Izaya 29

Mapenzi aaboolela munzi wa Jelusalemu

1Maawe kulinduwe omunzi wacipaililo ca Leza, munzi ooyo Devedi mwaakakkede. Kwasyaala buyo mwaka womwe naa yobilo kocilya mapobwe. 2Nikuba boobo njoosinkilizya munzi wa Aliyeli, uyoolila akweema, munzi uyooba mbuli nkanzo yacipaililo. 3Yebo omunzi njooyaka zivuka cakukuzinguluka, njoozingulusya maanda malamfu aakusompelela, ndiyooyaka zitantaala zyakusinkilizizya. 4Waakuzundwa uyookanana kuzwa muvu, uyoopetekezya kuzwa mulusuko. Ijwi lyako liyoomvwigwa mbuli citowe muvu, uyoopetekezya kuzwa muvu. 5Pele basinkondonyoko banji bayooba mbuli kobbo-kobbo lyavu, makamu-makamu aabacete ayooululuka mbuli bungu. Cakufwambaana, mukaindi kaniini buyo, 6Mwami Leza Singuzuzyoonse uyooboola amabbalu-bbalu, mukuzungaana kwanyika, muzunzumina mupati, bbubbula aguwo pati abbalabala lyamulilo uusyukuta. 7Makamu-makamu aamisyobo yoonse aayo aalwana munzi wacipaililo ca Leza akupwaya mayubilo aawo akuusinkilizya, ayooba mbuli uulota buyo abona cilengaano masiku. 8Mbuli muntu uufwide nzala nalota kulya, ulasinsimuka pele ucifwide nzala, naa mbuli muntu uufwide nyota nalota kunywa maanzi, ulasinsimuka pele ucifwide nyota. Mbombubo mbociyooba kumakamu-makamu aamisyobo eeyo iilwana cilundu ca Ziyoni.

Taakwe uuswiilila kucenjezegwa

9Amwiindilizye mukufubaala kwanu! Kamoofweede kuti mutaboni, amukolwe kutali kukolwa waini, kamuzeeleka kutali kuti mukolwe bukoko. 10Mwami Leza wamuletela ŋonzi zinji, wajala meso aanu, mwabula basinsimi, wamuvumba mitwe yanu, mwabula mulangi. 11Cilengaano coonse eeci cimubedelede mbuli majwi buyo aabbuku linamatidwe. Kuti naa mukape umwi akuti, “Bala eeci musa,” uyooingula kuti, “Nsikonzyi pe, lilinamatikidwe.” 12Naa mukape umwi uutakonzyi kubala bbuku eelyo mukati, “Bala eeci musa,” uyooingula kuti, “Nsizi kubala pe.” 13Mwami Leza uyooti, “Bantu aaba balaswena afwiifwi andime amilomo yabo, akundilemeka amilomo yabo, pele myoyo yabo iili kule andime kundikomba nkobakomba nkwamilawo iiisya bantu, balo bazumina buyo. 14Nkaako bantu aaba ndiyoobagambya alimwi, ndiyoocita zigambya, ziyoobagambya ncobeni, busongo bwabasongo buyoobamanina, bucenjezu bwabacenjede buyoozimaana.”

Lulangilo lwaciindi ciboola

15Maawe kubantu basisa makanze aamiyeeyo yabo kuzwa ku Mwami Leza, aabo bacita milimo yabo mumudima bayeeya kuti, “Ino nguni uunga watubona? Nguni uunga waziba?” 16Mupilinganya zintu zyoonse, muyeeya kuti mubumbi uleelene abulongo. Sena inga cintu cakabumbwa cakonzya kwaambila yooyo wakacibumba kuti, “Enduwe wakandibumba pe?” Sena cibiya cilakonzya kwaambila mubumbi waco kuti, “Taakwe ancozi pe?” 17Muciindi cisyoonto, Lebanoni iiyoosandulwa kuba muunda wambolezi, awalo muunda wambolezi uyooba cisaka. 18Mubuzuba oobo musinkematwi uyoomvwa majwi aamubbuku, mumudima uusiya mbi moofu uyookonzya kubona. 19Babombe myoyo bayoosekelela mu Mwami Leza alimwi. Babulide bayoosekelela muli Uusalala wa Isilayeli. 20Bateeteleli bayooloba, basampaula bayoozimaana, boonse bamucita zibi bayoonyonyoonwa. 21Boonse aabo bamvwiya bantunyina aabo bapingilila bavuna munkuta, bamvwa bumboni bwakubeja akupezya milandu bantu batakwe milandu. 22Nkaako mboobu mbwaamba Mwami Leza ooyo wakanununa Abulahamu, kuli balunyungu lwa Jakobo, “Jakobo taakwe nayoousigwa nsoni alimwi, taakwe nayoobijilwa. 23Baakubona bana aabo mbenjoobapa, bayooziba zina lyangu lisalala bayooziba bulondosi bwa Uusalala wa Jakobo, bayooyoowa Leza wa Isilayeli. 24Aabo bafuba-fuba basweekede bayoomvwisya zintu, aabo batongooka bayoozumina kwiisigwa.”

Currently Selected:

Izaya 29: Tonga96

Highlight

Copy