1 Bami 7

Ganda lya Solomoni lyabwami

1Solomoni cakamutolela myaka iili kkumi aitatu kumanizya ganda lyakwe lyabwami. 2Wakayaka ganda lya azisamu zyaku Lebanoni, lyakali kulampa tukokola tuli mwaanda. Mubwamba lyakali kulampa tukokola tuli makumi osanwe, kuya mujulu lyakali kulampa tukokola tuli makumi otatwe. Lyakalijisi milongo yone yazicinda zyamapulanga aamulombe iibambene. 3Kwakali mbalo zyamulombe zyakainganyizidwe aazicinda eezyo. Mbalo eezyo zyakali makumi one aasanu. Kulubazu lomwe-lomwe zyakali kkumi azisanu. 4Kwakali mpulungwido zyakalangene zyotatwe-zyotatwe. 5Lino mafulemu aamilyango akaleelene moonse-moonse alimwi akali langene otatwe-otatwe. 6Ganda eeli lyakali kulampa tukokola makumi osanwe, mubwamba lyakali kulampa makumi otatwe. Lyakalijisi akkoce lijisi zicinda, acikwabilizyo kumbele.

7Solomoni wakakosola ŋanda yabwami yakali kutegwa cibetekelo. Yakayakidwe amapulanga aamulombe kuzwida ansi kusikila kumasomo. 8Ŋanda Solomoni njaakali kuyookkala lwakwe mwini yakayakilidwe kusule kiili mbubonya mbuli aamwi. Alimwi Solomoni wakayaka aimbi ŋanda, iili mbubonya, eeyo wakiiyakila mwanaa Falo, ngwaakakwete.

9Maanda aaya kubikkilizya acibetekelo akayasyigwa amabwe aabezedwe cabuuya kusikila kuciluli, mwaali mukati akusule akalibendulwidwe amasaha. 10Ntalisyo yamaanda aaya yakayakidwe aamabwe mabotu, amwi mabwe akali kulampa tukokola tuli kkumi, alimwi amwi akali kulampa tukokola tuli lusele. 11Nkabela atala aamabwe aaya kwakali aamwi mabwe aakagonkoledwe alimwi amapulanga aamulombe. 12Lino bbetekelo ankuta yamukati kaŋanda ya Leza, alimwi aŋanda yamukati yakumanjililo aaŋanda ya Leza, bbuwa lizingulukide ŋanda eeyo zyakayakidwe aamilongo yamabwe aailikene yotatwe atala. Milongo eeyi yakakwabilidwe.

Zintu zyamukuba zyakabikkidwe muŋanda ya Leza

13Lino mwami Solomoni wakatuma kuti kukaletwe muntu uuitwa kuti Hulamu, muntu waku Taya wakajisi luzibo mukupanga zintu zyamukuba. 14Banyina bakali bamukamufu, bakali bamusyobo wa Nafutali, wisi wakali waku Taya, wisi awalo wakali muntu uujisi luzibo muli zyamukuba. Hulamu wakajisi luzibo lunji mukupanga zintu zyoonse zyamukuba. Wakaboola kumwami Solomoni akuzoocita milimo yoonse njaakaambilwa.

Zicinda zyamukuba zyobilo

(2 Makani 3.15-17)

15Hulamu wakafula zicinda zyamukuba zyobilo bupati bwa comwe-comwe bwakali tukokola tuli kkumi atubili, bulamfu bwakali tukokola tuli kkumi alusele, wakaziimika kumulyango waŋanda ya Leza. 16Alimwi wakabikka zipumpu zyobilo zyamukuba zyakali kulampa tukokola tosanwe comwe-comwe, wakazibikka atala aazicinda. 17Zipumpu eezi zyakabotezegwa atuwenge twakalukidwe kabotu-kabotu, twakuzivumbilizya. 18Wakapanga amizila yobilo yamapomegileneti.

19Zipumpu eezi zyakapangidwe mbubonya mbuli mpana. Zyakali tukokola tone mukutuntumana. 20Zipumpu zyakali atala aazicinda, kwaambisya zicinda mpozyakaselebede munsi aatuwenge tulukidwe. Acipumpu comwe-comwe kwakali mizila yobilo yamapomegileneti aali myaanda yobilo. 21Hulamu wakasimpa zicinda eezyo kumbele lyamulyango waŋanda ya Leza cicinda cakumusanza wakaciita kuti Jakini, cakunyika wakaciita kuti Bowazi. 22Zipumpu eezi zyakali mbuli mpana. Mbombuboobu mbwaakamanizya mulimo wazicinda.

Cibumbe cazisa

(2 Makani 4.2-5)

23Alimwi Hulamu wakapanga cibumbe caziba lyamukuba bwaasa bwaco bwakali tukokola tuli kkumi, bulamfu bwakuya mujulu bwakali tukokola tosanwe, kweeleka butuntuli cakali tukokola tuli makumi otatwe. 24Munsingo calyo kuzinguluka kwakali mizila yobilo yatunkuli twamukuba, tunkuli ooto wakatupangila aamwi acibumbe caziba, twakali kkumi mukakokola komwe. 25Cibumbe caziba eeco cakakkazikwa abasune bali kkumi ababili, botatwe bakalangide kunyika, botatwe kumbo, botatwe kumusanza, alimwi botatwe kujwe. Zibuno zyakanjide mukati kalyo. 26Mutika wacibumbe caziba eeco wakali mbuli wajanza. Moombe waco wakali mbuli wankomeki ambuli dduba lyampana. Cibumbe eeci cakali kuzula tubiya tuli zyuulu zyobilo amyaanda yosanwe.

27Alimwi Hulamu wakapanga zikwiliba zyamukuba zili kkumi. Cimwi acimwi cakali kulampa tukokola tone, bwamba tukokola tone, bulamfu bwakuya mujulu tukokola totatwe. 28Zyakalijisi minkulu yeelene mabazu aayo oonse yakanjide mumafulemu, 29aminkulu eeyi wakacekawide zikozyanyo zyabasyuumbwa, zyabasune azyabakelibu, aamafulemu mbubonya. Atala amunsi lyabasyuumbwa abasune bakacekaula nkata amaluba. 30Cikwiliba comwe-comwe cakajisi minkulu amavwili aamukuba one. Mutuswi tone kwakali zikkazikilo zyamitiba yakusambila, mumbali aazikkazikilo zyamitiba eeyi kwakacekawidwe nkata zyamaluba. 31Zikwiliba zyakajisi moombe uuzingulukide kulampa kwawo kwakuya ansi wakali kakokola komwe. Kulampa kwakuya mujulu wakali kakokola acisela. Amoombe bakacekaula zibotezyo. Mafulemu aazikwiliba akali aatuswi tweelene taakatuntumene. 32Mavwili aacikwiliba akali mwida lyaco kuminkulu iinamatide kulincico, mavwili aaco akali kulampa kakokola acisela. 33Mavwili aacikwiliba akali mbuli aankalaki. Minkulu, mibalo, masipoko, mahabbu zyoonse zyakali zyamukuba. 34Cikwiliba comwe-comwe cakajisi maboko one, atuswi tone komwe-komwe kakajoncomene. 35Atala lyacikwiliba kwakali koombe kazingulukide kuya ansi kakali kulampa cisela cakakokola. Maboko aako aminkulu yako zyakalinamatide kucikwiliba. 36Alinzizyo kwakacekawidwe bakelibu, basyuumbwa, atukunka. Atala lyamafulemu kufumbwa aakajanika busena, akacekaulwa zibotezyo mubili woonse. 37Mbombuboobu mbwaakapanga zikwiliba zili kkumi, zyoonse zyakali kozyenye akweelana.

38Hulamu wakapanga mitiba iili kkumi, omwe-omwe wakali kuzula tubiya tuli makumi one. Bwamba bwakali tukokola tone, mutiba omwe-omwe wakabikkwa acikwiliba comwe. 39Mboobu mbwaakabikka zikwiliba eezyo, zyosanwe wakazibikka kumusanza waŋanda ya Leza, zimwi zyosanwe wakazibikka kunyika, cibumbe caziba wakacibikka kucooko lwakumusanza lwaajwe.

Kwiinduluka zintu zyamuŋanda ya Leza

(2 Makani 4.11—5.1)

40Alimwi Hulamu wakabumba zibiya akupanga mafocolo amitiba yakusansaizya. Mbombuboobu Hulamu mbwaakamanizya mulimo woonse ooyo ngwaakacitila mwami Solomoni muŋanda ya Mwami Leza. 41Wakapanga zicinda zyobilo, zipumpu zyobilo nzyaakabikka azicinda. Wakapanga mizila yatuwenge tulukidwe yobilo njaakabikka kugolela zicinda. 42Wakapanga mizila yobilo yamapomegileneti iili myaanda yone. Mapomegileneti akali mumizila yobilo-yobilo. 43Wakapanga azikwiliba zili kkumi amitiba yazyo iili kkumi. 44Wakapanga cibumbe caziba ncaakakkazika abasune bali kkumi ababili. 45Wakabumbya zibiya, akupanga mafocolo, amitiba yakusansaizya.

Zoonse Hulamu nzyaakabambila mwami Solomoni aŋanda ya Leza zyakali zyamukuba uusyobwedwe. 46Mwami Solomoni wakabumbya zibiya mucibanda ca Jolodani akati kaminzi ya Sukkoti a Zaletani. 47Zintu eezi Solomoni taakazipimya bulemu, nkaambo zyakali zinji, abulemu bwamukuba tiibwakazizilwe pe.

48Solomoni wakabambya zibelesyo zyamuŋanda ya Leza eezi, cipaililo cangolida, tebule lyangolida aakali kubikkwa cinkwa catuuzigwa ku Mwami Leza. 49Wakafuzya azikkalilo zya malambe zyangolida iini-ini, zyosanwe zyakali kululyo, zimwi zyosanwe kulumwensi kumbele lyabusena busalalisya, wakafuzya maluba, malambe amano zyangolida. 50Mitiba, tukwezuzyo, mitiba yakusansaizya, zipampuzyo, ziyokolozyo zyangolida iini-ini, zijatilizyo zyazitendele zyamuŋanda yamukati iini, zyabusena busalala kubikkilizya azyamanjililo.

51Lino Mwami Solomoni naakamanizya mulimo woonse wa ŋanda ya Leza, wakaleta zintu zyoonse Devedi wisi nzyaakapede ku Mwami Leza, nsiliva, ngolida, azimwi. Wakazibikka muciyobwedo caŋanda eeyo.

Currently Selected:

1 Bami 7: Tonga96

Highlight

Copy

Compare