2 Bami 17

Mwami Hosyeya wacisi ca Isilayeli

1Mumwaka wakkumi aibili wa Ahazi mwami wacisi ca Juda, Hosyeya mwana wa Ela wakalela Baisilayeli mu Samaliya, wakalela kwamyaka iili fuka. 2Awalo ooyu wakabisizya Mwami Leza, pele taakeelana abamwi bami ba Isilayeli bakamusaangunina. 3Lino Syalumanesa mwami waku Asiliya wakaboola kuzoolwana Hosyeya, ooyo wakali kutela kulinguwe. 4Pele mwami wacisi ca Asiliya wakajana kuti Hosyeya wakali kumuunina, wakatuma batumwa kuli So mwami waku Ijipiti, taakacili kupa limbi mutelo kumwami wacisi ca Asiliya, mbuli mbwaakali kucita myaka yoonse, nkaambo kaako mwami wacisi ca Asiliya wakamwaanga akumubikka muntolongo.

Kooleka kwa Samaliya

5Lino mwami wa Asiliya wakasaala cisi coonse mane wazoosika ku Samaliya, ngwaakasinkilizya kwamyaka yotatwe. 6Mumwaka wafuka wabwami bwa Hosyeya mwami waku Asiliya wakazunda Samaliya, wakatola Baisilayeli mubuzike ku Asiliya waakubabikka muminzi ya Hala bamwi munsi aamulonga wa Habo mu Gozani amuminzi ya Bamedi. 7Cakaba boobo nkaambo Baisilayeli bakabisizya Mwami Leza wabo, ooyo wakabagwisya kuzwa munyika ya Ijipiti, akubavuna kuzwa kuli Falo mwami wa Ijipiti. Bakakomba baleza bambi, 8akutobela zilengwa zyabantu aabo Mwami Leza mbaakabatandila kubikkilizya azilengwa nzibakalitalikila. 9Baisilayeli bakali kucita zitaluleme kumbele lya Mwami Leza cakusisikizya. Bakayaka malende muminzi mipati niiba miniini. 10Bakaimika mabwe amituni ya leza mukaintu Asyela mutulundu amunsi aamasamu. 11Ooko bakali kutenta tununkilizyo mbubonya mbuli misyobo eeyo Mwami Leza njaakabatandila. Bakali kucita zintu zibi, zyakanyemya Mwami Leza. 12Bakakomba mituni yacisi eeyo Mwami Leza njaakabaambila kuti, “Mutakiikombi pe.”

13Mwami Leza wakabacenjezya Baisilayeli abantu ba Juda kwiindila mubasinsimi boonse kuti, “Amuleke nzila zyanu zibi, mubambe milawo yangu amalailile aangu kweendelana amulawo woonse ngundakalailila basikale banu kuti bauswiilile nkaambo ndime ndakamupa kwiindila mubabelesi bangu basinsimi.” 14Pele tiibakaswiilila bakaba basicinguni, mbubwakabede basikale babo tiibakasyoma mu Mwami Leza wabo. 15Bakavoolozya malailile aakwe acizuminano eeco ncaakapangana abasikale babo, antoomwe azeezyo nzyaakali kubacenjezya. Bakali kukomba mituni yabuyo abalo mbubonya baba babuyo, bakatobela misyobo eeyo yakabazingulukide, eeyo Mwami Leza njaakabaambilide kuti tabeelede kwiitobela. 16Bakasiya mulawo wa Mwami Leza wabo woonse, akulipangila mituni iifulidwe yaboombe bobilo, awa leza mukaintu Asyela kumane bakali kukomba azyakujulu akukomba Baali. 17Bakali kupaizya bana balombe abasimbi alimwi bakali kusonda akulowana. Bakalipa lwabo beni mukubisizya Mwami Leza akumunyemya. 18Nkaako Mwami Leza wakanyemena Baisilayeli kapati, wabatanda kuzwa kulinguwe, taakwe naba omwe wabo wakasyaala pele buyo bamusyobo wa Juda.

19Bamusyobo wa Juda abalo taakwe nibakabamba milawo ya Mwami Leza wabo, bakali kutobela ziyanza zya Baisilayeli. 20Aboobo Mwami Leza wakakaka Baisilayeli boonse akubapenzya, wakabaaba kuli baabo bakabasaala, mane kusikila naakabatandila limwi kuzwa kulinguwe.

21Ciindi Mwami Leza naakaandaanya Baisilayeli aba Juda, Baisilayeli bakabikka Jelobowamu mwanaa Nebati kuba mwami wabo. Pele Jelobowamu wakoongelezya Baisilayeli kuti baleke kutobela Mwami Leza akubasolweda mucibi. 22Aboobo Baisilayeli bakacili kutobela zinyonyoono zya Jelobowamu kabatazisiyi pe, 23mane kusikila Mwami Leza naakabatanda kuzwa kulinguwe mbubonya mbuli mbwaakabacenjezya kwiindila mubabelesi bakwe basinsimi boonse. Mbombuboobu Baisilayeli mbubakatolwa mubuzike kuzwa munyika yabo kuya ku Asiliya, nkobacibede asunu.

24Lino mwami waku Asiliya wakaleta bantu kuzwa kuminzi ya Babuloni, Kuta, Ava, Hamati awa Sefavaimu, wakababikka muminzi ya Samaliya kuti batole busena bwa Baisilayeli. Eelyo bakatola cisi ca Samaliya akukkala muminzi yaco. 25Nibakacisika-sika tiibakali kukomba Mwami Leza pe, nkaako Mwami Leza wakatumina basyuumbwa bakazoojaya bamwi babo. 26Eelyo mwami waku Asiliya wakaambilwa kuti, “Misyobo iilya njookatola mubuzike akuyooibikka muminzi ya Samaliya tiizi nzyayanda leza wanyika eeyo pe, nkaako walo wakatuma basyuumbwa bakazoobajaya, nkaambo tabazi nzyayanda leza ooyo pe.” 27Mpoonya mwami waku Asiliya wakalailila wati, “Amutume umwi wabapaizi ooko, ngumwakajata, mumuleke ainke akakkale ooko akabaiisye nzyayanda leza wanyika eeyo.” 28Aboobo umwi wabapaizi wakajatidwe kuzwa ku Samaliya wakaboola wazookkala mu Beteli wabaiisya mbobeelede kukomba Mwami Leza.

29Nikuba boobo musyobo umwi aumwi wakalipangila baleza bawo wini, akubabikka muminzi mubakakkala, amumalende bantu baku Samaliya ngubakayakide muzilundu. 30Baku Babuloni bakapanga Sukkotibenoti, baku Kuta bakapanga Negali, baku Hamati bakapanga Asyima, 31Baavi bakapanga Nibuhazi a Taataki, Basefava bakali kupa bana babo mbuli cipaizyo cakutenta kuli Adulameleki a Anameleki, baleza ba Basefava. 32Bantu aaba bakali kukomba Mwami Leza kumwi kabasalide kufumbwa buna muntu kuti abe mupaizi wabo kumalende. 33Bantu aaba bakali kukomba Mwami Leza kumwi kababelekela baleza babo, mbubwakali kucita misyobo yakooko nkubakazwida.

34Lino asunu bacicita ziyanza nzizyonya eezi zyakaindi. Aaba tabakombi Mwami Leza mubwini alimwi tabatobeli malailile, mbeta, milawo amajwi oonse Mwami Leza ngaakaamba kulunyungu lwa Jakobo, ooyo ngwaakaulika kuti Isilayeli. 35Mwami Leza wakapangana cizuminano ambabo, wakabalailila kuti, “Mutakakombi baleza bambi nikuba kubavuntamina, kubabelekela nikuba kubapaizizya. 36Ccita buyo Mwami Leza, ooyo wakamugwisya kuzwa mu Ijipiti anguzu mpati ajanza lyakwe likwabilila, 37walo alikke ngomweelede kutobelela malailile, mbeta, milawo amajwi oonse ngaakamulembela. Mutakakombi baleza bambi, 38alimwi tamweelede kuluba cizuminano eeco ncindakapangana andinywe. Tamweelede kukomba baleza bambi pe, 39ncomweelede kucita nkukomba Mwami Leza wanu. Ngonguwe uuyoomuvuna kuzwa kuli basinkondonyoko.” 40Nikuba boobo taakwe nibakaswiilila, bakacili kucita ziyanza zyabo zyakaindi.

41Nikuba ciindi nibakali kukomba Mwami Leza, bakacili kubelekela mituni yabo, kusikila sunu, balo abazyukulu babo bacicita mbubonya mbuli basikale babo.

Currently Selected:

2 Bami 17: Tonga96

Highlight

Copy

Compare