1 Samuyele 25

Lufu lwa Samuyele

1Lino Samuyele wakafwa, nkabela Baisilayeli boonse bakabungana kuzoomulila akumuzikka kumunzi wakwe ku Lama.

Devedi a Abigelo

Mpoonya Devedi wakanyamuka, wainka kunkanda yaku Palani. 2Ooko kwakali mwaalumi ku Maoni wakajisi nyika kumunzi wa Kaameli. Mwaalumi ooyu wakali muvubi kapati, wakalijisi mbelele zili zyuulu zyotatwe ampongo zili cuulu. Bumwi buzuba wakali kugela mbelele zyakwe ku Kaameli. 3Mwaalumi ooyu wakali Nabali, waciinga ca Kalebi. Mukaintu wakwe wakali Abigelo. Mukaintu ooyu wakali musongo, alimwi wakali mubotu. Pele mwaalumi wakali silunya wakandwane-ndwane.

4Devedi wakamvwa ciindi naakali munkanda kuti Nabali wakali kugela mbelele zyakwe. 5Mpoonya Devedi wakatuma balombe bali kkumi, wakati kulimbabo, kamuya ku Kaameli, muye kuli Nabali mukandijuzizye. 6Alimwi wakati mukaambe kuti, “Luumuno lube kulinduwe, alimwi lube kuŋanda yako alimwi alube akuli eezyo zyoonse nzyojisi. 7Ndakamvwa kuti ulijisi bageli, ciindi beembezi bako nibakali aandiswe, taakwe cibi ncitwakabacita pe, alimwi taakwe ncitwakababbida, kwaciindi coonse ncibakali ku Kaameli. 8Buzya balombe bako buyo, balakwaambila. Aboobo balombe bangu ubabede aaluse, mbuli mbutwasika mubuzuba bwapobwe. Ndakukomba tupe kufumbwa ncokonzya mebo ndemweenzinyoko Devedi ababelesi bangu aaba.”

9Ciindi balombe ba Devedi nibakasika, bakacaamba coonse eeci kuli Nabali muzina lya Devedi. Bamane bakalindila. 10Lino Nabali wakaingula babelesi ba Devedi kuti, “Ino Devedi mwanaa Jese nguni? Mazuba aano kuli bazike banji baloboka kuzwa kuli basimalelo babo. 11Sena ndibweze cakulya cangu anyama yangu eeyo njendajaila bageli bangu akuzipa bantu aabo mbentezi ankobazwida?”

12Aboobo balombe ba Devedi bakapiluka akuzoomwaambila makani aaya. 13Eelyo Devedi wakaambila bantu bakwe kuti, “Muntu amuntu alyaangilile panga lyakwe.” Nkabela bantu boonse bakalyaangilila mapanga aabo muzibuno, Devedi awalo wakalyaangilila panga bainka, mbaakali aabo bakatisike myaanda yone, bali myaanda yobilo bakasyaalila zintu zyabo.

14Pele umwi wabalombe wakaambila Abigelo mukaintu wa Nabali kuti, “Bona, Devedi wakatuma bantu kuzwa munkanda kuti bazoojuzye simalelo wesu, pele wakabakalalila kapati. 15Nikuba boobo aaba bantu bakali kabotu kulindiswe, taakwe nitwakakatazyanya ambabo pe, alimwi taakwe nitwakasweekelwa cintu ciindi nitwakacili musokwe, mumazuba oonse ngetwakali aabo katweembela mbelele. 16Masiku amasikati bakali kutukwabilila mbuli lubaya kwaciindi coonse ncitwakali aabo katweembela mbelele. 17Lino ndati ucizibe eeci alimwi uyeeye mboelede kucita, nkaambo eeci inga cajazya simalelo wesu aboonse baŋanda yakwe, alimwi ngusicinguni kapati, ngu nkwaambila bbwe.”

18Mpoonya Abigelo wakafwambaana kubweza zinkwa zili myaanda yobilo, nkomo zyawaini zyobilo, nyama yakayokedwe kale yambelele zyosanwe, zisuwo zyamaila aakangidwe zyosanwe zisankata zyansaansa ziyanikidwe zili mwaanda, azibunge zyankuyu ziyanikidwe zili myaanda yobilo akuzibikka atala aambongolo. 19Eelyo wakati kubalombe bakwe, “Kamuya kumbele lyangu, mebo ndaza musule lyanu.” Pele taakwe naakaambila mulumi wakwe Nabali pe.

20Lino mbwaakatantila buyo ambongolo akusika kubusena busisikidwe bwacilundu, wakabona Devedi abantu bakwe kabaza kulinguwe, lino wakaswaangana ambabo. 21Devedi wakaambide kuti, “Ncobeni ndakasowa buyo ciindi cangu kumulangila zyoonse nzyajisi ooyu muntu munkanda, mane cakuti taakwe niciba comwe cakasweeka kuli zyoonse nzyajisi, pele mebo wandibweedezezya bubi muciindi cabubotu. 22Mwami Leza andisubule alimwi akwiinda kuti naa cifumo nkasiye mwaalumi naba omwe muli baabo baŋanda yakwe.”

23Ciindi Abigelo naakabona Devedi, wakafwambaana kuseluka ambongolo akuvuntama ansi kumbele lya Devedi wamukotamina. 24Nkabela wakawida kumaulu aakwe akuti, “O mwami, mulandu ube wangu endike. Ndakukomba, mubelesi wako aambaule kulinduwe. Swiilila majwi aamubelesi wako. 25O mwami wangu utabikkili mulandu mulumaangu uulya silunya, nkaambo mbubuli zina lyakwe awalo mbwabede, Nabali ndezina lyakwe, nkabela abufuba buli mulinguwe. Pele mebo ndemubelesi wako taakwe nindakabona balombe bako omwami wangu aabo mbookatuma. 26Lino o mwami wangu, Leza mbwali muumi ayebo mbuli mboli muumi, ncobeni Mwami Leza akukasye kuti utatili bulowa, alimwi utapilusyi cibi ajanza lyako omwini. Lino aabo basinkondonyoko bayanda kukucita cibi bakasubulwe mbuli Nabali. 27Eezi zipo nzindaleta ndemubelesi wako kulinduwe o mwami wangu zipegwe kubantu mbomuli aabo. 28Ndakukomba kojatila mulandu wamubelesi wako. Ncobeni Mwami Leza uyoobikka mukwasyi wako mubwami bwiimvwi nji, nkaambo ulwanina Mwami Leza nkondo. Aboobo utakabi nocita cibi mubuumi bwako boonse. 29Kuti naa kuli bantu bakutobela mukuti bakujaye, Mwami Leza uyookukwabilila mbubuli muntu mbwayobola lubono lwakwe mumusantu. Buumi bwasinkondonyoko buyoofuswa mbubonya mbuli cintu cifuswa akwibba. 30Mwami Leza uzookucitila bubotu boonse mbwabambide, akukubikka kuba mwami wa Isilayeli yoonse. 31Ciindi eeco tokoozooba abuusu akupenga mumoyo, akaambo kakutila bulowa kaatakwe mulandu, nikuba kubweedezya bubi. Ciindi Mwami Leza waakukucitila bubotu, ukandiyeeye ndemubelesi wako.”

32Mpawo Devedi wakati kuli Abigelo, “Alumbwe Mwami Leza, Leza wa Isilayeli, ooyu wakutuma mubuzuba buno kuzoondicingauzya. 33Mwami Leza akuleleke nkaambo ka busongo bwako bwandikasya buno buzuba kutila bulowa akuli bweedezezya bubi mebo lwangu ajanza lyangu. 34Mwami Leza wa Isilayeli nguwandikasya kukucisa, nootafwambaana kuzoondicingauzya, nkasimpe naatakwe wali kunoozoosyaala kuli Nabali junza cifumo mwana mulombe naba omwe.” 35Mpoonya Devedi wakatambula kuzwa kumukaintu ooyo eezyo nzyaakamweetela wakati kulinguwe, “Koya kuŋanda yako muluumuno. Bona, ndaswiilila majwi aako, alimwi ndazumina ncooamba.”

36Eelyo Abigelo wakapiluka kuli Nabali, wakajana ulaapobwe muŋanda yakwe, mbubonya mbuli pobwe lyamwami. Ciindi eeco Nabali wakalikondedwe, kapati. Abigelo taakwe naakamwaambila cintu niciba comwe mane do nibwakaca. 37Cifumo-fumo munzuwe niwakamumana, mukaintu wakwe wakamwaambila eezi zintu, eelyo moyo wakwe wakaleka kubeleka kabotu, aboobo mubili wakayuma mbubonya mbuli bbwe. 38Nikwakainda mazuba aali kkumi, Mwami Leza wakauma Nabali, wakafwa.

39Ciindi Devedi naakamvwa kuti Nabali wakafwa, wakati, “Alumbwe Mwami Leza wakabweedezya cibi camasampu aakandicita Nabali akundilesya mebo ndemubelesi wakwe kuti intaciti cibi. Mwami Leza wabweedezezya bubi bwa Nabali alinguwe mwini.”

Mpoonya Devedi wakatumizya balombe kuli Abigelo kuti bamwaambauzizye. 40Ciindi babelesi ba Devedi nibakasika kuli Abigelo ku Kaameli, bakamwaambila kuti, “Devedi watutuma kulinduwe kuti tukutole kuti ube mukaintu wakwe.”

41Mpoonya Abigelo wakanyamuka akukotamika busyu bwakwe ansi akwaamba kuti, “Mebo ndemubelesi wanu ndilibambilide nikuba kusanzya zituta zyanu.” 42Mpoonya Abigelo wakafwambaana kunyamuka akutanta mbongolo, alimwi wakatolelezya abasimbi bakwe bosanwe. Walo wakali kweendela musule lyabatumwa ba Devedi, mbombuboobu mbwaakakwatwa.

43Alimwi Devedi wakakwata Ahinowamu uuzwa ku Jezuliili, eelyo boonse aaba bobilo bakaba bakaintu bakwe. 44Ciindi eeco Saulu wakakwesye kale Mikalo, muka Devedi, kuli Paliti mwanaa Laisyi wakali waku Galimu.

Currently Selected:

1 Samuyele 25: Tonga96

Highlight

Copy

Compare