2 Bami 19
19
Mwami mbwaakakumbila kulaililwa a Izaya
(Izaya 37.1-7)
1Lino mwami Hezekiya naakamvwa zyamakani aaya, wakazapaula zisani zyakwe, wasama masaka, amane wakanjila muŋanda ya Mwami Leza. 2Wakatuma Eliyakimu wakali mweendelezi waŋanda yabwami a Syebina mulembi abapaizi basilutwe kabasamide masaka kuli Izaya musinsimi mwana wa Amozi. 3Bakati kulinguwe, “Mboobu mbwaamba Hezekiya, ‘Sunu mbuzuba bwamapenzi, mbutwasubulwa akuusigwa nsoni, twaba mbuli bakaintu bayanda kutumbuka, pele babula nguzu zyakutumbuka. 4Mwami Leza wako ulimvwide majwi aa walupati-pati ooyu mwami waku Asiliya ngwaatuma kuzoosampaula Leza muumi. Mwami Leza asubule majwi aaya ngaalimvwida mwini. Akaka kombela bantu aaba bacisyeede.’”
5Lino balupati-pati bakatumwa amwami Hezekiya nibakaakusika kuli Izaya, 6Izaya wakabaambila kuti, “Amukaambile simalelo wanu kuti, Mboobu mbwaamba Mwami Leza ulati, ‘Utayoowi akaambo kamajwi ngoomvwa aayo balupati-pati bamwami waku Asiliya ngobandisampaula. 7Swiilila, uyoomvwa mavwambukila akupilukila kucisi cakwe, ooko nkweyoocita kuti akajaigwe apanga.’”
Baasiliya mbubakayanda kubalwana alimwi
(Izaya 37.8-20)
8Ciindi mulailili wabasikulwana aamaulu naakamvwa kuti mwami waku Asiliya wakazwa ku Lakisyi, wakapilukila akuyoojana kuti mwami ulwana munzi wa Libuna. 9Lino Senakelibu wakatambula makani aakuti Tilihaka, Mukusyi mwami wa Itiyopiya wakali kuza kuzoomulwana. Amvwe boobo wakatuma batumwa kuli Hezekiya mwami wa Juda kuti, 10“Utacengwi aleza ooyo ngosyoma, nakwaambila kuti, ‘Jelusalemu tuukaabwi kumwami waku Asiliya.’ 11Yebo omwini wakalimvwida zyakacita bami baku Asiliya kumanyika oonse, ngibakanyonyweeda limwi. Ani yebo inga wavunwa buti? 12Sena baleza bamisyobo eeyo basikale besu njibakanyonyoona bakakonzya kubavuna? Aaba mbaaleza ba Bagozani, Bahalani, Balezefu abaabo baku Edeni bakali mumunzi wa Teliasa. 13Ino mwami waku Hamati awaku Aapadi kubikkilizya amwami wamunzi wa Sefavaimu naa Hena naba Iva bali kuli?”
14Lino Hezekiya wakatambula lugwalo lwakaleta batumwa akulubala. Mpawo wakainka kuŋanda ya Mwami Leza akuyooluvungununa kumbele lya Mwami Leza. 15Amane Hezekiya wakakomba ku Mwami Leza wakati, “O Mwami Leza wa Isilayeli, ookkede akati kabakelibu, yebo olikke ndonduwe Leza wamalelo aanyika oonse. Nduwe wakalenga julu anyika. 16Ndiswiilila O Mwami Leza, ndimvwa. Langa O Mwami Leza ubone. Mvwa majwi Senakelibu ngaatuma kusampaula Leza muumi.
17“Masimpe O Mwami Leza, bami ba Baasiliya bakanyonyoona misyobo eeyo amanyika aayo. 18Bakasowa baleza babo mumulilo akubanyonyoona, nkaambo tiibakali baleza beni, zyakali buyo zisamu amabwe zyakabambwa amaanza aabantu balya maila. 19Lino O Mwami Leza wesu, tuvune kuzwa kulinguwe, kutegwa malelo oonse aanyika azibe kuti nduwe Mwami Leza olikke.”
Mulumbe wa Izaya ngwaakatumina mwami Hezekiya
(Izaya 37.21-38)
20Mpoonya Izaya mwana wa Amozi wakatumya makani kuli Hezekiya aakuti, “Mboobu mbwaamba Mwami Leza wa Isilayeli ulati, Mukuti wakomba amakani aa Senakelibu mwami waku Asiliya,
21Lino mboobu Mwami Leza mbwaamba kujatikizya zyanguwe,
Munzi wa Ziyoni ulakunyansya akukuwelela Senakelibu
munzi wa Jelusalemu upukusa mutwe notija.
22Nguni ngotukana akusampaula?
Nguni ngovulamukila akututulwida meso cakulisumpula?
Uusalala wa Isilayeli!
23Kwiindila mubatumwa bako wakasampaula Mwami Leza. Alimwi wakati,
‘Ankalaki zyangu zinji ndakatanta atala lyazilundu zya Lebanoni,
Ndakatema milombe milamfu, mikamba mibotu kwiindilila
alimwi ndakaakwaanjila masaka aaco, magonde aasinkide.
24Ndakasya mikalo akunywa maanzi mumanyika aabeni.
Ndakayuminizya tulonga toonse twa Ijipiti, mundakainda amaulu.’”
25Mebo nde Leza ndati,
Sena tookamvwa eezi nzindakakanza kale-kale?
Ndakaziyeeya mazuba aansiku.
Lino ndazicita ncobeni, mebo ndakakuzumizya kunyonyoona
minzi iikwabililidwe, wakayoola yaba zitantaala zyamabwe.
26Bantu bakali kukkala kooko bakanyina nguzu bakali kuyoowa akunyongana.
Bakaba mbuli tusamu tufwiinyana mbuli mweemvwe, bakali
mbuli twizu tumena aciluli tuyumizigwa aluuwo lupya katutanasima.
27Pele mebo ndizi zyanduwe zyoonse,
ndizi mbokkala mboenda akuboola, ambondinyemena.
28Nkaambo kakuti wakanditapatila,
alimwi mukuti ndakakumvwa kulisumpula kwako,
nzookutambya alumingwa mumpemo, acibulo mukanwa.
Njookupilusya munzila eeyo njiyonya njookaletezya.
29Lino aawo Izaya wakaambila Hezekiya
kuti nceeci ciyooba citondezyo kulinduwe,
“Uuno mwaka muyoolya makoko,
pele wabili muyoolya ciyoolimenena kuzwa kulingawo.
Mumwaka watatu muyoosyanga akutebula,
mukasyange misaansa akulya micelo yayo.
30Nkabela aabo basyeede bamusyobo wa Juda bayoolikkalila
mbuli zisyango zisimpide miyanda akulizyalila micelo
31nkaambo mu Jelusalemu kuyooboola basyeede.
Kuzwa mucilundu ca Ziyoni kuyooboola nkamu yabacipona.
Bunkutwe bwa Mwami Leza Singuzuzyoonse mbobuyoocita zeezi.”
32Wakaindilizya akuti, “Nkaako mboobu mbwaamba Mwami Leza
zyamakani aamwami waku Asiliya.
Takoozoonjila mumunzi uuno nikuba kufusa muvwi mulinguwo pe
nikuba kulibonya kulinguwo kajisi antobo,
nikuba kulundika citantaala cavu alinguwo.
33Uyoopiluka anzila eeyo njiyonya njaakaletezya.
Takoozoonjila mumunzi oomu pe, mbwaamba Mwami Leza.
34Nkaambo mebo lwangu ndizookwabilila munzi ooyu
akuuvuna nkaambo kangu akamubelesi wangu Devedi.”
35Masiku ngoonya aayo mungelo wa Mwami Leza wakainka waakujaya bantu basika kuzyuulu zili mwaanda amakumi aali lusele abasanu, muzivuka zya Baasiliya. Lino bantu nibakabuka cifumo-fumo, bakajana kuti kuli milwi-milwi yamitumba. 36Mpoonya Senakelibu mwami waku Asiliya wakazwa ooko wapilukila ku Nineva nkwaakaakukkala. 37Lino bumwi buzuba naakali kukomba muŋanda ya leza wakwe Nisiloki, bana bakwe ba Adulameleki a Syaleza bakamujaya apanga, eelyo bakatijila kunyika ya Alalati. Nkabela Esahadoni mwanaakwe wakaba ngomwami mubusena bwakwe.
Currently Selected:
2 Bami 19: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
