Jobo 3
3
Jobo mbwaakatongookela Leza
1Musule aceeci Jobo wakakanana,
wakasinganya buzuba mbwaakazyalwa.
2Wakati,
3“Abusinganyizigwe buzuba mbundakazyalwa,
buzuba mbundakamitwa bulobele limwi.
Alobe masiku aakategwa kwazyalwa mulombe.
4Buzuba oobo bube mbuli mudima buyo,
Leza uuli kujulu atakabuyeeyi limbi.
Nibwatakabona mumuni.
5Nikwakali buyo mudima uuyoosya,
makumbi aasiya mbi kaabuvumbilide, musinze kuubumena.
6Busiku oobo mudima mulemu ubujate.
Butabikkilizigwi mumazuba oonse aamwaka,
butakabalilizigwi mumweelwe wamyezi.
7Iiyi, busiku oobo nibwakabula cintu,
nikwatakamvwingwa jwi lyakukondwa mulimbubo pe.
8Ababusinganye aabo basinganya mazuba,
bakonzya kubusya wabutambo uuli mumaanzi.
9Azyalo nyenyezi zyakubucedo nizyatakazwa mubuzuba oobo,
nilyatakapasula kuti buce mubuzuba oobo pe,
nilyatakapola mubuzuba oobo.
10Nkaambo buzuba oobo tiibwakakasya
kuti ndizyalwe kuti intaboni mapenzi aangu.
11Ino nkaambo nzi nindatakafwa buyo mbundakazyalilwa?
Nkefwide nezwa muli baama?
12Nkaambo nzi ncibakandilelela aamazwi?
Bandilekela kuti nyonke nkolo?
13Nkaambo nindakaba cisowe nindali muluumuno,
nindalilede nkelyookezya,
14antoomwe abami basilubeta baansi,
aabo bakaliyakila masena mapati aakuzikkilwa aakaba tongo.
15Nindalilede abami, balo bakavubide ngolida.
Bakazuzizye maanda ansiliva.
16Ino nkaambo nzi ncindatakasisikizigwa
akuyobolwa mbuli cisowe?
Mbuli kavwanda katabona zuba.
17Bantu babi tabakatazyi bamwi nibali kuzyuumbwe,
bantu bakatede nkobalyookezezye ooko.
18Baange abalo balajana luumuno,
tabamvwi jwi lyamulindizi wantolongo.
19Bantu balemenede abantu buyo bali antoomwe,
ooko muzike ulaangunukide kuli simalelo wakwe.
20Ino nkaambo nzi mumuni ncuusikila muntu uuli mumapenzi,
abuumi ncobusika kuli yooyo uupengede mumoyo?
21Lufu talusiki kuli yooyo uulililaukila,
uuluyandaula mbuli mbono zisisidwe talujani.
22Balilauka balabotelwa kwiindilila akusekelela,
ciindi nibazikkwa mucuumbwe?
23Ino nkaambo nzi mumuni ncuusikila muntu uuli aanzila iisisidwe,
ooyo Leza ngwakwabilide?
24Njide kulya misozi,
kutongela kulapoomoka mbuli maanzi.
25Zintu eezyo nzeyoowa zyandisikila,
eezyo zindizyangamya zyandicitikila.
26Nsiliibide nikuba kulikkalila,
nsilyookezyi naaceya, mapenzi buyo lyoonse.”
Currently Selected:
Jobo 3: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
