Milimo 26

Paulu mbwaakalyaambilila mwini kuli Agilipa

1Lino Agilipa wakati kuli Paulu, “Wazumizigwa kuti ulyaambilile omwini.” Lino Paulu wakatandabika janza lyakwe akulyaambilila mwini wakati, 2“Ba Mwami Agilipa! Ndaliyeeya kuti ndili muntu uulaacoolwe kuti sunu ndilikazizye ndemwini kulindinywe kuzintu zyoonse eezyo Bajuda nzyobandipa mulandu. 3Kapati eeci cili kasimpe akaambo kakuti nywebo mulizi kabotu makani aaziyanza zyoonse zya Bajuda. Aboobo ndamukumbila kuti mundiswiilile kabotu.

4“Bajuda boonse balizi zyabuumi bwangu mbundakapona kuzwa kubwana bwangu. Balizi kuti kuzwida kumatalikilo ndakalikkede mucisi cangu alimwi amu Jelusalemu mulikke. 5Kuti kabayanda kulungulula, inga balakonzya kuzuminana andime kuti kuzwida kumatalikilo ndakali wankamu ya Bafalisi yalo iili njiilangisisya lukondo lwesu. 6Lino ndiimvwi aano akubetekwa akaambo kalulangilo ndwejisi kucisyomezyo eeco Leza ncaakapa basikale besu. 7Ncencico cisyomezyo ncobalangila kutambula bantu bamisyobo yesu iili kkumi aibili, aabo bakomba Leza sikati amasiku. Nobami balemenede, lino nkaambo kakuba alulangilo oolu, ncindapedwa mulandu a Bajuda! 8Nkaambo nzi nywebo nomuli waano ncomutazumini kuti Leza nguubusya bafu?

9“Mebo lwangu ndakayeeya kuti ndicite koonse nkwindakali kukonzya kulesya makani aa Jesu waku Nazaleta. 10Ncencico eeco ncindakacita mu Jelusalemu. Ndakapegwa nguzu abapaizi basilutwe, nkabela ndakabikka bantu ba Leza banji muntolongo, alimwi nibakali kubetekwa kuti bajaigwe, ambebo ndakali kuzumina. 11Ziindi zinji ndakali kubasubula muzikombelo, akusola kubacita kuti batame lusyomo lwabo. Ndakali mukali kapati mumakani aaya, mane ndakali kuunka akuminzi iimbi mumasi aandeene-andeene kuya bubapenzya.

Paulu mbwaakalungulula zyakusanduka kwakwe

(Milimo 9.1-19; 22.6-16)

12“Nkakaambo aaka kakanditola kumunzi wa Damasikasi kandipedwe nguzu amalailile kuzwa kubapaizi basilutwe. 13Nomulemekwa, twakali kweenda mumugwagwa ciindi casikati nindakabona mumuni uuzwa kujulu, uumwekesya kwiinda zuba, akutuzinguluka, mebo abaalumi mbindakali kweenda aabo. 14Toonse twakawida aansi. Nkabela ndakamvwa jwi lyakaamba mu Cihibulu kuti, ‘Saulu, Saulu! Nkaambo nzi ncondipenzya? Ulalicisa buyo omwini kuti kosansa cidyunsyo.’ 15Nkabela ndakabuzya kuti, ‘Ino nduweni Simalelaangu?’ Eelyo Mwami wakati, ‘Ndime Jesu ngopenzya. 16Pele nyamuka! Ndalitondezya kulinduwe kuti ndikusale kuba mubelesi wangu, ukabaambile bamwi zintu eezyo nzyoobona kulindime sunu, azeezyo nzenjookutondezya kumbele. 17Ndiyookuvuna kuzwa ku Baisilayeli akuli bamasi, nkaambo nkonkuko nkwindakutuma. 18Ukabazibye akubajokolola kuzwa kumudima kubanjizya mumumuni. Ukabagwisye munguzu zya Saatani akubanjizya munguzu zya Leza kutegwa kwiindila mulusyomo lwabo mulindime bakalekelelwe zinyonyoono zyabo akujana busena akati kabantu ba Leza basalidwe.’

Paulu mbwaakaamba zyamulimo wakwe

19“Bamwami Agilipa, taakwe nindakakaka kuswiilila eeco cilengaano ncendakabona kuzwa kujulu. 20Kusaanguna mu Damasikasi akuya mu Jelusalemu, nkabela amucisi coonse ca Judiya akati kabamasi, ndakakambauka kuti baleelede kusanduka kuzwa kuzibi zyabo akutambula Leza. Bacite milimo iitondezya kuti bakasanduka ncobeni. 21Aaka nkakaambo nkobakandijatila Bajuda nindakali muŋanda ya Leza akusola kundijaya. 22Pele kusikila buzuba buno ngu Leza uundigwasizye, aboobo ncendiimvwi aano akupa bumboni bwangu kuli boonse, nibaba bapati nibaba bantu buyo. Eeci ncendaamba ncencico ncobakali kwaamba basinsimi a Mozesi kuti ciyoocitika, 23cakuti Munanike wa Leza uleelede kupenga akuba mutaanzi kubuka kuzwa kubafu, kuti kukakambaukwe makani aalufutuko ku Bajuda akuli bamasi mukuti makani aayo akabe mumuni kulimbabo.”

24Lino Paulu kacikanana munzila eeyi, Fesitosi wakapozomoka wakati, “Paulu ulisondokede! Kwiiya kwako kwakusondosya!”

25Pele Paulu wakaingula kuti, “Nomulemekwa, peepe, nsisondokede. Makani ngeamba ngabwini, alimwi ambebo ndili sitikide mumoyo. 26Bamwami Agilipa balizi zyoonse eezyi. Ncencico eeco ncekonzya kwaamba amoyo uusitikide. Ndili masimpe kuti baatobelezya kabotu makani oonse, nkaambo cintu eeci tiicakacitika kumbali pe. 27Bamwami Agilipa, sena mulasyoma majwi aabasinsimi? Ndilizi kuti mulaasyoma!”

28Lino mwami Agilipa wakati kuli Paulu, “Muciindi cisyoonto eeci sena inga wandisandula kuti mbe mu Kilisito?”

29Eelyo Paulu wakati, “Nociba ciindi cisyoonto naa cilamfu, kukomba kwangu kuli Leza nkwakuti nywebo, omwami, abamwi bandiswiilide aano sunu, babe mbulindime, kuleka buyo kwaangwa nketani eezi nzendilaazyo!” 30Lino mwami Agilipa, Beenisi mukaintu wakwe, a Fesitosi mweendelezi, abaabo bakalaabo bakanyamuka. 31Nibakeenda, bakalyaambauzya lwabo beni kuti, “Ooyu muntu taakwe cintu cibi ncaakacita ceelede kuti ajaigwe nikuba kubikkwa muntolongo.” 32Agilipa wakati kuli Fesitosi, “Kuti naatakalisisya ku Muleli Mupati, naangununwa buyo.”

Currently Selected:

Milimo 26: Tonga96

Highlight

Copy