1 Samuyele 27
27
Devedi akati ka Bafilisiti
1Lino Devedi wakati mumoyo wakwe, “Bumwi buzuba njoojaigwa aa Saulu, taakwe cintu cibotu ncendikonzya kucita kwiinda kuti nditijile kunyika ya Bafilisiti. Saulu natilengaane kundiyandaula mukati kaminyinza ya Isilayeli, mbwekonzya kulikwabilila oobo.” 2Aawo Devedi wakanyamuka wainka, lwakwe abaalumi bali myaanda iili cisambomwe aabo mbaakali aabo. Wakasika kuli Akisyi mwanaa Maoku, mwami wa Gati. 3Devedi wakakkala a Akisyi mu Gati, abantu bakwe, boonse amikwasyi yabo, Devedi wakatolelezya abakaintu bakwe bobilo, Ahinowamu waku Jezuliili a Abigelo waku Kaameli, mukamufu Nabali. 4Ciindi Saulu naakaambilwa kuti Devedi wakatijila ku Gati, taakwe naakacili kumuyandaula limbi pe.
5Devedi wakati kuli Akisyi, “Kuti katuyanzene, undipe busena bumwi bwakukkala mumunzi umwi wacisi cako, kuti kandikkala ooko. Ino nkaambo nzi mubelesi wako nceelede kukkala mumunzi wabwami?” 6Akisyi wakamupa Zikilagi, ncenciceeco Zikilagi ncuuli munzi wabami ba Juda kusikila kubuzuba buno. 7Devedi wakakkala mucisi ca Bafilisiti kwamwaka amyezi yone.
8Lino Devedi abantu bakwe bakainka kuyoosaala Bagesyu, Bagezili a Baameleki, aaba mbabakali kukkala mucisi eeci kwamyaka, bakali kusikila ku Syuu kunyika ya Ijipiti.
9Devedi wakanyonyoona cisi coonse, taakwe muntu ngwaakasiya kali muumi naba mwaalumi naba mukaintu. Wakatola mbelele, ŋombe, mbongolo, nkamela, azibaki, amane wakapilukila kuli Akisyi. 10Ciindi Akisyi naakali kubuzya kuti, “Ino nguni ngumwasaala sunu?” Devedi wakali kuti, “Twali kubbazu lyakumusanza kulwana Bajuda, naa kunyika ya Bajelamiili naa kunyika ya Bakeni.” 11Devedi taakwe naakali kusiya mwaalumi naba mukaintu kacipona, wakuleta makani ku Gati, kayeeya kuti, “Ambweni inga balatutola mpuwo yakuti, ‘Mboobu mbwaacita Devedi.’” Eeci ncicakali cilengwa cakwe ciindi coonse ncaakakkede mucisi ca Bafilisiti. 12Eelyo Akisyi wakasyoma Devedi kayeeya kuti, “Walibisya lwakwe mwini ku Baisilayelinyina, nkaako unooli mubelesi wangu lyoonse.”
Currently Selected:
1 Samuyele 27: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
