Milimo 27

Paulu mbwaakainka ku Loma

1Lino nicakayeeyegwa kuti tweelede kweenda abwato kuya kucisi ca Itali, Paulu antoomwe abasintolongo bamwi bakapegwa mumaanza aamuntu uutegwa Juliyasi. Ooyu wakali mupati wankamu yalumamba lwa Baloma iitegwa “Basilumamba bamuleli mupati.” 2Twakanjila mubwato bwakazwida ku Adilamitiyamu oobo bwakali bambilide kale kuti bweende akuyooinda muzito zyacisi ca Asiya. Awalo Alisitakosi uuzwa kumunzi wa Tesalonika uuli mucisi ca Masedoniya, wakainka andiswe. 3Nkabela buzuba bwakatobela twakasika ku Sidoni. Lino Juliyasi wakali muntu uulaaluzyalo kuli Paulu, wakamulekela kuti anjile mumunzi kubona balongwe bakwe kuti bamugwasye zimwi zintu nzyaakabulide. 4Kuzwa kooko twakaindila kunyika lyansumbu ya Saipulasi nkaambo kaguwo lyakali kubbubbwida kuli ndiswe. 5Twakazubuka lwizi lubambene azisi zya Silisiya a Pamfiliya, twakasika ku Mayila, mucisi ca Lisiya. 6Ooko mupati walumamba wakajana bwato bwakali kuzwida kumunzi wa Alekizandaliya kuya ku Itali, nkabela wakatunjizya mulimbubo.

7Akaambo kaguwo lyakali kubbubbwida kuli ndiswe, twakali kukonzya buyo kweenda buniini-niini mane kumamanino twakaakusika kufwiifwi amunzi wa Sinidusi. Lino nkaambo kaguwo lyakaindilila, twakainda kulubazu nkoyakali kukonzya kutusutilila nsumbu ya Kiliti, twaakwiinda kumbali a Salimone. 8Twakabembeleka nkomwe yalwizi, nikuba kuti twakajana mapenzi mukweenda, eelyo twakasika kubusena butegwa Zito Zibotu, munsi amunzi wa Laseya.

9Twakakkala ciindi cilamfu ooko mane ciindi cakuliimya kulya cakainda. Ciindi eeco cakalibonya kuti cilatuletela ntenda kweenda abwato. Aboobo Paulu wakabacenjezya bantu kuti, 10“Nobaalumi, ndabona kuti lweendo lwesu kuzwa aano kuya kumbele lulaba lwantenda. Lubono lunji lulanyonyooka alimwi abwato, cimwi ciindi inga abantu balafwa.” 11Pele mupati walumamba wakazumina zyakaamba mupati wabwato amukamwini kwiinda nzyakamwaambila Paulu. 12Cito eeco tiicakali cibotu kukkala ciindi camupeyo, aboobo bantu banji bakali mulweendo oolo bakacili kuyanda kuti kabaciya kumbele mulwizi kutegwa naa kwakonzeka bakasike kucito ca Finikisi. Eeco ncito cili munsumbu ya Kiliti cilangide kumusanza-lwaambo akunyika-lwaambo, nkabela bakali kuyanda kuyookkalila nkuko muciindi camupeyo.

Iguwo mulwizi

13Lino kwakaunga luuwo lwakazwida kumusanza, lwakali kuunga buniini buyo, aboobo baalumi bakayeeya kuti bacite buyo mbuli mbobakali kuyanda. Eelyo bakabwaangununa bwato kuti butalike kweenda, lino bakabembeleka nkomwe ya Kiliti. 14Pele mpoonya-mpoonya buyo kwakatalika kubbubbula guwo pati lyakali kutegwa “Lyakunyika-lwaajwe” lyakali kubbubbula kuzwida kunsumbu. 15Mayuwe aaguwo akauma bwato. Mbuli mbocatakali kukonzeka kuti bwato bweende kabugama kuzwida guwo, twakalekela bwato kuti buunke buyo ooko nkolyakali kugama guwo. 16Twakaakusitililwa akasumba kaniini kategwa kilauda notwakaindila nkokali kumusanza. Lino ooko, mukati kamapenzi, twakakonzya kukaanga kato kaangililwa kubwato nkobuli musule. 17Nkabela bakakakwelela mukati, eelyo bakazambaila bwato amatambo. Bakaliyoowede kuti inga balapatila muntimba yakumbali kunkomwe yacisi ca Libya. Bakavunga masani aaenzya bwato akulekela bwato kutolwa aguwo. 18Pele guwo taakwe nilyakaleka kubbubbula pe, eelyo nibwakaca bakatalika kugwisya lubono ndubakayumwide akulusowela mumaanzi. 19Buzuba bwakatobela bakagwisya zibelesyo zyamubwato bazisowela mumaanzi. 20Mazuba manji tiitwakali kukonzya kubona zuba niziba nyenyezi guwo lyakacili kubbubbulisya kapati. Kumamanino, alulangilo lwakuti tulafutuka, lwakamana. 21Nikwakainda ciindi cilamfu, bantu kabatalyi cakulya, Paulu wakaima akati kabo akubasinsa kuti, “Nobaalumi, mwakali kweelede kundiswiilila akutazwa kusiya Kiliti, lino zyoonse eezi zyakunyonyookelwa akusweekelwa nizyataliwo pe. 22Pele lino ndamukumbila kuti, mukkazike myoyo nkaambo taakwe naba omwe muntu uutifwe, bwato buyo bulikke mbobutinyonyooke. 23Nkaambo masiku aainda aaya mungelo uuzwa kuli Leza wangu ooyo ngwenkomba walisikide. 24Wandaambila kuti, ‘Paulu, utayoowi! Nkaambo uleelede kuyooima kumbele lya Muleli Mupati waku Loma. Leza mububotu bwakwe, wakupa buumi bwabaabo boonse mbomuli aabo mulweendo oolu.’ 25Nkaako nobaalumi, amukkalwe myoyo! Nkaambo ndisyoma Leza kuti zyoonse nzyaandaambila ziyoocitika. 26Tuyoosowelwa ankomwe yansumbu imwi.”

27Oobu bwakali mbobusiku bwakumana mazuba aali kkumi aane, twakacili kuya butontaikwa aguwo mulwizi lwa Adiliya. Lino akati kabusiku, basikweenzya bwato bakayeeya kuti twakali kuya buswena kufwiifwi anyika. 28Aboobo bakalosya ntambo mumaanzi yakaangilidwe cintu cilemu kumpela, kuti beeleke bulamfu bwamaanzi. Bakajana kuti akali kulampa tukokola tuli mwaanda amakumi obilo. Nkabela bakeenda buniini, eelyo bakeeleka alimwi, bakajana bulamfu bwatukokola tuli makumi aali fuka. 29Lino bakayoowa kuti bwato inga bwainka mumabwe, nkabela bakalosya zijatyo zyabwato zyone kusule lyabwato, batalika akukomba kuti cibota bwaca. 30Basikweenzya bwato bakasoleka kuti bazwe mubwato, bakalosya kato mumaanzi, bakacita mbuli kuti baya kukulosya zijatyo zyabwato zyakumbele. 31Pele Paulu wakaambila mupati wabasilumamba alimwi abasilumamba beni kuti, “Kuti aaba basikweenzya bwato bazwe muno tamukoofutuka pe.” 32Aboobo basilumamba bakakosola ntambo zyakajisi kato akukalekela kuti kainke. 33Nkabela nibwakayanda kuca, Paulu wakabakumbila boonse kuti balye zyakulya. Wakati, “Mwalindila mazuba aali kkumi aane, ciindi coonse eeci taakwe kantu komwakalya pe. 34Nkaako ndamukumbila lino kuti amulye, muleelede kulya kutegwa mujane nguzu. Taakwe akomwe kasusu kalaamitwe yanu kati kasweeke pe.” 35Mbwaakamanina kwaamba oobo, Paulu wakabweza cinkwa, wakalumba kuli Leza, eelyo wakacikomona, wakalya kabalanga boonse. 36Aboobo bakaba aacamba, nkabela umwi aumwi wabo wakalya cakulya. 37Antoomwe toonse twakali myaanda yobilo amakumi aali ciloba acisambomwe mubwato. 38Boonse nibakamana kulya akukkuta, bakasowela mumaanzi maila, kutegwa bwato buube.

Kunyonyooka kwabwato

39Nibwakaca, basikweenzya bwato taakwe nibakaiziba nyika eeyo pe, pele bakabona busena aawo lwizi mpolubaanga luzwida aanze, alimwi mpolujisi maanzi mafwiifwi, aboobo bakayeeya kuti bakabikkile nkuko bwato. 40Eelyo bakakosola zijatyo zyabwato, bazisiya mumaanzi, alimwi bakaangununa ntambo zyakaangidwe mubalo wakunyona bwato. Mpoonya bakavungununa sani lyakumbele aabwato kutegwa guwo likonzye kubutonkela kumbele, eelyo bakeenda kululama kunkomwe. 41Pele bwato bwakaakusimpa mumusenga, bwapatila. Cipaanzi cakumbele cakapatila akutakonzya kweenda, nkabela cipaanzi cakusule cakakwamauka muzibeela-beela nkaambo mayuwe aakali aanguzu mpati.

42Lino Basilumamba bakabamba muyeeyo wakujaya baange boonse kuti kubule aumwi wabo uuti yambe akuzubuka kuti akatije. 43Pele mupati wabasilumamba wakali kuyanda kufutula Paulu, eelyo wakabakasya kucita oobo. Mpoonya wakalailila baange boonse bakali kukonzya kuyamba kuti baliwaale mumaanzi bayambe kuya kunkomwe. 44Musule batobele abalo bamwi, kabaya bujisilizi kuzipulanga zyabwato nikuba kuzibeela zimwi zyabwato zyakakwamukide. Mbombuboobu mbutwakazubuka toonse akufutuka.

Currently Selected:

Milimo 27: Tonga96

Highlight

Copy