Izaya 27

Muunda wamisaansa wa Mwami Leza

1Mubuzuba oobo, Mwami Leza uyoosubula apanga lyakwe, uyoobelesya panga pati jumu mubukali bwakwe, kuti ajaye citowe, nzoka iitija, citowe nzoka iilizingaila, uyoojaya cimpangaliko camumaanzi. 2Mubuzuba oobo mukaimbe nyimbo zyamuunda wamusaansa wakazyalisya, 3mebo nde Mwami Leza nduulanga nduutilila lyoonse. Nduucingilila sikati amasiku kutegwa kubule muntu uuunyonganya. 4Nsinyemede. Nicabota nikwali kuti kuli masonso naa mamvwa aandisinkilide, nindaagonkoola akwaatenta oonse. 5Kwataba boobo aaboole kulindime azookwabililwe, iiyi, aaboole kulindime tuyanzane. 6Mumazuba aaboola Jakobo uyoosimpa miyanda, Isilayeli uyoosyuuka akulangazya, nyika yoonse iyoozula micelo. 7Sena Mwami Leza wakasubula Baisilayeli mbuli mbwaakasubula basinkondonyina? Sena Baisilayeli bajaigwa mbuli bwakajaigwa basinkondonyina? 8Mwami Leza wakasubula bantu bakwe kwiindila mukubalekela mubwaange. Wakabalekela kuti batolwe aguwo kkali lizwida kujwe. 9Zibi zya Baisilayeli ziyoolekelelwa buyo kuti naa bapwayaula zipaililo zyamabwe zya Asyela mane zyaba mbuli mulambo, akuti mituni yaleza mukaintu Asyela noziba zipaililo zyatununkilizyo zyoonse bazimwaya. 10Munzi uukwabilidwe waba tongo, ooko kucelela boombe, nkobabutila, balanumpula matu mitabi iisyaala buyo mbuboobu. 11Tutabi-tabi twayuma, tulatyolwa, bamakaintu ntobakutuzya mulilo. Nkaambo mmbantu batamvwisyi zintu, nkaako wakababumba takabeengeleli pe, mulengi wabo takabafwidi luzyalo.

12Mubuzuba oobo Mwami Leza uyooboozya bantu bakwe kutalikila kumulonga wa Yufuletisi kuyoosika kukalonga ka Ijipiti. Uyoobabunganya omwe-omwe.

13Mubuzuba oobo mweembo mupati uyoolila. Aabo bakatimane mu Asiliya abaabo bakali mubwaange mu Ijipiti bayooboola akuzookomba Mwami Leza acilundu cisalala eeci ca Jelusalemu.

Currently Selected:

Izaya 27: Tonga96

Highlight

Copy