Babetesi 16

Samusoni mbwaakainka ku Gaza

1Bumwi buzuba Samusoni wakaya ku Gaza, ooko wakaakubona mwaamu, wakaswaangana anguwe. 2Eelyo baku Gaza bakaambilwa kuti, “Samusoni nkwali kuno. Mpawo busena oobo bakabooba bakamulindilila masiku oonse kumulyango mupati wamunzi.” Bakaluumwide masiku oonse kabayeeya buyo kuti, “Bwaca tulamujaya.” 3Nkabela Samusoni wakalede buyo kusikila aakati kabusiku eelyo wakabuka, wakajata zitendele zyamunzi, wanonkolezya azicinda, wakazyulilizya amabwe wazikulika, waakutanta aazyo atala aacilundu cilangene a Hebuloni.

Samusoni a Delila

4Lino kusule lyayaaya, Samusoni wakayanda mukaintu wakali kuzwa mukkuti lyaku Soleki, zina lyakwe Delila. 5Eelyo bami ba Bafilisiti bakaza kumukaintu ooyo akuti kulinguwe, “Komoongelezya, ubone na nguzu zyakwe zizwa kuli, alimwi tuzibe na inga twamuzunda buti, kutegwa tumwaange akumupenzya. Wacita oobo, omwe-omwe wesu uyookupa mali aansiliva aali cuulu amwaanda.”

6Delila wakaakuti kuli Samusoni, “Kondaambila ino nguzu zyako mpati zili boobu zizwa kuli? Naa muntu wayanda kukuzunda inga wakwaanga buti?” 7Samusoni wakamwaambila kuti, “Kuti naa bandaanga makole mapya aali ciloba aatanayuma, inga ndabula nguzu ndaba buyo mbuli bantu bamwi.”

8Bamvwe boobo bamwi ba Bafilisiti bakaletela Delila makole mapya aali ciloba aatanayuma, wakamwaanga angawo. 9Lino basikulindila bakaliyubide muŋanda. Mpawo wakati, “Bafilisiti bakuzida Samusoni!” Avundumuke wakadunsaula makole mbuli kuti nintali zipide amulilo. Maseseke aanguzu zyakwe taakayubunuka pe.

10Mpawo Delila wakaambila Samusoni kuti, “Bona, wandicenga wandaambila zyakubeja. Akaka kondaambila mboangwa.” 11Samusoni wakati kuli nguwe, “Kuti naa bandaanzya makole mapya aatana belesegwa, njoobula nguzu mbuli bantu bamwi.” 12Nkaako Delila wakabweza makole mapya akumwaanga angawo, wakati kuli nguwe, “Samusoni, bakuzida Bafilisiti!” Nkabela bantu aabo bakali yubide muŋanda. Pele wakadunsaula makole aayo ngaakaangizidwe kumaboko mbuli kuti nintali buyo.

13Lino Delila wakati kuli Samusoni, “Aono wandicenga kale, wandaambila zyakubeja. Akaka kondaambila mboangwa.” Samusoni wakamwaambila kuti, “Kuti naa mwandiluka zimpuma zili ciloba zyamasusu akanyandi akwaanga atumanzyo, inga ndabula nguzu akuba mbuli bantu bamwi.” 14Samusoni kalede, Delila wakaluka zimpuma zili ciloba, akanyandi, wazinyonesya amane wazyaanga atumanzyo. Ucimana wakati kuli nguwe, “Samusoni, bakuzida Bafilisiti!” Pele naakasinsimuka, wakadabaula tumanzyo akanyandi, wapombolola.

15Mpoonya Delila wakaambila Samusoni kuti, “Ino undiyanda buti koli ulandicenga? Wandicenga ziindi zyotatwe eezi. Kondaambila kuti naa nguzu zyako zizwida kuli?” 16Nkabela naakali kumukatazya buzuba abuzuba, akumoongelezya, limwi wakalenguka moyo. 17Wakaambila mukaintu maseseke woonse wakati, “Taakwe nindakageledwe mbwindakali kuba, nkaambo ndi Munazili uupedwe kuli Leza. Kuti naa ndagelwa, nguzu zyangu zilamana, njooba mbuli bantu boonse.”

18Lino Delila naakabona kuti wamwaambila maseseke oonse wakatumya kubami ba Bafilisiti wati, “Kamuboola ono twamweenzya wandaambila masimpe aamaseseke.” Mpawo bami ba Bafilisiti bakasika kumukaintu akuletelezya mali. 19Wakamubutika azibelo, amane wakaita muntu kuzoomugela zimpuma zili ciloba. Eelyo wakatalika kumusinsa, nkaambo wakacinyina nguzu. 20Mpoonya wakati, “Samusoni, bakuzida Bafilisiti!” Naakasinsimuka wakati, “Pe, njaanze nkalyoolole mbuli lyoonse.” Pele taakazi kuti Leza wakamusiya. 21Bafilisiti bakamujata akumutulaula meso. Bakamutola ku Gaza, bakamwaanga anketani zyamukuba, alimwi wakali kuziya muntolongo. 22Ciindi eeco masusu akalitalikide kulampa alimwi.

Lufu lwa Samusoni

23Lino bami ba Bafilisiti bakabungana antoomwe kuti basekelele akupaizya kuli Dagoni leza wabo, nkaambo bakati, “Kayi tee ngu leza wesu waaba Samusoni kuli ndiswe.” 24Bantu nibakabona Samusoni bakalumbaizya leza wabo bati, “Leza wesu waaba sinkondoma kuli ndiswe, wakanyonyoona cisi cesu, wakajaya bamwi besu banji-banji.” 25Lino nibakacikondedwe bakati, “Amukalete Samusoni, azootusobanine.” Aboobo Samusoni wakaletwa kuzwa muntolongo, wazoobasobanina. Bakamwiimika akati kamisemo yobilo, 26nkabela Samusoni wakaambila mulombe wakali kumujatilila kuti, “Mbuti ndaampe misemo iijisilizi ŋanda kuti ndiyaame.” 27Ŋanda eeyo yakalizwide bantu, baalumi abakaintu abami boonse ba Bafilisiti bakali mumo, alimwi atala aaŋanda kwakali baalumi abakaintu bakati sike kuzyuulu zyotatwe bakali kweebela ciindi Samusoni kasobana.

28Mpawo Samusoni wakakomba Mwami Leza wati, “O Mwami Leza wangu, ndakukumbila, ndiyumye, kwalino buyo kuti mbweedezye bubi ku Bafilisiti bakanditulaula meso.” 29Nkabela Samusoni wakajata misemo yobilo eeyo, watonka anguzu, janza lyalulyo kuluumwi alyalumwensyi aluumbi. 30Mpoonya wakati, “Andifwe antoomwe a Bafilisiti.” Mpoonya wakatonka anguzu zyoonse, ŋanda eeyo yakooleka akulimba bami abantu boonse bakali mumo. Aboobo bantu mbaakajaya naakafwidilizya bakali banji kwiinda mbaakajaya kacipona. 31Eelyo bamukowa ababunyina boonse bakaboola kuzoomubweza baakumuzikka akati ka Zola a Esyitawoli mucuumbwe ca Manowa wisi. Samusoni wakabeteka Baisilayeli kwamyaka iili makumi obilo.

Currently Selected:

Babetesi 16: Tonga96

Highlight

Copy

Compare