Josyuwa 9
9
Bagibiyoni mbubakacenga Josyuwa
1Lino bami boonse bakumbo aamulonga wa Jolodani bakamvwa mbuli Baisilayeli mbubakazunda. Abaa mbami bakali kukkala mutulundu amunselelo lyatulundu-lundu antoomwe abaabo bakabambalikide lwizi lupati mane kuyoosika ku Lebanoni. Aaba bakali bami ba Bahiti, Baamoli, Bakenani, Bapelezi, Bahivi, aba Bajebusi. 2Bakabungana antoomwe abasilumamba babo kuti bazoolwane Josyuwa a Baisilayeli. 3Pele Bagibiyoni bali mba Hivi nibakamvwa mbuli Josyuwa mbwaakacita kumunzi wa Jeliko awa Ai 4bakamucenga. Bakainka kulinguwe ambongolo zyakayumwide masaka aazapaukide, azikutu zyawaini zyakaindi zyakasuminidwe-suminidwe. 5Baalumi aaba bakasamide ndyasyo zizakede, azisani zyakakulumpede. Zinkwa zyabulilu bwabo zyakaliyumide akuba angubi. 6Bakasika ku Giligali kuzivuka ooko Josyuwa a Baisilayeli nkubakayakide, bakati, “Twazwa kunyika yakulaale, atupangane cizuminano andinywe.”
7Pele Baisilayeli bakaambila Bahivi kuti, “Ambweni tukkedene aafwiifwi. Ino inga twapangana buti cizuminano andinywe?”
8Aabo bantu bakaambila Josyuwa kuti, “Swebo tuli babelesi bako.” Mpawo Josyuwa wakabuzya kuti, “Ino ndinywe bani, alimwi muzwa kuli?”
9Balo bakaingula kuti, “Swebo tobabelesi bako, twazwa kunyika yakulaale, twaboola kuno akaambo kampuwo ya Mwami Leza wanu. Twakamvwa zyoonse nzyaakacita mu Ijipiti, 10ambwaakacita kubami bobilo baya ba Baamoli bakali kukkala kujwe lyamulonga wa Jolodani, kuli Sihoni mwami waku Hesyiboni a Ogi mwami waku Basyani wakali kulela mu Asyitaloti.”
11Lino bapati bamunzi antoomwe ababuleya boonse bamunyika yesu bakatwaambila kuti, “Mulibambile bulilu bwalweendo lwenu kutegwa muunke mukabonane a Baisilayeli. Bakatwaambila kuti tuzoomwambile kuti tuli babelesi banu tuyanda kupangana cizuminano andinywe. 12Bona, buzuba mbutwakanyamuka kuti tuzoomubone, zinkwa zyesu eezi zyakali zibotu, pele ono zyayuma nta, zyaba aangubi. 13Azyalo nkomo zyawaini eezi nitwakazizuzya zyakali mpya, pele ono bona zyamana. Zisani zyesu andyasyo zyakulumpala akaambo kamusinzo mulamfu.”
14Lino Baisilayeli bakalabila zilyo zyabantu aaba, pele taakwe nibakabuzya Mwami Leza akaambo kanzizyo. 15Amane Josyuwa wakapangana cizuminano caluumuno ambabo cakuti takooyoobanyonyoona. Basololi ba Baisilayeli abalo bakasinizya kuti taakwe nibayootyola cizuminano eeci pe.
16Lino nikwakainda mazuba otatwe kabali bakapangene kale cizuminano eeci, Baisilayeli bakaambilwa kuti bantu aaba bakkala aafwiifwi ambabo. 17Nkaako Baisilayeli bakalonga. Bakeenda kwamazuba otatwe, bamane bakaakusika kuminzi ya Bagibiyoni eeyi: Gibiyoni, Kefila, Beeloti, alimwi a Kiliyatijeyalimu. 18Mbombuboobu Baisilayeli mbibatakalwana bantu aaba. Tiibakabalwana akaambo kakuti bapati babuleya bakakonkezya muzina lya Mwami Leza, Leza wa Isilayeli, kuti tabakabajayi. Pele bantu boonse bakatongookela bapati aaba, 19nikuba boobo balo bakaamba kuti, “Twakabakonkezya kale muzina lya Mwami Leza, Leza wa Isilayeli, nkaako ono tatukonzyi kubacita cimwi cintu pe. 20Ncotunga twabacita ncakuti kabapona, akaambo kacikonke eeco ncitwakapangana, kuti pe, Leza ulatusubula. 21Atubaleke kabanootutebbela nkuni akututekela maanzi.” Mbombuboobu basololi mbubakabamba cisyomezyo cabo. 22Mpoonya Josyuwa wakaita Bagibiyoni akuti kulimbabo, “Ino nkaambo nzi nimwakatucenga mukutwaambila kuti muzwa kule kakuli muzwa aafwiifwi? 23Lino mwasinganyizigwa. Taakwe nomuyooleka kutebba nkuni akuteka maanzi aakuŋanda ya Leza wangu.”
24Balo bakaingula Josyuwa kuti, “Swebo tobabelesi bako, simalelo wesu, twakamvwa kuti Mwami Leza wanu wakalailila Mozesi mubelesi wakwe kuti uyoomupa nyika yoonse eeyi akunyonyoona bantu boonse bakkala muno. Nkaako twakayoowa kuti inga mwaba nomutunyonyoona, ncenciceeco ncitwakacitila boobu. 25Lino swebo twalyaaba kale kulinduwe, ulakonzya kutucita kufumbwa mboyanda.” 26Josyuwa wakabakwabilila kuzwa ku Baisilayeli, taakwe nibakabajaya. 27Kuzwa mubuzuba oobo Josyuwa wakabacita kuti kabatebba nkuni akuteka maanzi aabuleya aacipaililo ca Mwami Leza. Kusikila sunu Bagibiyoni mbobacita kufumbwa kubusena oobo Mwami Leza mbwaasala.
Currently Selected:
Josyuwa 9: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
