2 Bami 18
18
Mwami Hezekiya wacisi ca Juda
(2 Makani 29.1-2; 31.1)
1Lino mumwaka watatu wa Hosyeya mwana wa Ela, mwami wa Isilayeli Hezekiya mwana wa Ahazi, wacisi ca Juda wakatalika kulela. 2Wakajisi myaka iili makumi obilo aisanu naakatalika kulela, nkabela wakalela kwamyaka iili makumi obilo afuka mu Jelusalemu. Banyina bakali ba Abija mwanaa Zekaliya. 3Ooyu wakacita ziluleme ku Mwami Leza mbubonya mbuli Devedi sikale wakwe mbwaakacita. 4Wakamwaya zipaililo zyamalende akupwayaula mabwe amituni ya Asyela. Wakakosoola nzoka yamukuba eeyo Mozesi njaakapangide, kuzwa kuciindi eeco Baisilayeli bakali kwiitentela tununkilizyo, yakali kwiitwa kuti Nehusyita. 5Hezekiya wakali kusyoma buyo Mwami Leza wa Isilayeli, taakwe naba omwe wabami bacisi ca Juda bakamusaangunina wakali mbulinguwe pe nikuba umwi wabaabo bakaza musule lyakwe. 6Wakakakatila ku Mwami Leza, taakwe naakaleka kumutobela. Wakali kubamba milawo eeyo Mwami Leza njaakapa kuli Mozesi. 7Nkaako Mwami Leza wakali aanguwe, nkabela wakazwidilila muli coonse ncaakacita. Wakazangila mwami wacisi ca Asiliya, taakwe naakamubelekela pe. 8Wakazunda Bafilisiti mucisi ca Gaza coonse kutalikila kuminzi miniini iijisi maanda malamfu aakusompelela kusikila kuminzi mipati iikwabililidwe.
9Mumwaka wane wa kulela kwa mwami Hezekiya, walo uuli ngowakali mwaka waciloba wabwami bwa Hosyeya mwana wa Ela mwami wa Isilayeli, mwami Syalumanesa waku Asiliya wakalwana munzi wa Samaliya akuusinkilizya. 10Nikwakainda myaka yotatwe wakuutola. Mumwaka wacisambomwe wa Hezekiya uuli ngomwaka wafuka wakulela kwa Hosyeya mwami wacisi ca Isilayeli, munzi wa Samaliya wakatolwa. 11Mwami waku Asiliya wakatola Baisilayeli mubuzike ku Asiliya waakubabikka muminzi ya Hala bamwi munsi aamulonga wa Habo mucisi ca Gozani amuminzi ya Bamedi.
12Eeci cakacitika nkaambo taakwe nibakaswiilila Mwami Leza wabo bakatyola cizuminano azyoonse eezyo Mozesi mubelesi wa Mwami Leza nzyaakalailila. Taakwe nibakaswiilila milawo nikuba kwiicita.
Baasiliya mbubakapingila munzi wa Jelusalemu
(2 Makani 32.1-19; Izaya 36.1-22)
13Mumwaka wakkumi aine wakulela kwa Hezekiya, Senakelibu mwami waku Asiliya wakaboola kuzoolwana minzi yamu Juda iikwabilidwe akwiitola. 14Eelyo Hezekiya mwami wacisi ca Juda wakatumina majwi aaya ku mwami waku Asiliya ku Lakisyi wati, “Ndabisya, ndileka eelyo kufumbwa ncoyooamba njoocicita.” Mpoonya mwami waku Asiliya wakayanda kuti Hezekiya mwami wacisi ca Juda amupe matalenta aansiliva aali myaanda yotatwe amatalenta aangolida aali makumi otatwe. 15Eelyo Hezekiya wakamupa nsiliva yoonse yakali muŋanda ya Mwami Leza ayakali muziyobwedo zyaŋanda yabwami. 16Ciindi eeci Hezekiya wakanamatula ngolida yakazilulwidwe kuzitendele azicinda zyaŋanda ya Mwami Leza, wiipa mwami waku Asiliya. 17Mpawo mwami waku Asiliya wakatuma Talitani, Labisalisi a Labisake kabajisi ampi mpati kuzwa ku Lakisyi kuya kumwami Hezekiya ku Jelusalemu. Bakaakusika ku Jelusalemu. Lino nibakaakusika bakaima kukankolola kaziba lyakutala lili kumugwagwa wamuunda wasikusanzya. 18Eelyo nibakaita mwami, kwakaboola Eliyakimu mwanaa Hilikiya mweendelezi waŋanda yabwami, Syebina mulembi, a Jowa mwana wa Asafu sikubamba makani aalembwa.
19Mpawo mulailili wabasikulwana aamaulu wakati, “Amwaambile Hezekiya muti, mwami mupati waku Asiliya ulati, ‘Ncinzi cikutunzizye? 20Waamba kuti ulakonzya kulwana pele ulikankaizya buyo, nguni uukupede ntunda yakuti undizangile? 21Bona, lino usyomede Ijipiti. Pele ooku kuli mbuli kusyoma lubu lutyokede lukonzya kuyasa yooyo uulujata mbuli musako mumaanza. Oobo mbwabede Falo mwami waku Ijipiti alimwi mbwakonzya akucita kuli yooyo uumusyoma.’
22“Pele yebo kuti naa yebo wandaambila kuti, ‘Tulasyoma mu Mwami Leza wesu,’ sena tali nguwe ooyo Hezekiya ngwaakamwaila malende azipaililo akwaambila bantu bamu Juda amu Jelusalemu kuti, ‘Mweelede kukombela acipaililo eeci cili mu Jelusalemu.’ 23Lino boola mupangane asimalelo wangu, mwami waku Asiliya, ndilakupa mabbiza aali zyuulu zyobilo, kuti naa kokonzya kujana basikwaatanta. 24Ino kayi mbuti mbokonzya kusampaula naba musyoonto wababelesi basimalelo wangu kakuli usyoma Ijipiti kuti ikupe nkalaki abasimabbiza? 25Kwiindilizya waawa sena ndaliboolela buyo kuzoonyonyoona busena oobu kakunyina majwi aazwa ku Mwami Leza? Mwami Leza nguwakandaambila kuti ndizoonyonyoone cisi eeci.”
26Mpoonya Eliyakimu mwanaa Hilikiya, Syebina a Jowa bakati kumulailili wabasikulwana amaulu, “Twakukomba, twaambile swebo tobabelesi bako mu Cialamu nkaambo tulacimvwa, utatwaambili mu Cihibulu bantu boonse bali abwaanda kabamvwide.” 27Pele mulailili ooyo wakati kulimbabo, “Sena simalelo wangu wakandituma buyo kulisimalelo wanu akuli ndinywe kuti nzooambe zintu eezi? Pele kutali kuli baabo bakkede abwaanda, balo mbuli ndinywe, batinoolye tubi akunywa minsyu yabo beni”
28Mpawo mulailili ooyo wakapozomoka mu Cihibulu, wakati, “Amuswiilile majwi aamwami mupati, mwami waku Asiliya! 29Mboobu mbwaamba mwami, ‘Hezekiya atamweeni, nkaambo takooyookonzya kumuvuna kuzwa kulindime.’ 30Hezekiya atamuciti kuti musyome Mwami Leza cakwaamba kuti, ‘Mwami Leza ncobeni uyootuvuna, eelyo munzi uuno tuukooyooabwa kumwami waku Asiliya.’
31“Mutamuswiilili Hezekiya pe, nkaambo mboobu mwami waku Asiliya mbwaamba, ‘Amuboole tuzoopangane zyaluumuno ndendilyo umwi aumwi wanu nayoolilida nsaansa, nkuyu akulinywida maanzi mucitelekezyo cakwe mwini 32mane kusikila nkaboole kuzoomutola kunyika iikozyenye ayanu, nyika yamaila awaini, nyika iijisi zyakulya amisaansa, nyika yamaoliva abuci. Amusale buumi kutali lufu!’
“Hezekiya atamusowi nati, ‘Mwami Leza uyootuvuna.’ 33Sena kuli leza naba omwe akati kabaleza bamisyobo wakavuna nyika kuzwa kumwami wacisi ca Asiliya? 34Ino bali kuli baleza ba Hamati a Aapadi? Bali kuli baleza ba Sefavaimu, Hena a Iva? Sena bakavuna Samaliya kuzwa kulindime? 35Nguuli wabaleza bamanyika aaya wakakonzya kuvuna nyika yakwe kuzwa kulindime? Ino inga walo Mwami Leza ulavuna buti Jelusalemu kuzwa kulindime?”
36Pele bantu bakaumuna buyo, taakwe noliba jwi lyomwe ndibakaingula pe, nkaambo mwami Hezekiya wakabalaililide kuti, “Mutakamwiinguli pe.” 37Mpoonya Eliyakimu mwanaa Hilikiya, wakali mweendelezi waŋanda yabwami, Syebina mulembi a Jowa mwana wa Asafu mulembi wamakani, bakasika kuli Hezekiya kabazapawide zisani zyabo, bamwaambila majwi aamulailili wabasikulwana aamaulu.
Currently Selected:
2 Bami 18: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
