Josyuwa 8

Basilumamba mbubakazunda munzi wa Ai

1Lino Mwami Leza wakaambila Josyuwa kuti, “Utayoowi nikuba kutyompwa. Tola basilumamba bako boonse mukalwane munzi wa Ai. Nkaambo ndaaba kale mwami wa Ai, bantu bakwe, munzi acisi cakwe. 2Ukacite munzi wa Ai amwami wawo mbubonya mbuli mbookacita munzi wa Jeliko amwami wawo, pele ooko muyookonzya kutola lubono lwabo antoomwe azivubwa zyabo. Mukayube aafwiifwi amunzi nkuuli kusule.”

3Lino Josyuwa abasilumamba boonse bakainka kuyoolwana munzi wa Ai. Wakasala basilumamba bacibwene kulwana bali zyuulu zili makumi otatwe akubatuma ciindi camasiku. 4Wakabalailila kuti, “Amuswiilile, mweelede kuyuba kusule aamunzi, pele kutali kulaale pe. Nyoonse kamuyoolibambilide. 5Mebo abamwi mbendinooli aabo, tuyooswena afwiifwi amunzi. Lino bantu aabo baakuzwa kuti batulwane, mbuli kusaanguna, swebo tuyoobatija. 6Bayootutandaanya kusikila tukabasisye kulaale. Banooti, ‘Batutija mbuli leliya!’ 7Eelyo nywebo mukayubunuke, mukasaale munzi. Mwami Leza wanu uyoowaaba kulindinywe. 8Lino mwaakuusaala munzi, mukuuumpe mbubonya mbuli Mwami Leza mbwaakamulailila. Muleelede kwaaccilila malailile aakwe.”

9Amane kubalailila boobo Josyuwa wakabatuma, bainka baakuyuba akati-kati kamunzi wa Beteli awa Ai kulubazu lwakumbo. Pele Josyuwa abasilumamba bamwi bakalikkede kuzivuka.

10Lino buce buyo cifumo-fumo Josyuwa wakabunganya basilumamba bakwe. Walo abapati ba Baisilayeli bakasolola kuya ku Ai. 11Basilumamba boonse aabo mbaakali aabo bakalulama ooko kwakali mulyango mupati wa munzi. Nibakaakusika bakayaka zivuka kulubazu lwakunyika. Akati kabo amunzi wa Ai kwakali kkuti. 12Kumbo lyamunzi Josyuwa wakabikkide basilumamba bakatisike kuzyuulu zyosanwe kuti bayube akati-kati kamunzi wa Beteli awa Ai. 13Basilumamba bakwe boonse bakali muzivuka kulubazu lwakunyika kubikkilizya abamwi boonse bakalibambila, bagama kumbo lyamunzi. Eelyo Josyuwa masiku aayo wakainka akati kakkuti. 14Lino mwami waku Ai naakabona basilumamba ba Josyuwa, wakalibambila cakufwambaana. Mbubwakaceda buyo, walo abantu bakwe bakainka kuyoolwana Baisilayeli kubusena bumwi kumbele lyankanda. Pele mwami ooyo taakwe naakazi kuti kuli bamwi basilumamba bamuyubilide kusule lyamunzi. 15Mpawo Josyuwa abasilumamba bamwi bakalibonya mbuli kuti bazundwa, bamane bakatijila munkanda. 16Lino baalumi bamumunzi wa Ai boonse bakaitwa kuti babatandaanye. Bakabatandaanya mane baakubataanya kule. 17Taakwe mwaalumi naba omwe wakasyaala mumunzi wa Ai nuuba wa Beteli, boonse bakaguumukila kukutandaanya Baisilayeli cakuti munzi wakasyaala buyo mbuboobu.

18Lino Mwami Leza wakaambila Josyuwa kuti, “Tondeka sumo eelyo ndyojisi kumunzi wa Ai, nkaambo nduuaba kulinduwe.” Mpoonya Josyuwa wakatondeka sumo eelyo kumunzi wa Ai. 19Mbwaakacitila buyo oobu, basilumamba aabo bakayubide bakasokomoka buunjila munzi. Basaala, bamane bakuuumpa. 20Ciindi baalumi bakumunzi wa Ai nibakacebuka, bakabona busi buuntumuka mujulu. Akaambo kaceeci bakabula kwakutijila, nkaambo Baisilayeli baya mbibakali kuya butandaanya kugama kunkanda bakabapilukila. 21Josyuwa abasilumamba bamwi nibakabona kuti basilumambanyina bakayubide buuola munzi akuuumpa, bakapilukila basilumamba bamunzi wa Ai, babalwana. 22Baisilayeli aabo bakali kutenta munzi bakazwa mumunzi, bazoobalwanina kusule. Nkaako bantu bamumunzi wa Ai bakabbaatikizigwa akati ka Baisilayeli, mbombuboobu boonse mbubakajaigwa. 23Mwami wamunzi wa Ai wakajatwa kali muumi akuletwa kuli Josyuwa.

24Lino Baisilayeli nibakamana kujaya baalumi boonse bamu Ai musokwe, amunkanda oomo mubakali kubatandaanyina, bakapiluka kumunzi wa Ai akuyoobajaya boonse bakali mumunzi apanga. 25Buzuba oobu bantu bamumunzi wa Ai boonse bakajaigwa bakasika kuzyuulu zili kkumi azibili. 26Josyuwa taakwe naakaleka kutondeka sumo kusikila boonse bakali kukkala mumunzi wa Ai nibakanyonyweedwa limwi. 27Baisilayeli bakatola nzivubwa alubono lumwi loonse lwamunzi, mbubonya mbuli Mwami Leza mbwaakalaililide Josyuwa.

28Mbombuboobu Josyuwa mbwaakatenta munzi wa Ai, wakaba citantaala, mane asunu nditongo. 29Josyuwa wakaangilila mwami wamunzi wa Ai. Wakamwaangilila mumusamu, mutumba wakwe kulengelela mane kusikila kumangolezya. Nilyakabbila Josyuwa wakaambila basilumamba bakwe kuti baangule mutumba wamwami ooyo buusowele amulyango mupati wamunzi. Bamane kucita oobo, bakalundika cilwi camabwe cipati atala amutumba ooyo, nkocicili asunu.

Mulawo mbuwakabalwa acilundu ca Ebali

30Lino Josyuwa wakayakila Mwami Leza, Leza wa Isilayeli cipaililo acilundu ca Ebali, 31mbubonya mbuli Mozesi mubelesi wa Mwami Leza mbwaakalailila Baisilayeli. Wakaciyaka mbubonya mbuli bbuku lyamilawo ya Mozesi mbolyaamba. Wakabelesya mabwe aatakabezedwe acibulo niciba comwe. Alincico bakapa ku Mwami Leza zipaizyo zyakutenta azituuzyo zyalumvwano. 32Baisilayeli boonse kabalangilide, Josyuwa wakalembulula milawo eeyo Mozesi njaakalembede. 33Nkaako Baisilayeli boonse, basilutwe, balupati-pati, babetesi antoomwe abazwamasi mbubakali kukkala aabo bakaliimvwi kumabazu obilo aabbokesi lyacizuminano ca Mwami Leza, kabalangide bapaizi, Balevi bakali kulibweza. Cisela cabantu aabo cakafutatilide cilundu ca Gelazimu, eeci cimwi cakafutatilide cilundu ca Ebali. Mbombuboobu Mozesi mubelesi wa Mwami Leza mbwaakabalailila kuti bakacite ciindi cakutambula cileleko. 34Kumane Josyuwa wakabala milawo yoonse cakupozomoka. Wakabalilizya zileleko azisinganyo mbubonya mbuli mbokulembedwe mubbuku lyamilawo. 35Josyuwa wakabala milawo eeyo yoonse Mozesi njaakalailila kuti akabalile Baisilayeli boonse. Naakali kubala kwakali bakaintu, bana, antoomwe abazwamasi aabo mbibakali kukkala limwi.

Currently Selected:

Josyuwa 8: Tonga96

Highlight

Copy