Jobo 10
10
Jobo
1“Buumi bwangu ndabucimwa, nkaako njoomutongookela,
njookanana mumause aamoyo wangu.
2Njooti kuli Leza, ‘Utandipi mulandu pe,
pele undizibye zyamulandu ngondipede.’
3Sena cilakubotela kundidyaminina,
nikuba kundisampaula ndemulimo wamaanza aako,
akulombozya tukole twababi?
4Sena ulanga mbuli bantu? Sena ulabona mbuli muntu?
5Sena aalo mazuba aako ali mbuli aamuntu?
Sena ayalo myaka yako ili mbuli yamuntu?
6Ulalangaula mulandu wangu akuvuntauzya cibi cangu,
7nikuba kuti ulizi kuti nsijisi mulandu,
alimwi kuti taakwe uukonzya kundivuna kuzwa kuli nduwe?
8Maanza aako ngaakandibumba,
lino wandisandukila akundinyonyoona.
9Koyeeya kuti wakandibumba abulongo.
Sena lino uyanda kundipilusya kulusuko alimwi?
10Tee kayi nduwe ookapa taata nguzu kuti andizyale,
nduwe ookazumizya kuti ndikomene mwida lyabaama?
11Wakandisamika lukanda anyama,
wakaswaanya zifuwa zyangu abuzingo.
12Wakandipa buumi aluyando lupati,
wakandikwabilila kabotu kuti ndibe aabuumi.
13Ani kuti zyoonse eezi wakazisisa mumoyo wako,
lino ndaziba kuti ooyu ngowakali ngomuyeeyo wako.
14Wakali kundilangisisya kuti inga ndabisya.
Okali kuti utalekeleli kulubizya kwangu.
15Kuti wandijanina kaambo maawe ndapenga!
Nikuba kuti ndiluleme nsikonzyi kusongomeka mutwe wangu,
nkaambo nduuside, akaambo kamapenzi aangu.
16Alimwi kuti ndaliyumya-yumya ulandivwima,
mbuli syuumbwa, ulandipenzya azintu zigambya.
17Ulandiletela bakamboni,
bukali bwako kulindime buya buvula.
Ciindi coonse uyeeya zyakundilwana.
18Ino nkaambo nzi nookati ntumbukwe? Nicakabota kuti nkeli cisowe.
19Nindakazyalwa nkefwide, nindakayobolwa mucuumbwe.
20Sena mazuba aabuumi bwangu taali mace?
Ndileke kutegwa ndijane kulyookezya kuce buyo,
21nkentana ya kutapilukwi, nkentana njila mumudima uutaambaulwi,
22kunyika iisiya mbi iipilingene, kunyina mumuni, mudima walo-walo.”
Currently Selected:
Jobo 10: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
