Josyuwa 11

Josyuwa mbwaakazunda Jabini Abaminyina

1Ciindi Jabini mwami waku Hazoo naakamvwa kuzunda kwa Baisilayeli, wakatumya mulomo kuli Jobabu mwami waku Madoni alimwi akubami baku Syimuloni a Akisyafu. 2Wakatumya akubami bacisi nkocili kunyika bakali kukkala mutulundu-lundu, abaabo bakali munkanda, kumusanza lyamunzi wa Kineleti. Wakatuminizya akuli baabo bakali lwaambo kunselelo lyatulundu abaku Nafotidoo kumbo. 3Wakatumya mulomo aku Bakenani bakali kujwe akumbo lyamulonga wa Jolodani aku Baamoli, Bahiti, Bapelezi a Bajebusi, bakali mutulundu-lundu, antoomwe a Bahivi aabo bakali kukkala munselelo aacilundu ca Hemoni munyika ya Mizipa. 4Boonse aaba bakaboola abasilumamba babo, amabbiza manji ankalaki, bakali banji kapati mbuli musenga wankomwe yalwizi. 5Bami boonse aaba bakabikka basilumamba babo antoomwe akuyaka zivuka kumbali aamaziba aaku Melomu kuti balwane Baisilayeli.

6Lino Mwami Leza wakaambila Josyuwa kuti, “Utayoowi pe, nkaambo juunza mbuli oono, ndinoozoobaabide kale ku Baisilayeli, banoofwide. Mweelede kuyookosoola misisa yamabbiza aabo akutenta nkalaki zyabo.”

7Josyuwa abasilumamba bakwe bakavumpa basinkondonyina ku kalonga ka Melomu 8ooko Mwami Leza kkwaakabaambila ku Baisilayeli. Bakabazunda akubatandaanya mane mbaabo kulubazu lwakunyika ku Misilefotimaimu aku Sidoni. Bakabatandaanya mpaka kujwe lyakkuti lya Mizipa. Taakwe naba omwe ngubakasiya pe. 9Kumane Josyuwa wakacita mbubonya mbuli Mwami Leza mbwaakamulailila. Wakakosoola misisa yamabbiza akutenta nkalaki zyabo.

10Kuzwa waawo Josyuwa wakanyona, wazoosaala munzi wa Hazoo akujaya mwami wawo apanga. Munzi wa Hazoo wakali ngomunzi mupati waminzi yoonse eeyi. 11Boonse bakabajaya amapanga. Bakabanyonyweeda limwi cakuti taakwe niciba comwe ciputa ncibakasiya pe. Awalo munzi wa Hazoo lwawo wini bakuutenta.

12Josyuwa wakasaala minzi akujaya bami bayo apanga. Wakabanyonyweeda limwi mbubonya mbuli Mozesi mubelesi wa Mwami Leza mbwaakalaililide. 13Pele minzi yoonse yakayakidwe azitantaala tiibakiiola ccita buyo munzi wa Hazoo ooyo Josyuwa ngwaakatenta. 14Baisilayeli bakabweza zyoonse nzibakasaala antoomwe azivubwa zyaminzi eeyi. Pele bantu boonse bakabajaya amapanga. Taakwe naba omwe ngubakasiya pe. 15Mbubonya mbuli Mwami Leza mbwaakalailila Mozesi mubelesi wakwe, awalo Mozesi wakalailila Josyuwa, nkabela Josyuwa wakacita mbuli mbwaakaambilwa. Taakwe ncaatakacita kuli zyoonse eezyo Mwami Leza nzyaakalailila Mozesi.

Josyuwa mbwaakatola Cisi

16Lino Josyuwa wakazunda nyika eeyi yoonse. Wakatola cisi catulundu-lundu ku Negebu kumusanza, cisi ca Gosyeni coonse, cisi cakunselelo aatulundu-lundu, cisi cakumusanza kwini, akkuti lya Jolodani. 17Cisi eeci cakali kutalikila kucilundu ca Halaki kulangana a Siiya, kuyoosika ku Baaligadi mukkuti lya Lebanoni munsi aacilundu ca Hemoni. Wakajata bami babo akubajaya. 18Kwaciindi cilamfu Josyuwa wakalwana abami aaba. 19Mbaatakalwana aabo buyo Mbahivi bakali kukkala mumunzi wa Gibiyoni, akaambo kacizuminano ciya ncibakapangana anguwe. Boonse aaba bamwi wakabalwana akubazunda. 20Mwami Leza nguwakacita misyobo eeyi kuti ilwane Baisilayeli mukuti ainyonyweede limwi. Wakainyonyoona, taakwe naakiiengelela mbubonya mbuli Mwami Leza mbwaakalailila Mozesi.

21Alimwi Josyuwa wakainka kuyoonyonyoona Baanaki aabo bakali kukkala munyika yatulundu-lundu ya Hebuloni, Debii, Anabu, azisi zyatulundu-lundu zya Juda a Isilayeli. Josyuwa wakabanyonyweeda limwi antoomwe aminzi yabo. 22Taakwe Muanaki naba omwe wakacili mucisi ca Baisilayeli. Bakasyaala bakali buyo mu Gaza, Gati, amu Asyidodi.

23Mbombuboobu Josyuwa mbwaakazunda nyika eeyo yoonse, mbubonya mbuli Mwami Leza mbwaakalaililide Mozesi. Wakaipa Baisilayeli kuti ibe lukono lwabo mukweendelana aziinga zyabo. Nkabela kwakaba luumuno munyika, kwakacinyina nkondo pe.

Currently Selected:

Josyuwa 11: Tonga96

Highlight

Copy