1 Samuyele 5
5
Bbokesi lyacizuminano ca Mwami Leza akati ka Bafilisiti
1Lino Bafilisiti nibakamana kutola bbokesi lya Mwami Leza, bakalibweza kuzwa ku Ebeneza akulitola kumunzi wa Asyidodi. 2Bakalitola mukakombelo kaleza wabo Dagoni, akuliimika kumbali lya Dagoni. 3Lino nibwakaca cifumo-fumo, bantu baku Asyidodi bakabona kuti Dagoni wawa, ulivunteme kumbele lyabbokesi lya Mwami Leza. Bakamubweza akumwiimika mubusena bwakwe. 4Alimwi nibwakaca cifumo-fumo bakabona kuti Dagoni wawa alimwi ulivunteme kumbele lyabbokesi lya Mwami Leza. Mutwe amaanza aakwe oonse akalikomookede, zyakalisalangene acikunguzyo, pele buyo citimbi-timbi cilikke ncecakasyeede. 5Nkankakaako bapaizi ba Dagoni abaabo bakombi nibanjila muŋanda yakwe mu Asyidodi ncobacisotoka cikunguzyo akutalyata mpawo asunu.
6Nkabela Mwami Leza wakabasubula kapati bantu baku Asyidodi abaabo mbobakabambene limwi kwiindila mukubaumya zyuute. 7Nibakabona eeco cakali kucitika bakati, “Leza wa Isilayeli watusubwida antoomwe aleza wesu Dagoni. Tatweelede kunoocibambide bbokesi lya Leza ooyo kuno pe.” 8Aboobo bakatumya nkombe kubaleli boonse ba Bafilisiti akubabuzya kuti, “Ino tulalicita buti a bbokesi lya Leza wa Baisilayeli?” Balo bakati, “Amulitole ku Gati.” Bakalitola ooko. 9Nibakamana kulitola akuyoolisisya ooko Mwami Leza wakasubula munzi ooyo akuupyopyonganya. Mwami Leza wakabasubula kwiindila mukutumya zyuute eezyo zyakacisa bantu boonse bamumunzi ooyo, baniini abapati mbubonya buyo. 10Aboobo bakatumina bbokesi lya Mwami Leza kumunzi wa Ekiloni. Lino ciindi nilyakaakusika ooko, bantu bakatalika kulila akwaamba kuti, “Balileta okuno bbokesi lya Leza wa Baisilayeli kuti toonse tujaigwe abantu besu.” 11Alimwi bakatumya nkombe kubaleli ba Bafilisiti akuti, “Amutumine bbokesi lya Leza wa Isilayeli ooko nkulyakazwida kutegwa litatujayi antoomwe abantu besu.” Bantu boonse bamumunzi bakayoowa kuti inga bamana kufwa, nkaambo Leza wakali kubasubula. 12Aabo bakafwa, bakaumizigwa zyuute, nkaako bantu bakali kulila kapati.
Currently Selected:
1 Samuyele 5: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
