Babetesi 15

Samusoni mbwaakabweedezezya Bafilisiti

1Nikwakainda kaindi, litebulwa maila Samusoni wakainka akapongo kuyooswaya mukaintu wakwe wakati, “Njandoonjila muŋanda muli mukaintu wangu.” Pele wisi wakamukasya. 2Wakati, “Ndakabona kuti toyandi, nkaako ndakamukwasya kumweenzinyoko. Ino mbuti musyoonto wakwe tee mubotu kwiinda nguwe? Kwata nguwe.”

3Samusoni wakati, “Ciindi cino mutandaambi bubi ndababweedezezya bubi Bafilisiti.” 4Azwe waawo Samusoni wakainka kuyoojata bamwaaba myaanda yotatwe, eelyo wakabaanga bobilo-bobilo kumicila atunzenge. 5Naakamana kudomeka tunzenge, wakabalekezya bainka mumaila aakaciimvwi aa Bafilisiti. Baakutenta tulwi-tulwi twakaimvwi, amyuunda yamicelo yoonse yakapya.

6Mpoonya Bafilisiti bakabuzya kuti, “Ino nguni wacita boobu? ‘Bakamvwa kuti ngu Samusoni mukwe wayooyo waku Timuna, nkaambo wakakwasya muka Samusoni kumuntu uumbi wakali mweenzinyina.’” Aboobo Bafilisiti bakanyamuka akuyoomutentela muŋanda mukaintu ooyu awisi.

7Lino Samusoni wakati kulimbabo, “Mbumwacita boobu, njoomupilusizya bubi bwanu! 8Eelyo wakabalwana canguzu akujaya banji. Kumane wakaselela akuyookkala kujeleele lyaku Itamu.”

9Lino kwakasika Bafilisiti, bakayaka zivuka zyabo mucisi ca Juda akuyoosaala munzi wa Lehi. 10Baku Juda bakababuzya kuti, “Ino mutulwanina nzi?” Bakaingula kuti, “Twaboola kuzooanga Samusoni, tumucite awalo mbubonya mbuli mbwaakatucita aswebo.”

11Eelyo bantu bali zyuulu zyotatwe bakucisi ca Juda bakaya kujeleele lyaku Itamu, baakwaambila Samusoni kuti, “Sena tozi kuti Bafilisiti mbeendelezi besu? Ino ncinzi eeci ncootweetela?” Walo wakabaambila kuti, “Ncibakandicita, ncindakabacita ambebo.” 12Bakamwaambila kuti, “Twaboolela kukwaanga kuti tukupe ku Bafilisiti.” Samusoni wakabaambila kuti, “Amusyomezye kuti tamulindinywe nomutindijaye.” 13Balo bakati kulinguwe, “Peepe, tulakwaanga buyo akukupa kulimbabo, tatukookujaya pe.” Aawo bakamwaanga amakole mapya obilo bamugwisya mujeleele.

14Nibakamusisya ku Leni, Bafilisiti bakazwa bamukwaapula mpawo muuya wa Mwami Leza wakamusikila canguzu, eelyo wakabbansaula makole ngaakaangidwe mbuli ntali yapya mulilo. 15Mpoonya wakabweza mweebo wambongolo uucili muyumu, wajaya bantu bali cuulu anguwo. 16Amane Samusoni wakaimba kati,

“Amweebo wambongolo ndajaya milwi-milwi yabantu,

Amweebo wambongolo ndajaya bantu bali cuulu.”

17Naakamana kwiimba, wakasowa mweebo. Nkabela busena oobo wakabwiita kuti Cilundu Camweebo.

18Lino Samusoni wakafwa nyota, aboobo wakalilila Mwami Leza wakati, “Wakandizundya kapati ndemubelesi wako, sena ono ndigonkelwe anyota akujatwa batakuzi aaba Bafilisiti. 19Mpawo Mwami Leza wakabbobola ansi ku Lehi, eelyo kwakazwa maanzi, Samusoni naakanywa wakayuma. Nkaako oobo busena bakabwiita kuti Enihakkole nkokuti Mukalo wasikwiita, nkuucili asunu ku Lehi. 20Nkabela Samusoni wakabeteka Baisilayeli kwamyaka iili makumi obilo mumazuba a Bafilisiti.”

Currently Selected:

Babetesi 15: Tonga96

Highlight

Copy

Compare