi wakalemba masena aanyendo zyabo munzila eeyi.
3Baisilayeli bakanyamuka kuzwa ku Lamesisi mubuzuba bwakkumi aasanu mumwezi wakasaanguna buli mbuzuba bwakaccilila Pobwe Lyakwiindilila. Bakeenda cabusicamba Baijipiti boonse kabababwenae 4Baijipiti bakacili kuzikka bana babo bakusaanguna Mwami Leza mbaakajaya. Munzila eeyi Mwami Leza wakatondezya kuti ulaanguzu kwiinda baleza ba Baijipiti.
5Lino Baisilayeli bakalonga kuzwa ku Lamesisi baakuyakila ku Sukkoti. 6Bamane bakalonga kuzwa ku Sukkoti, baakuyakila ku Etamu kumagolelo aankanda. 7Bamane bakainka kuzwa ku Etamu, bapilukila ku Pihahiloti kujwe lya Baalizefoni baakuyakila munsi a Migidolu. 8Bamane bakalonga kuzwa ku Pihahiloti bazubuka lwizi kuya munkanda. Lino nibakeenda kwamazuba otatwe munkanda ya Etamu, bakasika ku Mala. 9Bamane bakalonga ku Mala baakuyakila ku Elimu, kwakali tusensa twamaanzi tuli kkumi alimwi atukunka tuli makumi aali ciloba.
10Bamane bakalonga kuzwa ku Elimu baakuyakila munsi a Lwizi Lusalala. 11Bamane bakalonga kuzwa ku Lwizi Lusalala baakuyakila kunkanda ya Sini. 12Bamane bakalonga kuzwa kunkanda ya Sini baakuyakila ku Dofuka. 13Bamane kuzwa ku Dofuka bakaakuyakila ku Alusyi. 14Bamane bakalonga kuzwa ku Alusyi baakuyakila ku Lefidimu, ooko kwakanyina maanzi aakunywa.
15Bamane bakalonga kuzwa ku Lefidimu baakuyakila kunkanda ya Sinai. 16Bamane bakalonga kuzwa kunkanda ya Sinai baakuyakila ku Kibulotihataava. 17Bamane bakalonga kuzwa ku Kibulotihataava baakuyakila ku Hazeloti. 18Bamane bakalonga kuzwa ku Hazeloti baakuyakila ku Litima. 19Bamane bakalonga kuzwa ku Litima baakuyakila ku Limonipelezi. 20Bamane bakalonga kuzwa ku Limonipelezi baakuyakila ku Libuna. 21Bamane bakalonga kuzwa ku Libuna baakukkala ku Lisa. 22Bamane bakalonga kuzwa ku Lisa baakuyakila ku Kehelata. 23Bamane bakalonga kuzwa ku Kehelata baakuyakila kucilundu ca Syefa. 24Bamane bakalonga kuzwa kucilundu ca Syefa baakuyakila ku Halada. 25Bamane bakalonga kuzwa ku Halada baakuyakila ku Makeloti. 26Bamane bakalonga kuzwa ku Makeloti baakuyakila ku Tahati. 27Bamane bakalonga kuzwa ku Tahati baakuyakila ku Tela. 28Bamane bakalonga kuzwa ku Tela baakuyakila ku Mitika. 29Bamane bakalonga kuzwa ku Mitika baakuyakila ku Hasyimona. 30Bamane bakalonga kuzwa ku Hasyimona baakuyakila mu Moseloti. 31Bamane bakalonga kuzwa ku Moseloti baakuyakila ku Benejaakani. 32Bamane bakalonga kuzwa ku Benejaakani baakuyakila ku Hagidigadi. 33Bamane bakalonga kuzwa ku Hagidigadi baakuyakila ku Jotibata. 34Bamane bakalonga kuzwa ku Jotibata baakuyakila ku Abilona. 35Bamane bakalonga kuzwa ku Abilona baakuyakila ku Eziyonigeba. 36Bamane bakalonga kuzwa ku Eziyonigeba baakuyakila munkanda ya Zini (ngo Kadesyi). 37Bamane bakalonga kuzwa ku Kadesyi baakuyakila kucilundu ca Hoo kumunyinza wa Edomu.
38Nkonkukooko Mwami Leza nkwaakalailila Aloni mupaizi kuti atante acilundu ca Hoo aawo mpaakafwida. Oobu bwakali buzuba bwakusaanguna, bwamwezi wasanu mumwaka wamakumi one kuzwa Baisilayeli nibakasiya Ijipiti. 39Ciindi eeci Aloni wakajisi myaka iili mwaanda amakumi obilo aitatu.
40Lino mwami waku Aladi kumusanza lya Kenani wakamvwa kuti Baisilayeli balaboola, 41kuzwa kucilundu ca Hoo bakaakukkala ku Zalimona. 42Bamane bakalonga kuzwa ku Zalimona baakuyakila ku Punoni. 43Bamane bakalonga kuzwa ku Punoni baakuyakila ku Oboti. 44Bamane bakalonga kuzwa ku Oboti baakuyakila ku Iyeabalimu mu Mowabu. 45Bamane bakalonga kuzwa ku Iyeabalimu baakuyakila ku Dibonigadi, 46bamane kuzwa ku Dibonigadi baakuyakila ku Alimonidibilatayimu, 47bamane kuzwa ku Alimonidibilatayimu baakuyakila mumalundu aaku Abalimu aali kumbele lya Nebo. 48Lino kuzwa kumalundu aa Abalimu bakaakuyakila kumabanda aa Mowabu mutala lyamulonga wa Jolodani kuzwa ku Jeliko, 49ooko mumabanda aa Mowabu bakaakuyakila munsi a Jolodani kuzwa ku Betisesyimoti kusikila ku Abelasyitimu mumabanda aa Mowabu.
Milawo yakuswiilila kabatana kuzubuka mulonga wa Jolodani
50Mumabanda aa Mowabu mutala lyamulonga wa Jolodani kuzwa ku Jeliko, 51Mwami Leza wakaambila Mozesi kuti, aambile Baisilayeli kuti, “Mwaakumana kuzubuka mulonga wa Jolodani ku Kenani, 52mukatande bantu boonse bamunyika eeyo. Mukapwayaule mituni yabo mibeze ayalubulo akumwayaula malende aabo. 53Mukatole nyika mukakkale, nkaambo ndime ndamupa njiyanu. 54Pele nyika ileelede kupambaulwa kwiindila mukuuma cisolo mbubweelede musyobo omwe-omwe, musyobo ulaabantu banji uyoopegwa cisi cipati, musyobo ulaabantu bace uyoopegwa cisi ciniini. Eeco cabawida acisolo ncecabo. Mwaabane kweendelana aziinga zyabasikale banu. 55Pele kuti naa mutakabatandi bantu banyika eeyo aabo mbomuyoosiya bayoomupenzya munyika, 56kuti mutakabatandi mubusena bwabo njoonyonyoona ndinywe, mbubonya mbuli mbundali kuyeeya kuyoobacita.”
Currently Selected:
Myeelwe 33: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
