Jobo 1
1
Saatani mbwaakasunka Jobo
1Munyika ya Uzi kwakali mwaalumi uutegwa Jobo. Ooyo mwaalumi wakanyina kampenda alimwi wakaliluleme. Kuti eenguluke bubi wakali kukomba Leza. 2Wakajisi bana balombe bali ciloba abana basimbi botatwe. 3Wakalivubide mbelele zili zyuulu zili ciloba, zyuulu zyotatwe zyankamela, zipani zili myaanda yosanwe, ambongolo zili myaanda yosanwe. Kunze aboobo wakalijisi ababelesi banji. Wakali muntu uulaampuwo kubantu bakujwe boonse.
4Bana bakwe balombe bakali kubalana kucita mapobwe mumaanda aabo, bakali kunga balaitilizya abacizi babo botatwe kuzooba ambabo. 5Lino cakali cilengwa ca Jobo kuti pobwe lyamana kaita bana bakwe kuti bazoosalazigwe kweendelana abukombi. Nkabela cifumo-fumo wakali kunga wapa cipaizyo cakutentela omwe-omwe wabana bakwe, kayeeya kuti, “Cimwi ciindi bana bangu babisya akusinganya Leza mumyoyo yabo.”
6Bumwi buzuba bangelo bakaboola kuzoolitondezya ku Mwami Leza, awalo Saatani wakaza ambabo. 7Aawo Mwami Leza wakati kuli Saatani, “Ani wazwidayi?” Saatani wakaingula kuti, “Ndali kweendeenda akulingula nyika yoonse.”
8Mpoonya Mwami Leza wakati kuli Saatani, “Sena wamuyeeya muntu wangu Jobo? Unyina kampenda alimwi uliluleme, muntu uukomba Leza akweenguluka bubi. Muntu uutakwe kampenda uulondokede.”
9Saatani wakaingula Mwami Leza wati, “Sena ukukomba cabuyo Jobo? 10Tee uli mukwabililide walo lwakwe mwini, kubikkilizya baŋanda azyoonse nzyajisi? Nzyacita zilazwidilila cakuti matanga aakwe amwaikide buyo mbocili cisi. 11Nkooko sola kumunyanga nzyajisi, ulakusinganya kolimvwidide.”
12Eelyo Mwami Leza wakaambila Saatani kuti, “Mbubo tulabona, zyoonse Jobo nzyajisi ndazipa mumaanza aako, pele lwakwe mwini utamucisi pe.” Aawo Saatani wakazwa ku Mwami Leza.
Bana alubono lwa Jobo zyanyonyoonwa
13Bumwi buzuba bana balombe ba Jobo abacizi babo nibakali kulya pobwe muŋanda yamupati wabo, 14kwakaboola mutumwa kuli Jobo kuzooti, “Nitwali kulima mbongolo zyakucela aafwiifwi. 15Eelyo Basabeya bavumpa akuzitola. Bajaya babelesi apanga, ndime endikke ndatija akuzookwaambila cacitika.”
16Kacaambaula aumbi mutumwa wakasika wazooti, “Lulabo lwa Leza lwaumpa mbelele ababelesi, ndime endikke ndatija akuzookwaambila.”
17Kacaambaula aumwi mutumwa wakasika akuti, “Bakalodi bavumpa ampi zyotatwe batola nkamela. Bajaya babelesi apanga, ndime endikke ndatija kuzookwaambila.”
18Awalo ooyu kacaambaula kwakasika aumbi akuti, “Bana bako abacizi babo bali kulya pobwe muŋanda yamupati wabo, 19mpoonya kwasika guwo kuzwa kunkanda lyabbubbwida ŋanda mubabede aawo, yooleka, yabalimba, ndime endikke ndatija akuzookwaambila.”
20Jobo wakanyamuka wazapula cakusama cakwe walinyoola kumutwe, mpoonya wakaliwaala ansi wakomba wati, 21“Ndakazwa mwida lyabaama acintanda, alimwi acintanda njoofwa. Mwami Leza nguwakandipa alimwi ngonguwe wandinyanga. Alilumbaizigwe zina lya Mwami Leza.”
22Mumapenzi aaya oonse Jobo taakwe naakabisya nikuba kumutongookela Leza pe.
Currently Selected:
Jobo 1: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
