Josyuwa 10
10
Baamoli mbubakazundwa
1Lino Adonizedeki mwami waku Jelusalemu wakamvwa kuti Josyuwa wakazunda munzi wa Ai, wakuunyonyweeda limwi, akujaya mwami wawo, mbubonya mbuli mbwaakacita kumunzi wa Jeliko amwami wawo. Wakamvwa alimwi kuti Bagibiyoni bakapangana cizuminano caluumuno a Baisilayeli akuti bakkede akati kabo. 2Mwami abantu bakwe bamumunzi wa Jelusalemu bakayoowa kapati akaambo kaceeci. Gibiyoni wakali munzi mupati, mbuli bwakali minzi imwi yakajisi mwami. Wakali munzi mupati kwiinda wa Ai, alimwi baalumi banguwo boonse bakalicibwene kulwana. 3Nkaako Adonizedeki mwami wamu Jelusalemu wakakumbila Hohamu mwami waku Hebuloni, Pilamu mwami waku Jaamuti, Jafiya mwami waku Lakisyi, a Debii mwami waku Egiloni. 4Wakabaambila kuti, “Amuboole muzoondigwasye kulwana munzi wa Gibiyoni, nkaambo wakapangana cizuminano caluumuno a Josyuwa antoomwe a Baisilayeli boonse.”
5Lino bami ba Baamoli bosanwe aaba, mwami waku Jelusalemu, waku Hebuloni, waku Jaamuti, waku Lakisyi, awaku Egiloni bakabunganya mpi zyabo akuzinguluka munzi wa Gibiyoni akuulwana.
6Mpoonya Bagibiyoni bakatumya mulomo kuli Josyuwa kuzivuka ku Giligali bati, “Utatulekelezyi simalelo wesu. Boola, fwambaana uzootuvune. Uzootugwasye nkaambo bami boonse ba Baamoli bamunyika yatulundu-lundu baboola ampi kuzootuvumpa.”
7Nkaako Josyuwa wakanyamuka kuzwa ku Giligali antoomwe abasilumamba bakwe boonse, abaabo boonse bakacibwene kulwana. 8Mwami Leza wakaambila Josyuwa kuti, “Utabayoowi pe, ndabaaba kale kulinduwe. Taakwe naba omwe uutikuyumine.” 9Josyuwa abasilumamba bakwe bakeenda busiku boonse kuzwa ku Giligali baakubbaatikizya Baamoli. 10Mwami Leza wakacita kuti Baamoli baindingane ciindi Baisilayeli nibakaakusika ooko. Nkaako Baamoli bakazundwa ku Gibiyoni a Baisilayeli. Baisilayeli baabatandaanya mane mbaabo baakwiinda kumumpata waku Betiholoni, kabaya bubajaya mane kusikila kumusanza ku Azeka aku Makkeda. 11Baamoli kabaciya butija Baisilayeli kunselelo lya Betiholoni kuya ku Azeka, Mwami Leza wakabaumya civulamabwe, aabo bakajaigwa acivulamabwe mbanji kwiinda baabo bakajaigwa amapanga aa Baisilayeli.
12Buzuba oobo Mwami Leza wakaaba Baamoli ku Baisilayeli, Josyuwa wakakumbila Mwami Leza Baisilayeli boonse kabamvwide wati,
“Ozuba, ima atala lya Gibiyoni,
ayebo omwezi ima atala aakkuti lya Aaijaloni.”
13Zuba lyakaima ncobeni, awalo mwezi mbubonya, mane kusikila bantu nibakazunda basinkondonyina, mbubonya mbuli mbokulembedwe mubbuku lya Jasyaa. Izuba lyakaima acilungu-lungu, lyakaima kwaciindi cilamfu mbuli buzuba boonse. 14Kuzwa eelyo niliba sunu taakwe buzuba buli mbuli mbubo. Buzuba oobo Mwami Leza naakaswiilila muntu. Kasimpe Mwami Leza nguwakali kulwanina Baisilayeli!
15Mpoonya Josyuwa wakabweeda antoomwe a Baisilayeli boonse kuzivuka ooko nkubakakkede ku Giligali.
Josyuwa mbwaakajata bami bosanwe ba Baamoli
16Lino bami aaba bosanwe bakatija baakuyuba mumpangala ku Makkeda. 17Josyuwa naakaambilwa kuti bami bosanwe ba Baamoli bajanwa kabayubide mumpangala ku Makkeda 18wakati, “Mukunkulisye mabwe mapati, mujale amulyango wampangala, mwamana musiye bamwi banoolindila. 19Pele nywebo lwanu mutakkali aawo, mweelede kutandaanya basinkondonyoko, mubalwane, mutabalekeli kuti banjile muminzi yabo, nkaambo Mwami Leza wanu wabaaba kale kulindinywe.”
20Mbombuboobu Josyuwa a Baisilayeli mbubakabanyonyoona, nikuba kuti bamwi babo bace buyo, bakakonzya kutijila muminzi yabo yankwakwa. 21Impi ya Baisilayeli yoonse yakabweeda kaizulide kuli Josyuwa kuzivuka zyaku Makkeda. Kuzwa waawo taakwe naba omwe wakacili kusampaula Baisilayeli.
22Kumane Josyuwa wakati, “Amusinkule mulyango wampangala, mulete bami bosanwe aabo kulindime.” 23Eelyo bakaleta bami aabo bosanwe bakayubide mumpangala, mwami waku Jelusalemu, waku Hebuloni, waku Jaamuti, waku Lakisyi, awaku Egiloni. 24Nibakaleta bami aaba kulinguwe, Josyuwa wakaita baalumi boonse Baisilayeli alimwi wakalailila bapati babasilumamba boonse aabo mbaakainkide aabo kuti baboole kumbele bazoolyate munsingo zyabami aabo kutondezya kuti bazundwa. Aboobo bakaboola babalyata munsingo.
25Kumane Josyuwa wakati kubapati baya, “Mutayoowi, nikuba kutyompwa. Amuyume mube basicamba. Nkaambo mbombubo oobu Mwami Leza mbwayoocita kuli basinkondonyoko aabo mbomuyoolwana.” 26Mpawo Josyuwa wakajaya bami aabo, amane wakaanzika mitumba yabo amisamu yosanwe. Bakali kulengelela aawo mane kusikila kumangolezya.
27Lino nilyakabbila, Josyuwa wakalailila kuti mitumba yabo yaangulwe. Bakabaangula akuyoobasowela mumpangala eeyo njiyonya njibakayubilide. Bakalundika mabwe mapati amulyango wa mpangala, nkwaacili asunu.
Josyuwa mbwaakatola cisi ca Baamoli
28Buzuba oobo Josyuwa wakazunda munzi wa Makkeda. Wakuutola akujaya bantu boonse apanga. Wakuunyonyoona, taakwe muntu naba omwe ngwaakasiya. Wakacita kumwami wa Makkeda mbuli mbwaakacita kumwami wa Jeliko.
29Kuzwa waawo Josyuwa abasilumamba bakwe boonse bakazwa ku Makkeda, baya kumunzi wa Libuna baakuusaala. 30Munzi ooyu awalo Mwami Leza wakuuaba ku Baisilayeli. Josyuwa wakanyonyoona bantu bawo boonse. Taakwe naba omwe ngwaakasiya pe. Wakacita kumwami wa Libuna mbubonya mbuli mbwaakacita kumwami wa Jeliko.
31Kuzwa waawo Josyuwa antoomwe abasilumamba bakwe bakazwa ku Libuna baya ku Lakisyi. Munzi ooyo wakuuzinguluka akuulwana. 32Mwami Leza wakaaba munzi ooyo ku Baisilayeli, mubuzuba bwabili Josyuwa wakuutola. Bantu boonse bamumo wakabajaya apanga, mbubonya mbuli mbwaakacita ku Libuna. 33Holamu mwami waku Geza wakaliboolede ampi yakwe kuzoogwasilizya munzi wa Lakisyi, pele Josyuwa wakamuzunda antoomwe abasilumamba bakwe, cakuti taakwe naba omwe ngwaakasiya pe.
34Kuzwa waawo Josyuwa abasilumamba bakwe bakazwa ku Lakisyi, baya ku Egiloni, wakauzinguluka munzi ooyo akuulwana. 35Bakuutola mubuzuba mbubonya oobo akunyonyoona bantu bawo boonse apanga, mbubonya mbuli mbubakacita ku Lakisyi.
36Kuzwa waawo Josyuwa abasilumamba bakwe bakazwa ku Egiloni, baya ku Hebuloni baakuusaala. 37Bakuutola munzi ooyo akunyonyoona bantu bawo boonse antoomwe amwami wawo aminzi yakazingulukide. Taakwe naba omwe muntu ngubakasiya pe. Mbubonya mbuli mbubakacita ku Egiloni, bakuunyonyoona antoomwe abantu bawo.
38Mpoonya Josyuwa antoomwe abasilumamba bakwe bakanyona bazoolwana Debii. 39Bakanyonyoona munzi ooyo aminzi yakazingulukide kubikkilizya amwami wawo. Bakanyonyoona bantu boonse, taakwe naba omwe ngubakasiya pe. Bakacita kumunzi wa Debii antoomwe amwami wawo mbubonya mbuli mbubakacita ku Libuna antoomwe amwami wawo mbubonya oobo mbubakacita aku Hebuloni.
40Mbombuboobu Josyuwa mbwaakazunda nyika eeyi yoonse. Nyika yatulundu-lundu, kujwe, akumbo aku Negebu kumusansa. Wakajaya bami banyika eeyi, taakwe naba omwe ngwaakasiya pe. Wakabanyonyweeda limwi, mbubonya mbuli Mwami Leza, Leza wa Isilayeli, mbwaakalailila.
41Josyuwa wakazunda bantu boonse kuzwa ku Kadesyibaaneya kuyoosika ku Gaza, alimwi acisi coonse ca Gosyeni kuyoosika ku Gibiyoni. 42Josyuwa wakazunda bami boonse aaba azisi zyabo mulweendo lomwe, nkaambo kakuti Mwami Leza, Leza wa Isilayeli, nguwakalwanina Baisilayeli. 43Amane Josyuwa abasilumamba bakwe boonse bakapilukila kuzivuka zyabo ku Giligali.
Currently Selected:
Josyuwa 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
