Josyuwa 1
1
Mwami Leza mbwaakalailila Josyuwa kuzunda nyika ya Kenani
1Lino kunze aalufu lwa Mozesi mubelesi wa Mwami Leza, Mwami Leza wakaambila Josyuwa mwanaa Nuni wakali mugwasyi wa Mozesi 2kuti, “Mozesi mubelesi wangu wakafwa. Nkaako lino yebo abantu boonse aaba mulibambilile kuzubuka mulonga wa Jolodani, muye munyika eeyo njendiyoopa ku Baisilayeli. 3Mbubonya mbuli mbundakasyomezya Mozesi, ndiyoomupa kufumbwa aawo mpomuyoolyata. 4Kuzwa munkanda mane kusikila kuzilundu zyaku Lebanoni akuzwa kumulonga mupati wa Yufuletisi kujatikizya anyika yoonse ya Bahiti mane kulwizi lupati kumbo. 5Taakwe naba omwe uyookuzunda mubuumi bwako boonse. Mbubonya mbuli mbwindakali aa Mozesi, ndiyooba ayebo. Taakwe nenjookusiya nikuba kukulekelezya pe. 6Zyandamana, ube sicamba, nkaambo nduwe uutisolwede bantu boonse kuti bakatole nyika eeyo njindakakonkezya kuli basikale babo kuti njoobapa. 7Zyandamana, ube sicamba. Weelede kuyootobela cabunkutwe malailile oonse mubelesi wangu Mozesi ngaakakupa. Toelede kuyooasusya pe, ndendilyo noyoozwidilila kuli koonse nkoyooya. 8Utakaleki kubala bbuku lya Mulawo eeli, weelede kunoolibala sikati amasiku, akubona kuti wabamba zyoonse zilembedwe mulindilyo. Ndendilyo noyoosumpuka akuzwidilila kabotu-kabotu. 9Koyeeya kuti ndime ndakulailila! Zyandamana, ube sicamba. Utakankami nikuba kutyompwa, nkaambo Mwami Leza wanu uyooba anduwe kuli koonse nkoyooya.”
Josyuwa mbwaakalailila bantu
10Mpawo Josyuwa wakalailila basololi babantu kuti, 11“Kamuya muzivuka mwaambile bantu kuti, ‘Amulibambile bulilu.’ Kwainda buyo mazuba otatwe mulazubuka mulonga wa Jolodani kuti mukatole nyika eeyo Mwami Leza wanu njayoomupa!”
12Pele kumisyobo ya Lubeni, Gadi acisela ca Manase, Josyuwa wakati, 13“Amuyeeye majwi aa Mozesi mubelesi wa Mwami Leza naakati, ‘Mwami Leza wanu uyoomupa kulyookezya alimwi a nyika eeyi kuti ibe yanu!’ 14Bakaintu banu, bana banu, anzyomuvubide zileelede kusyaala munyika iino yakamupa Mozesi kujwe lya Jolodani. Pele basilumamba banu boonse, bakonzya kulwana kabajisi azilwanyo baleelede kusaanguna kuzubuka. Mweelede kugwasya Baisilayelinyoko 15mane kusikila Mwami Leza akabape nyika mbuli mbwaakamupa anywebo. Baakumana kutola nyika eeyo Mwami Leza wamu njayoobapa, muyookonzya kupiluka kuzookkala munyika yanu iino Mozesi mubelesi wa Mwami Leza njaakamupa kujwe lyamulonga wa Jolodani.”
16Mpoonya bamisyobo eeyi bakaingula Josyuwa kuti, “Zyoonse nzyootulailila tulazicita, alimwi koonse nkoyootutuma tuyooinka. 17Mbubonya mbuli mbutwakali kuswiilila Mozesi, tunookuswiilila ayebo. Ncotukumbila buyo nkuti Mwami Leza abe aanduwe mbubonya mbuli mbwaakali aa Mozesi. 18Kufumbwa muntu uususya majwi aako nikuba kutaswiilila nzyootulailila uleelede kujaigwa. Zyandamana, koba buyo sicamba.”
Currently Selected:
Josyuwa 1: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
