Ciibalusyo 34

Lufu lwa Mozesi

1Lino Mozesi wakatanta acilungu ca Nebo kuzwa mumabanda aa Mowabu waakusika amutwe wacilundu ca Pisiga kulangana amunzi wa Jeliko. Ooko Mwami Leza wakamutondezya nyika yoonse mboibede. Kutalikila ku Giliyadi kusikila ku Dani, 2cisi coonse ca Nafutali, Efulemu a Manase, cisi ca Juda coonse mane kuyoosika kulwizi lwakumbo, 3kuzwa kucisi cakumusanza acisi coonse kuzwida kukkuti lya Jeliko, munzi watukunka, mane kuyoosika ku Zowa. 4Mpoonya Mwami Leza wakaambila Mozesi kuti, “Eeyi njenyika njindakakonkezya kuli Abulahamu, Izaka a Jakobo nindakati, Ndiyooipa lunyungu lwanu. Ndakutondezya buyo kuti wiibone, pele tokoonjila mulinjiyo pe.”

5Mbombuboobu Mozesi mubelesi wa Mwami Leza mbwaakafwa ooko munyika ya Mowabu, mbubonya mbuli Mwami Leza mbwaakaamba. 6Nkabela Mwami Leza lwakwe wakamuzikka munyika ya Mowabu, mukkuti kulangana a Betipeyo. Pele kusikila sunu taakwe muntu naba omwe uuzi cuumbwe ca Mozesi mpocibede. 7Mozesi naakafwa, wakali aamyaka iili mwaanda amakumi obilo. Nikuba boobo meso aakwe taakoomfokede, alimwi wakacili muyumu. 8Baisilayeli bakamulila kwamazuba aali makumi otatwe mumabanda aa Mowabu.

9Lino Josyuwa mwanaa Nuni wakazula busongo nkaambo Mozesi katanafwa wakamubikka maanza. Nkaako Baisilayeli bakamuswiilila akucita zyoonse eezyo Mwami Leza nzyaakalailila Mozesi.

10Kuzwa ciindi eeco, takunabede musinsimi mu Isilayeli uuli mbuli Mozesi, wakakanana a Mwami Leza. 11Taakwe musinsimi naba omwe wakacita zitondezyo azigambya zili mbuli Mwami Leza nzyaakamutuma kuti akacite mu Ijipiti kuli Falo, akuli balupati-pati bakwe, akunyika yakwe yoonse mboibede. 12Taakwe naba omwe wakacita zitondezyo zyanguzu niziba zimwi zigambya zili mbuli zyakacita Mozesi Baisilayeli kabalibwenene.

Currently Selected:

Ciibalusyo 34: Tonga96

Highlight

Copy

Compare