1 Samuyele 4
4
Mbulyakajatwa bbokesi lyacizuminano ca Mwami Leza
1Lino cimwi ciindi Baisilayeli bakainka kuyoolwana a Bafilisiti, Baisilayeli bakayaka zivuka zyabo ku Ebeneza, Bafilisiti bakayakila ku Efeki. 2Bafilisiti bakalibambila kuti balwane a Baisilayeli. Ciindi nkondo niyakavuta, Baisilayeli bakazundwa, basilumamba bakajaigwa munkondo eeyo bakatisike kuzyuulu zyone. 3Ciindi basilumamba nibakapiluka kuzivuka zyabo, bapati ba Baisilayeli bakati, “Ino nkaambo nzi Mwami Leza naacita kuti sunu tuzundwe a Bafilisiti? Atukalete bbokesi lyacizuminano ca Mwami Leza ku Syilo kutegwa lyuunke andiswe ndendilyo Mwami Leza nayootuvuna kuli basinkondoma.” 4Mpawo bakatuma bamwi ku Syilo, bakaakulijana bbokesi lyacizuminano ca Mwami Leza Singuzuzyoonse uukkala akati kabakelebu. Bana ba Eli ba Hofuni a Fineyasi, bakasika kabayumwide bbokesi lyacizuminano ca Mwami Leza.
5Lino bbokesi lyacizuminano ca Mwami Leza nilyakasika ku zivuka zyabo, boonse Baisilayeli bakavutuka kapati cakuti nyika yakazungaana. 6Lino Bafilisiti nibakamvwa kuyobeka ooko bakati, “Ino kuyobeka koonse ooko kuzivuka zya Bahibulu nkwanzi?” Bafilisiti nibakaziba kuti bbokesi lya Mwami Leza balileta kuzivuka zya Baisilayeli 7bakayoowa bakati, “Umwi wabaleza wasika kuzivuka zyabo, Maawe! Twamana. Taakwe nicakacitikide kale cili mbuli ceeci. 8Maawe! Ino nguni uukonzya kutuvuna kuzwa kunguzu zyabaleza aaba bayumu? Mbaaleza aabo bakajaya Baijipiti munkanda acuumo. 9Amuyume, mube baalumi bazyandamene Nobafilisiti, buyo-buyo inga tulaba bazike ba Bahibulu mbubonya mbuli mbubakali bazike besu. Aboobo amulwane mbuli baalumi bazyandamene.” 10Nkabela Bafilisiti bakalwana canguzu, eelyo Baisilayeli bakazundwa, bakabweeda kuminzi yabo batija. Basilumamba basimaulu bakajaigwa buzuba oobo bakali banji, bakasika kuzyuulu zili makumi otatwe. 11Alimwi bbokesi lya Mwami Leza lyakajatwa, abalo bana ba Eli ba Hofuni a Fineyasi, bakajaigwa.
Lufu lwa Eli
12Lino buzuba mbubonya oobo umwi mwaalumi wamusyobo wa Benjamini wakatija kuzwa kunkondo yakali kulwanwa, waya ku Syilo akuyoosika mubuzuba oobo mbubonya. Kutondezya mause aakwe, wakadelaula zisani akulamba vu kumutwe. 13Naakasika Eli wakalikkede mucuuno cakwe kumbali lyamugwagwa, kalangilila. Wakalipengede kapati akaambo kabbokesi lya Leza. Lino mwaalumi ooyo naakanjila mumunzi wakaambilizya cakacitika, nkabela munzi woonse wakabunga dilwe. 14Eelyo Eli naakamvwa koomoka ooko, wakabuzya wati, “Ino nkoomoka nzi ooku?” Lino mwaalumi ooyo wakafwambaana kuya kuli Eli kuyoomwaambila makani oonse. 15Ciindi eeco Eli wakalijisi myaka iili makumi aali fuka alusele, alimwi ciindi eeci wakali kuya boofwaala. 16Mpoonya mwaalumi ooyo wakati, “Ndatija kuzwa kunkondo, ndaboola ndizabuzuza.” Eli wakamubuzya kuti, “Ino ncinzi cacitika mwanaangu?” 17Sikuleta makani wakaingula kuti, “Baisilayeli batija kuzwa ku Bafilisiti. Banji besu bajaigwa. Abalo bana bako ba Hofuni a Fineyasi bajaigwa, alimwi abbokesi lya Mwami Leza lyatolwa.”
18Mwaalumi ooyo naakaamba makani aa bbokesi lya Mwami Leza, Eli wakawa nsalamwa kuzwa acuuno cakwe kumbali lyamulyango. Mukuti wakalicembeede akuneneya kapati nsingo yakatyoka mpawo wakafwa. Wakali musololi mu Isilayeli kwamyaka iili makumi one.
Lufu lwamukaintu wa Fineyasi
19Mukamwana wa Eli, mukaintu wa Fineyasi, wakali minsi, alimwi ciindi cakutumbuka cakali aafwiifwi. Ciindi naakamvwa kuti bbokesi lya Mwami Leza lyatolwa, akuti wisizyala amulumi wakwe boonse balifwide, wakamyongwa kapati cakuti cakakatazya. 20Lino kayanda kufwa, basikumutumbusya bakati, “Utatyompwi. Ulaamwana mulombe.” Pele wakacinyina mputo taakaingula pe. 21Kumane mwanaakwe wakamuulika zina lya Ikabodi, lyaamba kuti, “Bulemu bwa Mwami Leza bwazwa mu Isilayeli.” Wakaamba oobo nkaambo bbokesi lya cizuminano lyakatolwa, alimwi wisizyala amulumaakwe bakafwa. 22Wakati, “Bulemu bwa Mwami Leza bwazwa mu Isilayeli, nkaambo bbokesi lya Mwami Leza lyatolwa.”
Currently Selected:
1 Samuyele 4: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
