1 Samuyele 3
3
Mwami Leza mbwaakalibonya kuli Samuyele
1Lino mulombe Samuyele wakali kubelekela Mwami Leza kalangwa a Eli. Mumazuba aayo kwakali kutambulwa buyo makani mace kuzwa ku Mwami Leza, nkabela azyalo zilengaano zizwa kulinguwe zyakali zice. 2Bumwi busiku Eli wakali kuya boofwaala, wakalilede mubusena bwakwe. 3Lino Samuyele wakalilede muŊanda ya Mwami Leza, oomo bbokesi lya Leza molyakabede. Nkabela lambe lya Leza lyakacili kuyaka. 4Mwami Leza wakaita Samuyele, nkabela wakavuwa kuti, “Ndime!” 5Mpoonya wakazuzila kuli Eli waakuti, “Ndaboola, nkaambo wandiita.” Pele Eli wakaingula kuti, “Taakwe nindakwiita pe. Koya ukalale.” Aawo Samuyele wakabweeda kukoona.
6Lino Mwami Leza wakaita Samuyele alimwi. Eelyo Samuyele wakabuka, wakainka kuli Eli waakuti, “Ndaboola, nkaambo wandiita.” Pele Eli wakaingula kuti, “Taakwe nindakwiita mwanaangu. Koya ukalale.” 7Taakanaziba mbwaita Mwami Leza pe, nkaambo Mwami Leza taakanaambawide kulinguwe.
8Lino Mwami Leza wakaita Samuyele lwatatu, eelyo wakabuka akuya kuli Eli waakuti, “Ndaboola, nkaambo wandiita.” Mpoonya Eli wakaziba kuti Mwami Leza nguuita mulombe. 9Aboobo wakamwaambila kuti, “Koya ukalale, kuti naa akwiite alimwi, waambe kuti, ‘Koamba, O Mwami Leza, mubelesi wako ulaswiilila.’” Aboobo Samuyele wakabweeda kukoona.
10Lino Mwami Leza wakaboola, wakaima mbubonya mbuli mbwaakali kucita ziindi zyoonse, waita wati, “Samuyele! Samuyele!” Samuyele wakaingula, wakati “Koamba, O Mwami Leza, mubelesi wako ulaswiilila.”
11Mpawo Mwami Leza wakati kulinguwe, “Swiilila ndiyanda kucita cimwi cintu kubantu ba Isilayeli, calo ciyoogambya kapati cakuti kufumbwa muntu uyoomvwa uyookankamana. 12Ciindi eeco njooleta bukali bwangu kumukwasyi wa Eli kuzwa kumatalikilo kusikila kumamanino. 13Ndakamwaambila kale kuti ndiyanda kusubula mukwasyi wakwe mane kukabe kutamani, nkaambo bana bakwe balombe balandisampaula. Lino Eli wakalizi kuti balacicita eeci, pele taakwe naakabakasya pe. 14Nkaako ndakonkezya kuti mulandu wamukwasyi wa Eli tuukakombelezegwi acipaizyo niciba cituuzyo.”
15Lino Samuyele wakalala mane kusikila bwaca, mpoonya wakabuka, wajula milyango yaŋanda ya Mwami Leza. Samuyele wakayoowa kwaambila Eli makani aacilengaano. 16Lino Eli wakaita Samuyele wakati, “Samuyele, mwanaangu.” Samuyele wakaingula kuti, “Ndime.”
17Mpawo Eli wakamubuzya kuti, “Ino Mwami Leza wakwaambila nzi? Utandisisi niciba cintu comwe. Leza akusubule bweelede alimwi akwiindilila kuti naa utandaambili zyoonse nzyaakwaambila.” 18Mpoonya Samuyele wakamwaambila makani oonse, taakwe ncaakasisa niciba cintu comwe. Lino Eli wakati, “Ngu Mwami Leza, acite kufumbwa cimubotela.”
19Nkabela Samuyele wakakomena, awalo Mwami Leza wakali aanguwe, wakacita zyoonse eezyo Samuyele nzyaakaamba kuti zibe zyakasimpe. 20Aboobo bantu boonse ba Isilayeli kuzwida ku Dani kusikila ku Biyasyiba bakaziba kuti Samuyele nguwakasalwa kuba musinsimi wa Mwami Leza. 21Eelyo Mwami Leza wakali kulibonya ku Syilo, ooko nkwaakaliyubununa kuli Samuyele akwaambaula kulinguwe. Zyakaamba Samuyele zyakamvwigwa mu Isilayeli.
Currently Selected:
1 Samuyele 3: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
