Josyuwa 7

Cinyonyoono ca Akani

1Lino Mwami Leza wakalaililide Baisilayeli kuti tabeelede kubweza cintu niciba comwe cazeezyo zyeelede kunyonyoonwa, pele kwakali batakasyomeka pe. Akani mwanaa Kaami, mwanaa Zabudi, mwanaa Zela, wamusyobo wa Juda wakabweza zimwi zyazintu eezyo. Nkaako Mwami Leza wakanyemena Baisilayeli.

2Bweende-bweende Josyuwa wakatuma baalumi kuzwa kumunzi wa Jeliko kuya ku Ai kujwe lyamunzi wa Beteli kufwiifwi aku Betaveni kuti bakatwele nyika. Baalumi aabo bakainka kumunzi wa Ai. 3Nibakapiluka, bakaambila Josyuwa kuti, “Bantu boonse batainki kuyoolwana munzi wa Ai pe. Tuma buyo bantu bali zyuulu zyobilo naa zyotatwe kuti bakuuzunde. Utapenzyi bantu boonse, nkaambo bantu bali kooko mbace.” 4Nkaako kwakainka baalumi bakatisike kuzyuulu zyotatwe, pele aaba bakazundwa abaku Ai. 5Basilumamba baku Ai bakabatandaanya basilumamba ba Baisilayeli kuzwida kumulyango mupati wamunzi mane kuyoosika kulubwe-lubwe. Bakajaya bamwi babo kunselelo. Bakafwa bakatisike kumakumi otatwe acisambomwe. Nkaako Baisilayeli bakatyompwa akuyoowa.

6Mpoonya Josyuwa wakazapaula zisani zyakwe akuvuntama ansi kumbele lyabbokesi lyacizuminano ca Mwami Leza mane kusikila mangolezya. Bapati ba Baisilayeli bakacita mbubonya oobo abalo, alimwi bakalibikka twe kumitwe. 7Josyuwa wakakomba wati, “O Mwami Leza, ino nkaambo nzi ncookatuzubusya mulonga wa Jolodani? Sena nkuti uzootwaabe ku Baamoli kuti batunyonyoone? Nicakabota nookatuleka buyo mutala liya lyamulonga. 8O Simalelo wangu, ino ono ndaamba nzi Baisilayeli mbaaba bazundwa abasinkondonyina? 9Bakenani amisyobo imwi yamunyika iino baakumvwa, bazootuzinguluka akutunyonyweeda limwi. Ino ono ulacita buti kuti ukwabilile bulemu bwako?”

10Lino Mwami Leza wakaambila Josyuwa kuti, “Nyamuka, ino uvuntamina nzi? 11Baisilayeli babisya, batyola cizuminano cangu eeco ncindakabalailila kubamba. Bakabweza zintu zimwi mulizeezyo zyeelede kunyonyoonwa. Bakazibba, bakabeja, alimwi bakasisa zintu eezyo akati kazintu zyabo. 12Ncenciceeco Baisilayeli ncibatakonzya kuyumina basinkondonyina. Batija kuzwa kuli mbabo nkaambo ono balo mbabeelede kunyonyoonwa. Nsikooba andinywe ccita munyonyoone zyoonse eezyo nzimwakalaililwa kuti mutabwezi. 13Nyamuka, ukaambile bantu kuti balibambile kubonana andime juunza. Nkaambo mebo nde Mwami Leza wa Isilayeli ndijisi cakuyooamba kuti, ‘Nobaisilayeli, akati kazintu eezyo nzyomujisi kuli zintu zimwi eezyo nzindakamulailila kunyonyoona! Tamukonzyi kuyumina basinkondonyoko ccita zintu eezyo muzigwisye.’ 14Lino baambile kuti juunza cifumo-fumo baleelede kuzooboola ku Mwami Leza mumisyobo yabo. Bamusyobo ooyo ngwetidome, baleelede kuboola kumbele muziinga zyabo. Baciinga eeco ncetidome, baleelede kuboola kumbele mumikwasyi yabo. Bamukwasyi ooyo ngwetidome, baleelede kuboola kumbele omwe-omwe. 15Ooyo uutijaninwe zintu eezyo zisinganyizidwe ulanyonyoonwa amulilo kubikkilizya amukwasyi wakwe azyoonse nzyajisi. Nkaambo watyola cizuminano cangu alimwi wacita cuusya nsoni mu Isilayeli.”

16Lino buce buyo cifumo-fumo Josyuwa wakaita Baisilayeli baima mumisyobo yabo, musyobo wa Juda nguwakadomwa. 17Mpoonya wakaleta musyobo wa Juda kumbele, wakaboola muziinga zyawo, ciinga ca Zela ncicakadomwa. Wakaleta ciinga ca Zela kumbele mumikwasyi yabo, mukwasyi wa Zabudi nguwakadomwa. 18Mpoonya wakaleta mukwasyi wa Zabudi kumbele, bakaboola omwe-omwe, aawo Akani mwanaa Kaami muzyukulu wa Zabudi nguwakadomwa. 19Lino Josyuwa wakati kuli Akani, “Mwanaangu, amba kasimpe kumbele lya Mwami Leza, Leza wa Isilayeli. Ndaambila eeco ncookacita, utazimi.”

20Lino Akani wakaingula kuti, “Kasimpe, ndakabisizya Mwami Leza, Leza wa Isilayeli. Nceeci ncindakacita, 21akati kazintu eezyo nzitwakasaala, ndakabona jansi bbotu lyakasuminwa ku Babuloni amasyekeli aansiliva aali myaanda yobilo alimwi acikoto cangolida cilema masyekeli aali makumi osanwe. Nizyakandinyomenezya ndakazibweza. Ndakazisisa ansi mutente lyangu, nsiliva njiili kunsi kwini.”

22Mpoonya aawo Josyuwa wakatuma bantu, bakazuzaanina kutente eelyo, baakuzijana zilisisidwe mutente ansi, nsiliva kiili kunsi kwini. 23Bakagwisya zintu eezyo mutente akuzileta kuli Josyuwa a Baisilayeli boonse. Bakazibikka ansi kumbele lya Mwami Leza. 24Mpoonya Josyuwa a Baisilayeli boonse, bakajata Akani mwanaa Zela, ansiliva, jansi, cikoto cangolida, bana bakwe balombe abasimbi, ŋombe, mbongolo ambelele zyakwe, tente lyakwe azyoonse nzyaakajisi, bamutola kukkuti lya Akoo. 25Josyuwa wakabuzya kuti, “Ino nkaambo nzi ncootuletelezya mapenzi aaya? Mwami Leza ulakuletela mapenzi ayebo.” Lino bantu boonse bakamuuma mabwe kusikila wafwa. Kumane bakauma baŋanda yakwe amabwe, bamane kubajaya bakabatenta. 26Atala lya Akani bakalundika mulwi wamabwe nkuucili asunu. Ncenciceeco kkuti eelyo ncoliitwa kuti Akoo. Lino Mwami Leza wakaleka kunyema.

Currently Selected:

Josyuwa 7: Tonga96

Highlight

Copy