Izaya 28

Bwami bwakunyika mbubwakacenjezegwa

1Maawe kubwami bwabakolwi baku Efulemu! Maawe kubalemenede bawo balo babbuluka mbuli maluba-luba. Munzi uuli kutala lyakkuti lyambolezi lyamisaansa zyakupanzya waini uubakola. 2Amubone Mwami Leza wabona kale muntu umwi muyumu, singuzu. Uyooboola mbuli civulamabwe, mbuli guwo lityoloola, mbuli mulonga uuzwide cakufwasuka uukunkisya, uyoonyonyoona cisi cabo. 3Kulisumpula kwabasololi bakolwi kuyoolyataulwa kunsi aamaulu. 4Bulemu bwabo bwabbuluka mbuli maluba-luba, munzi uuli kutala lyakkuti lyambolezi, uyoomana mbuli nkuyu ntaanzi kubizwa, bantu balazicela akuzilya mbuzyabizilwa buyo. 5Mubuzuba oobo Mwami Leza Singuzuzyoonse uuyooba mbuli musini wabulemu, maluba-luba aaebeka kubantu bakwe basyeede. 6Uyoobapa babetesi maanu aakubeteka buluzi akupa camba kuli baabo balindilila milyango yamunzi.

Izaya abasinsimi bakolwi bamu Juda

7Alimwi abalo aaba baladadalika akaambo kawaini akuzeeleka akaambo kabukoko. Bapaizi abasinsimi baladadalika akaambo kabukoko, waini wabanzinzilisya, balazeeleka akaambo kabukoko, basinsimi tabamvwisyi zilengaano akaambo kakukolwa, tabakosoli bweelede twaambo ntobaletelwa. 8Matebule ngobabelesya oonse abijide malusi, taakwe aatalibonyi kubija ooku pe. 9“Ino usoleka kwiisya bani? Ino mbaani mbalungulwida makani? Sena twaba balesi aabo bakaleka onoono kunyonka? 10Usoleka kutwiisya asyoonto-syoonto, ijwi ajwi, muzila amuzila, ciiyo aciiyo. Moonse oomu ulati, ‘Aawa awaawa.’” 11Kuti naa tamundiswiilili, ncobeni Leza uyoobelesya bazwamasi baambaula musyobo uumbi-umbi kuti bazoomwiisye. 12Mbambabo mbaakaambila kuti, “Oobu mbusena bwakulyookezezya, aabo bakatede abalyookezye, mboobu busena bwakulyookezezya, pele balo tiibakaswiilila.” 13Nkaako majwi aa Mwami Leza ayooba aakuti, “Asyoonto-syoonto, ijwi ajwi, muzila amuzila, Ciiyo aciiyo. Moonse oomu ulati aawa, awaawa, kutegwa bakawe busaleme, bakacisigwe akujatwa.”

Ibbwe lyacooko lya Ziyoni

14Lino amuswiilile nywebo nobantu basikantu-kantu, nomulela bantu omuno mu Jelusalemu. 15Mulalisumpula mulati, “Twakapangana cizuminano alufu, tatuyoowi cuumbwe. Mapenzi aakuboola taakoozootuguma, mukuti kubeja caba citijilo cesu, bubeji bwaba ciyubilo cesu.” 16Lino mboobu mbwaamba Mwami Leza, “Amubone ndabikka mu Ziyoni bbwe jumu, bbwe lyacooko bbotu kuti libe lyantalisyo njumu, ooyo uusyoma takatyompwi. 17Buluzi buyooba nentambo yakupimya, bululami buyooba nceceelesyo. Maanzi acivulamabwe ayookukula matijilo aanu, nkokuti kubeja kwanu, maanzi avumpa mayubilo aanu. 18Cipangano canu alufu eeci ciyooba cabuyo, cizuminano canu acuumbwe tacikamugwasyi. Mapenzi aakuboola ayoomusikila anywebo. 19Kufumbwa mapenzi anooboola anoomukukulizya, cifumo-fumo, sikati asikati, masiku amasiku anoomukukulizya. Mwaakumvwa makani aaya muyooyoowa.” 20Bulo mbufwiifwi cakuti tamukonzyi kulyoolweda mpawo, ayalo ngubo ninsyoonto cakuti tamukonzyi kulivungaila. 21Mwami Leza uyoonyamuka mbuli mbwaakacita acilundu ca Pelazimu, uyoonyamuka mbuli mbwaakacita kukkuti lya Gibiyoni, kuti acite mulimo wakwe, mulimo uutanabwenwe, mulimo mupya, mulimo uumbi-umbi. 22Lino amuleke kusampaula kwanu, mwatacita boobo mulaangwa anketani ndemu, Mwami, Mwami Leza Singuzuzyoonse wandaambila zyakunyonyoonwa kwanyika yoonse.

Busongo bwa Leza

23Amuswiilile mumvwe jwi lyangu, amuteye matwi mumvwe nzendaamba. 24Ciindi mulimi nalima kuti alibambilile kusyanga sena inga wiide kulima ciindi coonse? Sena inga wiide kupandaula akupwasyaula makomwe? 25Namana kupwayaula makomwe, sena tasyangi mbuto yamabele akuminza mbuto yabwengo? Sena tasyangi maila mwaaelede, bulotwe mumuunda wabo, amaila muceme mumuunda wawo? 26Leza wakwe ulamulailila, ulamwiisya nzila mbotu. 27Mabele taapolwa cilayi, nociba cikwiliba kupola kumini, mabele apolwa aacisako, kumini upolwa aakasako. 28Kuti koyanda kupanga cinkwa weelede kuziya maila, caamba kuti topoli maila mane kusikila apandauke. Nikuba kuti wainzya cikwiliba amaila aayo, mabbiza aakwela cikwiliba taakaapandauli pe. 29Zyoonse eezi zizwa ku Mwami Leza Singuzuzyoonse, uugambya mukulailila kwakwe, ulagambya mubusongo bwakwe.

Currently Selected:

Izaya 28: Tonga96

Highlight

Copy