Jobo 2
2
Saatani mbwaakatepaula Jobo alimwi
1Bumwi buzuba bangelo bakaboola kuzoolitondezya ku Mwami Leza, awalo Saatani wakaza ambabo. 2Aawo Mwami Leza wakati kuli Saatani, “Ani wazwidayi?”
Saatani wakaingula kuti, “Ndalikweendeenda akulingula nyika yoonse.”
3Mpoonya Mwami Leza wakati kuli Saatani, “Sena wamuyeeya muntu wangu Jobo? Unyina kampenda alimwi uliluleme, muntu uukomba Leza akweenguluka bubi muntu uutakwe kampenda uulondokede. Tee ucisyomeka nikuba kuti yebo wakati nkuleke umupenzye kakunyina kaambo.
4“Saatani wakati muntu ulakonzya kupa zyoonse nzyajisi mukuti atasweekelwi buumi naa walo lwakwe mwini tagumwa. 5Nkooko sola kumunyonyoona, ulakusinganya kolimvwidide.”
6Mwami Leza wakaambila Saatani wati, “Mbubo, tulabona, ndamupa mumaanza aako, pele utamunyangi buumi bwakwe.”
7Aboobo Saatani wakazwa ku Mwami Leza wakamuvwambukizya bweele Jobo kuzwa kuzituta kusikila kumutwe. 8Nkabela Jobo wakabweza lukaye kuti kalikwenzya, waakukkalila kubbunta. 9Mukaintu wakwe wakamwaambila kuti, “Eena asunu ucisyomeka? Musinganye Leza ufwe.”
10Jobo wakaingula wati, “Waambaula mbuli mukaintu mufuba-fuba. Eena katutambula buyo zintu zibotu kuzwa kuli Leza kutali mapenzi?” Mumapenzi aaya oonse Jobo taakwe naakabisya pe muli zeezyo nzyaakaamba.
Beenzinyina Jobo
11Lino ba Elifazi Mutemani, Bilidadi Musyuwa a Zofa Munaama, beenzinyina Jobo botatwe, nibakamvwa mapenzi aakasikila Jobo bakapangana ciindi cakuti baboole kuzoomuumbulizya cakweetela. 12Nibakamubona alaale bakeezeezya, nibakamubonesya bakatalika kulila. Bakazapula zyakusama zyabo, akulitila vu kumutwe. 13Mpawo bakakkala ansi anguwe kwamazuba aali ciloba masiku asikati, bakali kwiide kulangana meso taakwe naba omwe wakali kwaambaula, nkaambo bakabona kuti mapenzi aa Jobo akali mapati loko.
Currently Selected:
Jobo 2: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
