1 Samuyele 26
26
Devedi mbwaakaleka Saulu alimwi
1Lino Bazifu bakasika kuli Saulu ku Gibeya, kabaamba kuti, “Devedi uliyubide mucilundu ca Hacila cili kujwe lya Jesyimoni.” 2Eelyo Saulu wakanyamuka akuunka kunkanda yaku Zifu abaalumi basalidwe Baisilayeli bali zyuulu zyotatwe, kuti bakayandaule Devedi kunkanda ooko. 3Saulu wakayaka zivuka mucilundu ca Hacila, cili kumbali aamugwagwa kujwe lya Jesyimoni. Pele Devedi wakacilikkede munkanda. Ciindi naakabona kuti Saulu wasika kuzoomuyandaula munkanda, 4Devedi wakatuma basikutwela, eelyo bakabona kuti Saulu wasika ncobeni. 5Mpoonya wakanyamuka akusika kubusena oobo Saulu mpaakayakide, eelyo wakabona aakali koona Saulu a Abina, mwanaa Nee, silutwe wabasilumamba. Saulu wakali kulala akati kazivuka, basilumamba bakalede muzivuka zyakamuzingulukide.
6Lino Devedi wakati kuli Ahimeleki Muhiti akuli Abisyayi mwanaa Zeluyiya, mupati wa Jowabu, “Nguni uutindisindikile, tuseluke kuya kuzivuka zya Saulu?”
Abisyayi wakati, “Mebo ndilakusindikila.”
7Aboobo Devedi a Abisyayi bakainka kuli basilumamba ba Saulu ciindi camasiku, nkabela ooko Saulu wakalilede mucivuka cakwe asumo kalisimpide ansi kumitwe, Abina abasilumamba bakalilede kabamuzingulukide. 8Mpawo Abisyayi wakati kuli Devedi, “Sunu Mwami Leza waaba sinkondonyoko kulinduwe, ndizumizye kuti ndimuyase sumo lijatikizye aansi lweendo lomwe, nsikooindulula alwabili pe.”
9Devedi wakati kuli Abisyayi, “Utamunyonyooni, nkaambo taakwe muntu uukonzya kucisa munanike wa Mwami Leza akutaba aamulandu.” 10Amane wakakomba wakati, “Mbubonya mbuli Mwami Leza mbwali muumi, Mwami Leza mwini nguuyoouma Saulu, ciindi cakwe cakufwa caakusika, nikuba kuyoofwida munkondo. 11Mwami Leza andilesye kuti intalwani mwami ngwaakabika, bweza buyo sumo lili kumutwe lyakwe akankuli kamaanzi, twamana tweende.” 12Aboobo Devedi wakabweza sumo akankuli kamaanzi kakali kumutwe lya Saulu, eelyo bakainka. Nkabela taakwe mwaalumi naba omwe wakacibona, naa wakacizi, naa wakasinsimuka. Nkaambo kakuti Mwami Leza nguwakabooneka.
13Lino Devedi wakainka mutala limwi akwiima atala aacilundu. Akati kabo kwakali kkuti pati. 14Aawo Devedi wakoongolweda silumamba a Abina mwanaa Nee wakati, “Sena tovuwi yebo Abina?”
Mpoonya Abina wakaingula kuti, “Nduweni yebo ooita mwami kuno?”
15Mpawo Devedi wakati kuli Abina, “Sena toli nduwe mwaalumi? Ino nguni uuli mbuli nduwe Muisilayeli? Nkaambo nzi nootalindilila mwami simalelo wako? Nkaambo umwi muntu walisikide kuzoonyonyoona mwami simalelo wako. 16Eeci cintu ncoocita tacili kabotu pe. Mbubonya mbuli Mwami Leza mbwali muumi, mweelede kujaigwa nyoonse, nkaambo kakutalindila mwami wanu, munanike wa Mwami Leza. Lino bona, ino sumo lya mwami lilikuli, alimwi kali kuli kankuli kamaanzi aako kakali kumutwe lyakwe?”
17Saulu wakaliziba jwi lya Devedi akwaamba kuti, “Sena eeli jwi ndilyako, mwanaangu Devedi?”
Eelyo Devedi wakati, “Ndijwi lyangu, o mwami wangu simalelo wangu.” 18Wakaindilizya akuti, “Ino nkaambo nzi mwami wangu uza butobela mubelesi wakwe? Ino ndacita nzi? Mulandu nzi ngwejisi? 19Aboobo lino mwami simalelo wangu, aswiilile majwi aamubelesi wakwe. Kuti naa Mwami Leza nguwabusya nkondo kuti uzoondilwane aatambule cipaizyo, pele kuti naa mbatu buyo, Mwami Leza abasinganye nkaambo banditanda kuti intanookkali ambabo munyika ya Leza. Bati, ‘Koya, ukabelekele baleza bambi.’ 20Nkaako utandileki kuti nkafwide kulaale abusena bwa Mwami Leza, nkaambo mwami wa Isilayeli waboola kuzooyandaula ndime neeli mbuli njina, mbuli muntu uuvwima kwale muzilundu.”
21Mpoonya Saulu wakati, “Ndabisya. Piluka, mwanaangu Devedi, nsikooyookucitila limbi cibi pe, nkaambo wandileka akutandijaya sunu buno buzuba. Langa, ndacita cabufuba-fuba akubisya kapati.”
22Eelyo Devedi wakaingula kuti, “Langa, ndeeli sumo lyamwami. Tuma umwi wabasinkondo bako azoolitole. 23Mwami Leza ulalumbula muntu amuntu kweendelana abululami abwini bwakwe. Mwami Leza walikwaabide kulindime sunu, pele tiindakujaya mukuti uli munanike wa Mwami Leza. 24Langa, mbubonya mbuli mbwindaleka buumi bwako sunu buzuba buno, mbubonya oobo Mwami Leza akwabilile buumi bwangu, alimwi alwangu andikwabilile.”
25Mpoonya Saulu wakati kuli Devedi, “Mwami Leza akuleleke mwanaangu Devedi. Uyoocita zintu zigambya alimwi uyoozwidilila.” Mpoonya Devedi wakainka, awalo Saulu wakabweeda kulimbabo.
Currently Selected:
1 Samuyele 26: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
