2 Bami 15

Mwami Azaliya wacisi ca Juda

(2 Makani 26.1-23)

1Mumwaka wamakumi obilo aciloba wakulela kwa Jelobowamu mwami wacisi ca Isilayeli, Azaliya mwana wa Amaziya mwami wacisi ca Juda wakatalika kulela. 2Wakali aamyaka iili kkumi acisambomwe naakaba mwami, nkabela wakalela mu Jelusalemu kwamyaka iili makumi osanwe aibili. Banyina bakali ba Jekoliya bamu Jelusalemu. 3Ooyu wakali kucita ziluleme ku Mwami Leza, mbuli Amaziya wisi. 4Nikuba boobo malende taakaamwaya, aboobo bantu bakacili kupaizya akutenta tununkilizyo ooko. 5Lino Mwami Leza wakasubula Azaliya, wakaba sicinsenda mane do kusikila kulufu lwakwe. Wakali kukkala muŋanda yakwe alikke. Eelyo Jotamu mwanaa mwami nguwakali kulanga zyaŋanda yabwami, akweendelezya bantu bamucisi. 6Lino eezyo zyoonse Azaliya nzyaakacita azimwi zililembedwe mubbuku lyamakani aabami ba Juda. 7Azaliya wakafwa akuzikkwa abasikale bakwe mumunzi wa Devedi. Mpawo Jotamu mwanaakwe nguwakaba mwami mubusena bwakwe.

Mwami Zekaliya wacisi ca Isilayeli

8Mumwaka wamakumi otatwe alusele wakulela kwa Azaliya mwami wacisi ca Juda, Zekaliya mwanaa Jelobowamu wakaba ngomwami wa Baisilayeli mu Samaliya kwamyezi iili cisambomwe buyo. 9Awalo wakabisizya Mwami Leza mbubonya mbuli basikale bakwe. Taakwe naakasiya zibi zya Jelobowamu mwanaa Nebati, eezyo nzyaakasolweda Baisilayeli kuti babisye. 10Lino Syalumu mwanaa Jabesyi wakabukila Zekaliya wamulwana akumujaya bantu kabalangilila, ucimana waba mwami mubusena bwakwe. 11Eezyo Zekaliya nzyaakacita zililembedwe mubbuku lyamakani aabami ba Isilayeli. 12Eeci cakaba mbubonya mbuli Leza mbwaakaambila Jehu kuti, “Lunyungu lwako lunoolela mu Isilayeli kwamazyalani one.”

Mwami Syalumu wacisi ca Isilayeli

13Syalumu mwanaa Jabesyi wakatalika kulela mumwaka wamakumi otatwe afuka wabwami bwa Uziya mwami wacisi ca Juda, nkabela wakalela mu Samaliya kwamwezi omwe. 14Mpoonya Menahemu mwanaa Gadi wakazwida ku Tiiza wakaza ku Samaliya, wazoolwana Syalumu mwanaa Jabesyi wamujaya, waba mwami mubusena bwakwe. 15Eezyo Syalumu nzyaakacita ambwaakabukila mwami, zililembedwe mubbuku lyamakani aabami ba Isilayeli. 16Ciindi eeco Menahemu wakalwana kuzwa ku Tiiza mane waakusika kumunzi wa Tapuwa. Wakasaala zyoonse zyakali mulinguwo atunzi twawo, nkaambo bakakaka kujalula milyango yamunzi. Wakaandula bamakaintu aabo bakaminsi.

Mwami Menahemu wacisi ca Isilayeli

17Mumwaka wamakumi otatwe afuka wakulela kwa Azaliya mwami wacisi ca Juda, Menahemu mwanaa Gadi wakaba mwami wa Isilayeli. Wakalela mu Samaliya kwamyaka iili kkumi. 18Awalo wakabisizya Mwami Leza. Mukulela kwakwe koonse taakwe naakasiya zibi zya Jelobowamu mwanaa Nebati eezyo nzyaakasolweda Baisilayeli kuti babisye. 19Mpawo Tigilatipilesa mwami wacisi ca Asiliya wakayanda kusaala cisi ca Isilayeli, nkaako Menahemu wakamupa matalenta aansiliva aali cuulu kuti amugwasye mukuyumya-yumya bwami bwakwe. 20Mali aaya Menahemu wakaajana ku Baisilayeli. Bantu boonse bakali bavubi wakabalailila kuti babbadele masyekeli aansiliva aali makumi osanwe kutegwa apegwe kumwami waku Asiliya. Nkaako mwami ooyu taakasaala cisi eeci.

21Lino eezyo zyoonse Menahemu nzyaakacita azimwi zililembedwe mubbuku lyamakani aabami ba Isilayeli. 22Menahemu wakafwa akuzikkwa abasikale bakwe, Pekahiya mwanaakwe wakaba mwami mubusena bwakwe.

Pekahiya mwami wacisi ca Isilayeli

23Mumwaka wamakumi osanwe wakulela kwa Azaliya mwami wacisi ca Juda, Pekahiya mwanaa Menahemu, wakaba mwami wacisi ca Isilayeli mu Samaliya, nkabela wakalela kwamyaka yobilo. 24Awalo wakabisizya Mwami Leza taakwe naakasiya zibi zya Jelobowamu mwanaa Nebati eezyo nzyaakasolweda Baisilayeli kuti babisye. 25Mpawo Peka mwanaa Lameliya, umwi wabalupati-pati bakwe wakamubukila. Wakatola baalumi Bagiliyadi bali makumi osanwe baakujaya Pekahiya antoomwe a Agobu a Aliye muciyubilo camuŋanda yabwami ku Samaliya. Wakaba ngomwami mubusena bwakwe. 26Eezyo Pekahiya nzyaakacita azimwi zililembedwe mubbuku lyamakani aabami ba Isilayeli.

Mwami Peka wacisi ca Isilayeli

27Mumwaka wamakumi osanwe aibili yakulela kwa Azaliya wacisi ca Juda Peka mwanaa Lemaliya wakalela Isilayeli mu Samaliya. Nkabela wakalela kwamyaka iili makumi obilo. 28Awalo ooyu wakabisizya Mwami Leza, taakwe naakasiya zibi zya Jelobowamu mwanaa Nebati eezyo nzyaakasolweda Baisilayeli kuti babisye.

29Mubwami bwa Peka, mwami wacisi ca Isilayeli, Tigilatipilesa mwami waku Asiliya wakaboola akuzoosaala Ijoni, Abelabetimaaka, Janowa, Kedesyi, a Hazoo. Wakasaala zisi zya Giliyadi, Galilii, acisi coonse ca Nafutali, nkabela wakatola bantu ku Asiliya mubwaange. 30Mpoonya Hosyeya mwana wa Ela wakabukila Peka mwanaa Lemaliya, wakamulwana akumujaya, eelyo wakaba mwami mubusena bwakwe, mumwaka wamakumi obilo wakulela kwa Jotamu mwana wa Uziya. 31Lino eezyo zyoonse Peka nzyaakacita azimwi, zililembedwe mubbuku lyamakani aabami ba Isilayeli.

Mwami Jotamu wacisi ca Juda

(2 Makani 27.1-9)

32Mumwaka wabili wakulela kwa Peka mwanaa Lemaliya mwami wacisi ca Isilayeli, Jotamu mwana wa Uziya mwami wa Juda wakalela. 33Wakali aamyaka iili makumi obilo aisanu naakatalika kulela. Nkabela wakalela mu Jelusalemu kwamyaka iili kkumi acisambomwe. Banyina bakali Jelusya mwanaa Zadoki. 34Ooyu wakacita ziluleme ku Mwami Leza mbuli Uziya wisi. 35Nikuba boobo taakamwaya malende pe, bantu bakacili kupaizya akutenta tununkilizyo ooko. Jotamu wakayakulula mulyango wakutala waŋanda ya Mwami Leza. 36Lino eezyo zyoonse Jotamu nzyaakacita azimwi, zililembedwe mubbuku lyamakani aabami ba Juda. 37Mumazuba aayo Mwami Leza wakatalika kutuma Lezini mwami wacisi ca Alamu a Peka mwanaa Lemaliya kuzoolwana cisi ca Juda. 38Jotamu wakafwa akuzikkwa abasikale bakwe mumunzi wa Devedi, eelyo Ahazi wakalela mubusena bwakwe.

Currently Selected:

2 Bami 15: Tonga96

Highlight

Copy

Compare