Milimo 25

Paulu mbwaakabetekwa a Fesitosi

1Lino nikwakamana mazuba otatwe kuzwa kukusika kwakwe mucisi, Fesitosi wakainka ku Jelusalemu kuzwida ku Sizaliya. 2Ndilyonya bapaizi basilutwe abasololi ba Bajuda bakeeta matongoosi aabo aakupa Paulu mulandu. Bakamukumbila Fesitosi 3kuti ababede aalubomba, aboozye Paulu ku Jelusalemu. Bakaamba boobo nkaambo bakakanzide kuti bamuyubilile munzila akumujaya. 4Fesitosi wakabaingula kuti, “Paulu mmwaange mu Sizaliya, alimwi mebo ndaafwi kubweeda nkuko. 5Aboobo atukainke abasololi banu ku Sizaliya kuti bakamupe kaambo mwaalumi ooyo naa kuli cibi ncaakacita.”

6Fesitosi wakacilikkede ambabo ooko kwamazuba aali lusele naa kkumi, eelyo wakabweeda ku Sizaliya. Buzuba bwakatobela wakanjila munkuta akulailila kuti Paulu aletwe. 7Paulu naakasika, Bajuda bakazwa ku Jelusalemu, bakaima kumuzinguluka, akutalika kumutamikizya twaambo tunji twakumupa mulandu, pele tiibakali kukonzya kutondezya kuti ntwamasimpe. 8Paulu wakalikazizya mwini wakati, “Nsiindakabisizya Milawo ya Bajuda, niiba ŋanda ya Leza, naba Muleli Mupati waku Loma.”

9Fesitosi wakali kuyanda kubotezya Bajuda, aboobo wakabuzya Paulu kuti, “Sena ulayanda kutolwa ku Jelusalemu kuti nkakubetekele nkuko?”

10Paulu wakaingula kuti, “Ndiimvwi munkuta ya Muleli Mupati mwini, oomo mweelede kubetekelwa. Taakwe cibi ncindakacita ku Bajuda, mbubonya mbomuzi anywebo. 11Kuti naa ndakatyola mulawo akucita cimwi cintu ceelede lufu, nsikaki kufwa pe. Pele kuti twaambo ntobandipa katutali twabwini, kunyina muntu weelede kundipa mumaanza aabo. Ndalisisya ku Muleli Mupati.”

12Fesitosi naakamana kwaambilana abalailili bakwe, wakati kuli Paulu, “Mbuli mboolisisya ku Muleli Mupati ulatolwa nkukonya kulinguwe.”

Paulu kumbele lya Agilipa

13Lino nikwakainda mazuba amwi, mwami Agilipa a mukaintu wakwe Beenisi bakasika ku Sizaliya kuzooswaya akujuzya Fesitosi. 14Nibakakkala ooko mazuba manji, Fesitosi wakaambila mwami makani aa Paulu mbwaabede. Wakati, “Kuli muntu kuno mwaange wakasiya Filikisi. 15Nindakali ku Jelusalemu, bapaizi basilutwe ba Bajuda alimwi abapati babo, bakaleta makani kulindime akundikumbila kuti muntu ooyu ndimupe mulandu. 16Ndakabaambila kuti tacili ciyanza ca Baloma kupa mulandu muntu nabani katawo simulandunyina. Kuleelede kuti boonse basikumupa mulandu babikkwe aamwi munkuta kutegwa ooyu uupegwa mulandu akonzye kulikazizya. 17Nibakasika kuno boonse, taakwe nindakasowa ciindi, ndakanjila munkuta akulailila kuti Paulu aletwe. 18Lino basikumupa mulandu bakaimikila munkuta, pele taakwe mulandu omwe wamilandu eeyo njendakali kuyeeya kuti njobamupede ngubakaamba. 19Nzyobajisi buyo makani aakukazyanya anguwe muzintu zyakukomba kwabo azyamuntu umwi wakafwa uutegwa Jesu, ooyo Paulu ngwaamba kuti mmuumi. 20Ndakabula ambwekonzya kujana twaambo twini twamakani aaya mbwaabede, aboobo ndakabuzya Paulu kuti naa wakali kuyanda kuya ku Jelusalemu akuyoobetekelwa nkuko. 21Pele walo wakalisisya ku Muleli Mupati, wakayanda kuti alangwe abasilumamba mane kaambo kakwe kakasike ku Muleli Mupati lwakwe. Aboobo ndakalailila kuti kacibambidwe mane kusikila ndaakumutumya ku Muleli Mupati.”

22Agilipa wakati, “Ambebo lwangu ndali kuyanda kumuswiilila muntu ooyo.”

Fesitosi wakati, “Uzoomumvwa juunza mabala.”

23Nibwakaca Agilipa a Beenisi bakasika mubulemu bupati alimwi akucitilwa ziyanza zyacisi zyakutondezya kusekelela akulemya muntu mupati. Bakanjila muŋanda yakubunganina kabasindikidwe abasololi babasilumamba abapati bamunzi. Eelyo Fesitosi wakalailila kuti Paulu aletwe. 24Nkabela Festitosi wakaamba kuti, “O Mwami Agilipa, anywebo nyoonse nomuli aandiswe aano. Mwamubona muntu ooyu ngobatayandi Bajuda boonse bakkala kuno aku Jelusalemu. Bakaleta matongoosi kulindime akaambo kakwe. Balapozomoka akwaamba kuti teelede kuti kapona. 25Pele mebo taakwe nindakajana kuti wakacita cintu cakuti inga ulapegwa mulandu walufu. Alimwi walo mwini mbwaakalisisya kumwami mupati, ndakaciyeeya kuti ndimutumizye nkuko. 26Pele nsijisi kaambo keni-keni nkenga ndalemba kumuleli. Aboobo ndamuleta aano kulindinywe kwaambisya, O Mwami Agilipa! Kuti twamana kumubuzisisya kaambo kakwe mbokabede, ndijane cintu ncendeelede kulemba. 27Nkaambo tacili cabusongo kulindime kuti nditumine mwaange kaatakwe akutondezya kabotu mulandu wakwe mwini mbuubede.”

Currently Selected:

Milimo 25: Tonga96

Highlight

Copy