Babetesi 17
17
Zyamituni ya Mika
1Lino kwakali muntu umwi wakali kukkala munyika yatulundu-lundu ya Efulemu zina lyakwe Mika. 2Ooyu wakaambila banyina kuti, “Mali aalya aansiliva aali myaanda iili kkumi aumwi aakabbigwa, mucimana mwakasinganya mubbi nkemvwide, ngaaya ndaajisi ndime ndakaatolede.”
3Banyina bakati, “Mwami Leza akuleleke mwanaangu.” Eelyo mali oonse aaya wakaabweedezya kuli banyina, balo bakati, “Mukuti mwanaangu atasinganyizigwi mali aaya ndaapa ku Mwami Leza. Mwanaangu afule akubumba mutuni, nkaako ngaaya ndaapa kuli nduwe.” 4Kuzwa kumali aayo ngaakapilusizye kuli banyina, banyina bakagwisya mali aali myaanda yobilo, baakupa mufuzi, walo wakaafula mutuni, akubumba aumwi mutuni, mituni eeyi yakabikkwa mwa Mika.
5Lino Mika wakalijisi kapaililo kakwe mwini alimwi wakapanga akabaki kabupaizi kaefodi amituni imwi, amane wakabikka umwi wabana bakwe kuti abe mupaizi. 6Mazuba aayo kwakanyina mwami mu Isilayeli pe, umwi aumwi wakali kulicitila mbwayanda mwini.
7Lino kwakali mukubusi Mulevi wakali kuzwa ku Betelehemu mucisi ca Juda. 8Nkabela muntu ooyu wakali kuyabuyandaula busena bwakuyakila. Lino kayabweendeenda wakasika kucisi ca Tulundu-lundu ca Efulemu kuŋanda ya Mika. 9Mika wakamubuzya kuti, “Ino wazwidayi?”
Wakati, “Ndili Mulevi ndazwida ku Betelehemu mucisi ca Juda, nja buyandaula busena bwakuyakila.”
10Mika wakamwaambila kuti, “Kkala andime, ube mulailili amupaizi wangu. Ndinookubbadela kkumi lyamali aansiliva amwaka, antoomwe azisani azyakulya.” 11Mpawo Mulevi ooyo wakazumina kukkala anguwe, nkabela wakalelwa mbuli umwi wabana ba Mika. 12Mika wakamubikka kuba mupaizi wakwe kakkala muŋanda yakwe. 13Mika wakati, “Lino mbwindajana Mulevi mupaizi ndaziba kuti Mwami Leza ulandileleka.”
Currently Selected:
Babetesi 17: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
