2 Bami 16

Mwami Ahazi wacisi ca Juda

(2 Makani 28.1-27)

1Mumwaka wakkumi aciloba wakulela kwa Peka mwanaa Lemaliya, Ahazi mwanaa Jotamu mwami wa Juda wakatalika kulela. 2Ahazi wakali aamyaka iili makumi obilo naakatalika kulela, nkabela wakalela mu Jelusalemu kwamyaka iili kkumi acisambomwe. Pele taakacita ziluleme ku Mwami Leza, mbuli Devedi sikale wakwe. 3Wakatobela nzila zyabami ba Isilayeli, wakapa mwanaakwe mulombe kuti cibe cipaizyo cakutenta mbubuli zisesemyo zyamisyobo eeyo Mwami Leza njaakatandila Baisilayeli. 4Wakapaizya akutenta tununkilizyo mumalende, mutulundu, amunsi aamasamu.

5Lino Lezini mwami waku Alamu a Peka mwanaa Lemaliya mwami waku Isilayeli bakasika kuzoolwana munzi wa Jelusalemu, bazoosinkilizya Ahaziya, pele bakakacilwa kumuzunda. 6Ciindi eeco nciconya Lezini mwami waku Alamu wakaboozya munzi wa Elati, naakatanda bantu baku Juda. Baedomu mbabakazookkala ku Elati, nkobacibede asunu. 7Aboobo Ahazi wakatumya kuli Tigilatipilesa mwami waku Asiliya kuti, “Boola kuno, uzoondivune, ndemubelesi wako, kuzwa kumwami waku Alamu awaku Isilayeli bandilwana.” 8Alimwi Ahazi wakabweza nsiliva angolida zyakali muŋanda ya Mwami Leza amuziyobwedo zyamuŋanda yabwami, wakazitumya mbuli cipego kumwami waku Asiliya. 9Mpawo mwami waku Asiliya wakazuminina Ahazi, waakulwana munzi wa Damasikasi, akuutola, eelyo wakatola bantu bawo ku Kii akujaya Lezini.

10Lino mwami Ahazi naakainka ku Damasikasi kuyooswaangana a Tigilatipilesa mwami waku Asiliya, wakaakubona cipaililo cakali mu Damasikasi. Mpawo mwami Ahazi wakatumizya Uliya mupaizi buyake bwacipaililo eeco. 11Eelyo Uliya mupaizi wakayaka cipaililo, mbubonya mbuli mbwaakamutumina mwami Ahazi kuzwa ku Damasikasi. Wakacimana katanapiluka kuzwa ku Damasikasi. 12Ciindi mwami naakaboola kuzwa ku Damasikasi akubona cipaililo eeco wakatanta kuya kuli ncico. 13Wakapa zipaizyo zyakutenta azyamaila, zyazyakunywa akusansaila bulowa bwacituuzyo calumvwano ali ncico. 14Nkaako mwami Ahazi wakagwisya cipaililo camukuba ca Mwami Leza, kuzwa akati kacipaililo cakwe eeco aŋanda ya Mwami Leza, wakaciswenya kubbazu lyakunyika lyacipaililo cakwe. 15Mwami Ahazi wakalailila Uziya kuti, “Acipaililo cipya eeci cipati kopa cipaizyo cakutenta cifumo-fumo, alimwi acamaila kumangolezya alimwi akupa cipaizyo cakutenta acamaila camwami lwakwe kubikkilizya acipaizyo cakutenta cabantu boonse bamunyika, antoomwe acipaizyo cabo camaila acacakunywa. Kosansaila bulowa boonse bwazipaizyo zyakutenta azituuzyo. Pele cipaililo camukuba ncenoosondya.” 16Aboobo Uliya mupaizi wakacita mbubonya mbwaakalailila mwami Ahazi.

17Nkabela mwami Ahazi wakakosoola myeendo akugwisya mutiba wakali aciimino alimwi wakagwisya cibumbe caziba cakali abasune bamukuba bakacikwabililide akucibikka antalisyo yamabwe. 18Eelyo mukuyanda kubotezya mwami wa Asiliya, Ahazi wakagwisya nzila iivumbidwe ya Sabata njaakayakide muŋanda ya Leza, alimwi wakajala mulyango wakali kunjila mwami muŋanda ya Mwami Leza. 19Lino eezyo zyoonse Ahazi nzyaakacita azimwi, zililembedwe mubbuku lyamakani aabami ba Juda. 20Aboobo Ahazi wakafwa akuzikkwa abasikale bakwe mumunzi wa Devedi, nkabela Hezekiya wakalela mubusena bwakwe.

Currently Selected:

2 Bami 16: Tonga96

Highlight

Copy

Compare