Josyuwa 2
2
Josyuwa mbwaakatuma basikutwela munzi wa Jeliko
1Lino Josyuwa mwanaa Nuni wakatuma basikutwela bobilo kuzwa ku Syitimu wakati, “Kamuya mukatwele nyika, kwaambisya munzi wa Jeliko.” Mpawo bakainka, nibakaakusika kumunzi ooyu, bakaakusikila kuŋanda yamukaintu mwaamu Lahabu.
2Lino mwami waku Jeliko wakaambilwa kuti, “Kwakasika Baisilayeli bamwi muno masiku kuzootwela nyika.” 3Eelyo mwami ooyu wakatuma majwi kuli Lahabu aakuti, “Baalumi aabo bali muŋanda yako, bakaboolela kuzootwela nyika mboibede, ubalete kuno!”
4Pele walo wakabasiside kale baalumi bobilo aabo, eelyo wakati, “Kwalo masimpe, ndasikilidwe bantu, pele tandizi nkubakazwida. 5Nikwakaba kulubundu-bundu ciindi lijalwa mulyango mupati wamunzi, bantu aabo bakainka. Tandizi naa bakatozya nzila iili. Kuti mwabatobela cakufwambaana, ambweni inga mulabeenzya.” 6Naamba boobo ani kuti wakabasiside atala aaciluli kunsi aamakuba aabutonje ngaakabikkide aawo. 7Basikubatobela mbubakazwida buyo, mulyango mupati wamunzi wakajalwa. Nkabela bakayandaula basikutwela aabo, batozya nzila iigama kuzito zyamulonga wa Jolodani.
8Lino basikutwela kabatanalala, Lahabu wakatanta atala aaciluli 9akubaambila kuti, “Ndizi kuti Mwami Leza waaba nyika eeyi kulindinywe, alimwi bantu boonse baliyoowede akaambo kandinywe. 10Twakamvwa mbuli Mwami Leza mbwaakaandaanya maanzi aalwizi lusalala ciindi nimwakazwa mu Ijipiti. Alimwi twakamvwa ambuli mbumwakajaya Sihoni a Ogi, bami bobilo ba Baamoli bakali kukkala kujwe lyamulonga wa Jolodani. 11Mbutwakamvwida buyo zyandinywe, lyakatuleka, taakwe naba omwe wakacili aamputo pe. Nkaambo Mwami Leza wanu ngu Leza wajulu aansi aano. 12Nkaako lino amundisyomezye, mukonkezye muzina lya Mwami Leza kuti muzooengelela mukwasyi wangu, mbubonya mbwindamucitila nywebo, musinizye kuti 13muzooleka taata abaama, banyinandumi abasyoonto bangu antoomwe amikwasyi yabo. Tamukoozootujaya pe.”
14Baalumi aabo bakamwaambila kuti, “Mwami Leza atunyonyoone kuti naa tutazoociti oobo. Ncotuyanda buyo nkuti utaambili muntu naba omwe ncitweendelede, twakusyomezya kuti Mwami Leza aakwaaba nyika iino, aswebo tuzookucitila bweelede.”
15Lino akaambo kakuti ŋanda ya Lahabu yakaliswaangene abwaanda bwamunzi, Lahabu wakaselusya baalumi aaba ampulungwido yayo antambo. 16Wakabaambilide kuti, “Kamuya muzilundu mukayube kuti basikumutobela batamuboni. Mukayube oomo kwamazuba otatwe mane kusikila bakapiluke, ndendilyo nywebo nomuyooinka.”
17Lino baalumi aaba bakaambilide mukaintu ooyu kuti, “Tuzoobamba cisyomezyo eeci ncootukonkezya. 18Nceeci ncozoocita. Twazoosaala nyika yanu, uzooange ntambo eeyi iisalala njiyonya njotituselusizye ampulungwido. Ukalete muŋanda muno uso abanyoko banyinandumi bako antoomwe abamukwasyi wauso bamwi. 19Kufumbwa ooyo uutikazwide anze, uyoolibonena, swebo tatukooyooba aamulandu akaambo kakwe. Pele kuti umwi unooli anduwe muŋanda akacisigwe, mulandu uyooba wesu. 20Nikuba boobo kuti waambile umwi ncitweendelede tatukabambi cisyomezyo eeci ncootukonkezya pe.” 21Mukaintu ooyu wakaingula kuti, “Mbubo, ndamvwa.” Mbombubo mbwaakabaleka, bainka. Amane wakaanga ntambo iisalala eeyo ampulungwido.
22Lino nibakazwa ooko bakainka kuzilundu akukkala kwamazuba otatwe. Basikubatobela bakayandaula koonse-koonse, pele tiibakabajana, mpawo bakapiluka. 23Mpampawaawo basikutwela bobilo aabo mpibakakonzela kuunka kulimbabo. Bakaselela zilundu, bazubuka mulonga wa Jolodani, akuya kuli Josyuwa mwanaa Nuni. 24Bakaambila Josyuwa kuti, “Kasimpe Mwami Leza waaba kale nyika yoonse kulindiswe. Bantu boonse lilibalekede akaambo kandiswe.”
Currently Selected:
Josyuwa 2: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
