Milimo 28

Mbobakacita ku Molita

1Lino nitwakafutuka akuzubuka, twakaziba kuti nsumbu mpotwakabede yakali kutegwa Molita. 2Basicisi bakooko bakalaalubomba kapati kulindiswe. Mvula yakali kuwa, alimwi kwakali kutontola, nkaako bakatukutwida mulilo akututambula kabotu toonse. 3Lino Paulu wakabwezelela nkuni, eelyo naakali kusikka, kwakazwa nzoka yakali kutija kkasaalizi lyamulilo, yakamuluma akuboko. 4Bantu bacisi nibakaibona nzoka akuboko kwa Paulu, bakatalika kulyaambauzya beni bakati, “Ncobeni muntu ooyu weelede kuti mujayi, nkaambo nikuba kuti wafutuka mulwizi, pele bululami bwa Leza tabuyandi kuti apone.” 5Paulu wakansansa nzoka mumulilo, kakunyina ambwabede pe. 6Bakali kulangilila kubona kuti ulazimba kuboko nikuba kuwida ansi akufwa. Pele nibakalindila kwaciindi cilamfu kabataboni cintu cibi kacicitika kulinguwe, bakasandula miyeeyo yabo baamba kuti, “Peepe! Ooyu nguleza!”

7Afwiifwi buyo kuzwa waawo mpotwakabede kwakali myuunda yamuntu uutegwa Pubuliyasi, wakali ngomupati wansumbu eeyo. Awalo wakatutambula amaanza obilo, nkabela twakakkala anguwe mazuba otatwe. 8Lino wisi Pubuliyasi wakali kuciswa mubili kuupya kapati alimwi akusoomona kalowa. Paulu wakanjila muŋanda mwaakabede, waakukomba, amane wakabikka maanza aakwe alinguwe akumuponya. 9Eeci nicakacitika, balwazi boonse bamunsumbu eeyo bakasika, nkabela bakaponyezegwa. 10Bakatupa zipego zinji, alimwi nitwakanjila mubwato kuti tweende bakatubikkila azimwi zintu zinji mubwato eezyo nzitwakabulide mulweendo lwesu.

Lweendo lwakuzwa ku Molita kuya ku Loma

11Lino nikwakamana myezi yotatwe, twakaya abwato bwakazwida ku Alekizandaliya bwakali kutegwa “baleza bamayanga” bwakakkede muciindi camupeyo coonse munsumbu eeyo. 12Eelyo twakaakusika kumunzi wa Sailakusi akukkala mulinguwo mazuba otatwe. 13Alimwi kuzwa ooko twakeenda akuyoosika kumunzi wa Legiyumu. Nkabela buzuba bwakatobela kwakatalika kuunga luuwo luzwida kumusanza, eelyo nikwakamana buyo mazuba obilo twakaakusika kumunzi uutegwa Puteyoli. 14Ooko twakajana bamwi basyomima bakatukumbila kuti tukkale ambabo mvwiki yomwe. Kuzwa ooko twakaakusika ku Loma. 15Basyomima bakali kukkala ku Loma nibakamvwa, bakeenda mane kuyoosika kubusena bwiitwa kuti Isambalilo lya Apiyusi bamwi kubusena butegwa Maanda Aakulida Otatwe, kututandila kuti bakatucinge. Lino Paulu naakababona, wakalumba Leza, alimwi wakakkalwa moyo.

Paulu mu Loma

16Nitwakasika ku Loma, Paulu wakazumizigwa akubikkwa alikke, umwi wabasilumaba wakali kumulindila.

17Nkabela nikwakamana mazuba otatwe, Paulu wakaita basololi ba Bajuda bamumunzi ooyo kuti aswaangane akukanana ambabo. Nibakabungana wakati kulimbabo, “Nobakwesu! Nikuba kuti taakwe ncendakabisya kubantu besu, nikuba kuziyanza zyabasikale besu, ndakaangwa mu Jelusalemu akupegwa mumaanza aa Baloma. 18Balo bakandibuzya mibuzyo, nibakamana bakali kuyanda kundaangununa nkaambo bakajana kuti taakwe mulandu ngundakacita wakeelede kuti ndijaigwe. 19Pele Bajuda bakakaka kuti ndaangununwe, aaka nkakaambo kakandicitya kuti ndilisisye ku Muleli Mupati wakokuno. Nikubaboobo kulisisya kwangu takuli kwakuti ndibape mulandu bantu bokwesu pe. 20Aaya ngamakani ngendamwiitila kuti ndaangidwe boobu nkaambo kayooyo ngobalangila bantu ba Isilayeli.”

21Lino balo bakaingula kuti, “Tatuna kutambula magwalo aazwa ku Judiya aamba makani aako. Alimwi taakwe umwi wabakwesu wakazwida nkuko wakatwaambila makani aaya, naa kwaamba cimwi cintu cibi anduwe pe 22pele tulayanda kumvwa miyeeyo yako mbwiibede, nkaambo ncobeni tulizi kuti koonse-koonse bantu baamba zyakukazya nkamu yabuzangi njonjilide.”

23Lino bakabamba buzuba bwakuzoobungana antoomwe a Paulu alimwi, mubuzuba oobo kwakasika nkamu yabantu mpati ya Bajuda kubusena kwakabede Paulu. Kuzwida cifumo-fumo kusikila masiku Paulu wakali kubapandulwida makani aaamba zyabwami bwa Leza. Wakasola kubacita kuti bamuzumine Jesu kwiindila mukubaambila mbuli mbwalembedwe mu Milawo ya Mozesi alimwi amumalembe aabasinsimi. 24Bamwi babo bakazumina majwi aa Paulu, pele bamwi taakwe nibakazumina pe. 25Aboobo bantu aaba bakamwaika kabaandeene mukuzumina kwabo, ciindi Paulu naakamana kwaamba nkani eeyi yomwe yakuti, “Ncobeni Muuya Uusalala wakaamba kabotu aawo naakakanana kwiindila mumusinsimi Izaya kuli basikale besu

26kuti,

‘Koya ukaambile bantu aaba kuti,

Ncobeni muyoomvwa, pele tamukooyoomvwisisya

akubona muyoobona pele tamukooyoobonesesya.

27Kayi maanu aabantu aaba mafwiifwi,

aalo matwi aabo baasinka ameso aabo baafwinya.

Nikwatali boobo nikunga balabona akumvwa akuba aamaanu

kuti beempe kutegwa mbaponye akubaleleka.’”

28Alimwi Paulu wakayungizya kukukanana wakati, “Muleelede kuziba kuti makani aa Leza aalufutuko atumwa kuli bamasi. Balo bayooaswiilila!” [ 29Paulo naakamana kwaamba makani aaya, Bajuda bakainka kabaya bukazyanya mulicabo.]

30Lino kwamyaka yobilo Paulu wakakkede muŋanda njaakali kulibbadelela mwini, alimwi wakali kubatambula kabotu boonse bakali kuboola kumuswaya. 31Wakali kukambauka zyabwami bwa Leza akwiisya makani aa Mwami Jesu Kilisito. Wakali kwaamba cakutayoowa alimwi kaangulukide.

Currently Selected:

Milimo 28: Tonga96

Highlight

Copy