Jobo 9
9
1Eelyo Jobo wakaingula wakati,
2“Ncobeni ndilizi kuti mbokubede oobo,
pele ino inga muntu uulya maila walulama buti kuli Leza?
3Kuti naa umwi kayanda kwaambana anguwe takonzyi kwiingula
niciba ciindi comwe muziindi zili cuulu.
4Leza ngu Sibusongo, ngu Singuzu.
Nguni wakazumanana anguwe akuzwidilila? Taakwe.
5Nguuzyula malundu akwaavuntamika mubukali bwakwe,
kaatazi kuti ncinzi cicitika.
6Uuyuuntanya nyika kuzwa mubusena bwayo,
mane azyalo ntalisyo zilazungaana.
7Leza ulaanguzu zyakwaambila zuba kuti litapasuli,
nkaako inga talizwi pe, nguujalila nyenyezi.
8Walo alikke nguwakayala julu, akulyatauka mayuwe aalwizi.
9Wakalenga nyenyezi, bandakuyasa, dangabalya,
mulalabungu, alimwi anyenyezi yakumusanza.
10Leza ulacita zintu zipati zitazibiki,
zintu zigambya zitabaliki,
11ulandiinda nketamuboni, uleenda pele nsimuboni pe.
12Masimpe, ulakwempa, ani nguni uukonzya kumukasya?
Nguni uukonzya kwaamba kuti, ‘Ncinzi ncocita?’
13“Leza tanyemununwi.
Uyabucita kuti basikulisumpula abagwasyi ba Lahabu bamufugamine.
14Ino kayi ndakazyanya buti anguwe,
ndasala majwi nzi aakwaambana anguwe?
15Nikuba kuti ndiluleme nsikonzyi kumwiingula Leza,
pele njelede buyo kukombelezya uundibeteka kuti andifwide luzyalo.
16Kuti naa ndamwiita wamana wandiingula,
inga nsikoosyoma kuti waliswiilila jwi lyangu.
17Ulandikalalila, akuvuzya zilonda zyangu kakunyina kaambo.
18Tandizumizyi kuti ndyookezye pe,
pele ulandivuzizya macise.
19Kuti naa nkaambo kanguzu, walo ngu Singuzu kapati!
Kuti naa nkaambo kalubeta, nguni uukonzya kumutola kunkuta?
20Nikuba kuti ndiluleme, kwaamba kwangu kulandikazya.
Nikuba kuti nsikwe cibi, ulandijanina mulandu.
21Nsikwe mulandu pele nsililumbaizyi, buumi bwangu ndabucimwa.
22Nkaako ndati ncimwi buyo ulanyonyoona baluleme ababi boonse.
23Ciindi mapenzi naaleta lufu lwakwaanzuka kuli baabo batakwe mulandu,
walo ulasabula kuciindi camalweza aabo.
24Nyika yakapegwa kubabi,
kuti naa talinguwe, ino kayi nguni?
Leza ulaanga masyu aababetesi bayo kuti batabeleki kabotu.
25“Mazuba aangu alafwambaana kwiinda muzuzi,
alamana nketaboni bubotu.
26Aleenda mbuli mato aaluno,
mbuli sikwaze uufuumukila cakulya.
27Naa ndaamba kuti, ‘Ndube matongoosi aangu,
kusyulungana kwabusyu bwangu kumane, ndilasekelela.’
28Pele mapenzi aangu aaya alayoosya
andizibya kuti tokandaambi kuti ndinyina kaambo.
29Ndipedwe kale mulandu,
ino ndipengela nzi cabuyo?
30Nikuba kuti ndasamba amaanzi aasalazya,
akusanzya maanza aangu acikolokoko,
31nikuba boobo ulandidumpukizya mumulindi wamafuse,
nkaako zibaki zyangu zilasesemya,
32nkaambo walo tali muntu uulya maila mbuli ndime
kuti ndikonzye kumwiingula nikuba kukazyanya anguwe munkuta.
33Taakwe sikukosola mulandu wesu pe,
uukonzya kutuleta aantoomwe.
34Uukonzya kugwisya musako wa Leza uundisubula,
uukonzya kuti kandiyoosya.
35Ndendilyo nekonzya kukanana nketamuyoowi,
pele mbuli mbokundibedelede ono nsikonzyi pe.
Currently Selected:
Jobo 9: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
