1 Bami 8
8
Mbolyakaletwa muŋanda ya Leza bbokesi lyacizuminano
(2 Makani 5.2—6.2)
1Lino mwami Solomoni wakaita bamisyobo ya Isilayeli, abapati baziinga zyabo alimwi abapati bamikwasyi yabo kuti baboole ku Jelusalemu kuti bazoogwisye bbokesi lyacizuminano kuzwida ku Ziyoni, munzi wa Devedi, akulitola kuŊanda ya Leza. 2Nkabela boonse bakayoboloka ciindi capobwe lya Etanimu mwezi waciloba. 3Lino bapati ba Baisilayeli boonse nibakasika, bapaizi bakabweza bbokesi lyacizuminano ca Mwami Leza. 4Bakatola bbokesi eeli atente lyakuswaanganina azintu zyalyo zisalala zyoonse. Bapaizi a Balevi mbibakazibweza. 5Awalo mwami Solomoni antoomwe abantu boonse Baisilayeli bakabungana kumbele lyabbokesi lyacizuminano eelyo. Bakapaizya mbelele aŋombe zinji zitabaliki. 6Kumane bapaizi bakanjizya bbokesi lyacizuminano muŊanda ya Leza mubusena busalalisya, munsi aamababa azibumbwa zyabakelibu. 7Mababa aazyo akavumbilide bbokesi lyacizuminano atukulisyo twalyo. 8Tukulisyo twalyo nkotuli asunu, ntulamfu cakuti tulakonzya kubonwa amuntu wiimvwi kumbele lyabusena busalalisya, pele kutali kubusena busalala. 9Taakwe cakali mukati kabbokesi lyacizuminano pe, ccita buyo mabwe obilo aapapalete aayo Mozesi ngaakabikka kucilundu ca Holebu ooko Mwami Leza nkwaakapangana cizuminano a Baisilayeli nibakazwa Muijipiti.
10Nkabela bapaizi nibakazwa muŊanda ya Leza kwakasika kkumbi lyakazuzya Ŋanda eeyo. 11Tiibakali kukonzya kubweedela muŊanda kuti bakabeleke milimo yabo nkaambo bulemu bwa Mwami Leza bwakazuzizye ŋanda eeyo. 12Mpoonya mwami Solomoni wakakomba wati,
“O Mwami Leza, wakaamba kuti, unookkala mukkumbi lisiya.
13Lino mebo ndakuyakila Ŋanda yabulemu,
monookkala akutamani.”
Solomoni mbwaakaleleka bantu
(2 Makani 6.3-11)
14Lino bantu boonse nibakaimvwi ooko, mwami Solomoni wakacengulukila kubantu kuti abaleleke. 15Wakati, “Aalumbwe Mwami Leza wa Isilayeli! Nkaambo wacibamba cisyomezyo ncaakasyomezya Devedi taata, aawo naakamwaambila kuti, 16‘Kuzwa ciindi nindakagwisya bantu bangu Baisilayeli mu Ijipiti, taakwe munzi ngwindakasala munyika yoonse ya Isilayeli wakuti njakile Ŋanda yakukombelwa. Pele ndakasala nduwe Devedi kuti ube nduwe muleli wabantu bangu.’”
17Alimwi Solomoni wakayungizya akwaamba kuti, “Taata Devedi wakali aamuzeezo wakuyaka Ŋanda yakukombela Mwami Leza wa Isilayeli. 18Pele Mwami Leza wakati kuli nguwe, ‘Mukuti wali kuyeeya kuyaka Ŋanda yakukombela, wajisi muzeezo mubotu. 19Nikuba boobo tolinduwe ootiiyake pe, pele mwanaako nguyooiyaka mwenookombelwa.’”
20Wakati, “Lino Mwami Leza wacibamba cisyomezyo cakwe. Ndime ndatola busena bwataata Devedi kuba mwami wa Isilayeli mbubonya mbuli Mwami leza mbwaakasyomezya. Ndayaka Ŋanda yakukombela Mwami Leza wa Isilayeli. 21Alimwi ndakabamba abusena bwakubikkila bbokesi lijisi mabwe aacizuminano eeco Mwami Leza ncaakapangana abasikale besu ciindi naakabagwisya mu Ijipiti.”
Kukomba kwa Solomoni
(2 Makani 6.12-42)
22Lino Solomoni wakainka waakwiima kumbele lyacipaililo kumbele lyabantu boonse. Mpawo wakanyamuna maboko aakwe mujulu 23wakomba wati, “O Mwami wa Isilayeli, takukwe Leza uuli mbuli nduwe nimuba mujulu atala naaba ansi kunsi! Yebo wasyomeka kucizuminano cako, alimwi ulatondezya luyando lutamani kubantu batobela nzila zyako cakumaninina. 24Wacibamba cisyomezyo ncookapangana ataata Devedi mubelesi wako, nkaako sunu wakucita ncobeni ooko nkookasyomezya. 25Aboobo lino, O Mwami Leza wa Isilayeli, ndakomba kuti ucibambe acalo cisyomezyo eeci cimwi ncookapangana ataata Devedi nookati, ‘Lyoonse walunyungu lwako nguunoolela Baisilayeli, kufumbwa buyo kuti balunyungu lwako kabandiswiilila kabotu mbuli mbondiswiilila ayebo.’ 26Aboobo ndakomba, O Leza wa Isilayeli kuti ucibambe cisyomezyo eeci ncookacita kuli taata Devedi, mubelesi wako.
27“Pele O Leza mwati inga wakonzya kukkala anyika? Kayi nimuba mujulu lyamajulu tokonzyi kweela, ino mbuti muŋanda eeyi njindakuyakila? 28Nikuba boobo komvwa kupaila akukomba kwangu. Komvwa kulila, akukomba kwangu kuli nduwe sunu. 29Sikati amasiku kobamba Ŋanda yako eeyi, busena oobu mbookasala kuti kokombelwa. Koswiilila kukomba kwangu. 30Koswiilila kukomba kwangu akulilauka kwabantu bako nibakomba mubusena buno. Baswiilile kuzwida kujulu nkobede, akutulekelela.
31“Kuti naa muntu wabisizya mweenzinyina, amana wayandika kuti akonkezye kucipaililo cako, amana waboola wazookonkezya muŊanda iino, 32uswiilile kuzwida kujulu alimwi ubeteke babelesi bako. Uulaamulandu umupe cisubulo ceelede, ooyo uunyina mulandu umuleke, akwaambilizya kuti unyina mulandu.
33“Ciindi bantu bako Baisilayeli nibazundwa abasinkondonyina akaambo kakuti bakakubisizya, kwamana baamba kuti nduwe Leza wabo, bakomba muŊanda muno, 34ubaswiilile kuzwa kujulu akulekelela zinyonyoono zyabantu bako Baisilayeli. Wamana ubaboozye kunyika eeyi njookapa basikale babo.
35“Ciindi nobaima mvula akaambo kakuti bakakubisizya, kwamana baamba kuti nduwe Leza wabo, bakomba mubusena buno, akweempa akaambo kakuti wabasubula, 36ubaswiilile kuzwa kujulu akubalekelela, babelesi bako Baisilayeli. Ubaiisye nzila njobeelede kweenda, alimwi utumine mvula anyika eeyo njookakonya bantu bako.
37“Lino ciindi nokusika nzala mucisi, naa cuumo naa cibabule naa cikwaalala naa cikwikwi naa mpaso naa basinkilizigwa abasinkondonyina muminzi yabo imwi, naaba mapenzi aali buti naaba malwazi, 38uswiilile kukomba kwabo. Alimwi naa kuti bamwi bantu bako Baisilayeli bausa amoyo woonse cakulila, bamana banyamuna maboko aabo mukukomba muno muŊanda ya Leza, 39uswiilile kuzwa kujulu nkobede kukomba kwabo. Ubalekelele akucitila omwe-omwe wabo bweelede. Yebo olikke nduwe uuzi moyo wamuntu. 40Kutegwa bantu bako kabakuswiilila ciindi coonse ncobakkede munyika eeyi njookapa basikale besu.
41“Kwaamba zyamuzwamasi uutali umwi wabantu bako Baisilayeli, wazwida kulaale kuzookukomba, 42nkaambo masimpe bantu bayoomvwa zyazina lyako pati ajanza lyako lyanguzu litandabede, akuzookukomba muno muŊanda, uswiilile kuzwa kujulu, alimwi umucitile eeco ncaakukumbila, kutegwa boonse bazwamasi bakuzibe akukulemeka mbubonya mbuli bukulemeka bantu bako. 43Alimwi bayooziba kuti Ŋanda eeyi njindakuyakila iiitwa zina lyako mbusena mboelede kukombelwa.
44“Ciindi noambila bantu bako kuti baye bakalwane basinkondonyina, kuti naa bakomba kuli nduwe kabalangide kumunzi mupati ooyu ngookasala, akuŊanda eeyi njindakuyakila, 45uswiilile kuzwa kujulu akubazundya.
46“Ciindi bantu bako nobakubisizya nkaambo taakwe uutabisyi, kwamana mukunyema kwako wabaaba mubuzike kuli basinkondonyina nokulampa nokufwiimpa buti, 47kwamana beempa munyika oomo mobabede, akuti twakabisya, twakacita citaluleme, twakalubizya, uswiilile kukomba kwabantu bako. 48Lino kuti naa beempa ncobeni amyoyo alimwi amyuuya yabo munyika yabasinkondonyina eeyo, akukomba kulinduwe kabalangide kunyika eeyi njookapa basikale babo amunzi ooyu ngookasala akuŊanda yako eeyi njindakuyakila, 49uswiilile kuzwa kujulu nkobede, ubacitile ncobalomba. 50Ubalekelele zinyonyoono azibi zyoonse nzyobakakucitila, ucite kuti basinkondonyina kababeengelela. 51Aaba mbabantu bako ncobeni mbookagwisya mu Ijipiti, nyika yalunya.
52“Lino O Mwami Leza, akaka kolanga bantu bako Baisilayeli amwami wabo, umvwe kukomba kwabo lyoonse nibakukumbila kuti ubagwasye. 53Wakabanomona kuzwa mukati kabantu boonse kuti babe bako-bako, mbubonya mbuli mbookabaambila kwiindila mumubelesi wako Mozesi, ciindi nookagwisya basikale besu mu Ijipiti.”
54Lino Solomoni naakamana kukomba ku Mwami Leza, wakaima kumbele lyacipaililo ooko nkwaakavunteme kanyamwide maboko mujulu. 55Wakapozomoka waleleka bantu boonse bakabungene aawo. Wakati, 56“Aalumbwe Mwami Leza ooyo wakapa luumuno kubantu bakwe mbubonya mbuli mbwaakasyomezya kuti uyoobacitila. Walo wakabamba zyoonse zisyomezyo nzyaakapa kwiindila muli Mozesi mubelesi wakwe. 57Mwami Leza abe andiswe mbubonya mbuli mbwaakali aabasikale besu. Mwami atatusiyi nikuba kutufutatila. 58Leza acite kuti tube bantu balibombya kulinguwe, kuti lyoonse katweenda munzila zyakwe akubamba milawo, amalailile aakwe, ngaakapa basikale besu. 59Aboobo ndakumbila kuti O Mwami Leza wesu koyeeya kukomba kwangu ooku lyoonse kuti lyoonse kobapa nzobabula buzuba abuzuba, 60kutegwa misyobo yoonse yamunyika izibisye kuti Mwami Leza alikke ngo Mwami, taakwe uumbi pe. 61Ncenciceeco anywebo myoyo yanu mwiipe ku Mwami Leza wesu mukutobela malailile aakwe akuswiilila milawo yakwe mbuli mbomucita sunu.”
Kupegwa kwaŊanda ya Leza
(2 Makani 7.4-10)
62Lino mwami Solomoni abantu bakali ooko bakapa zipaizyo ku Mwami Leza. 63Wakapa cipaizyo calumvwano cabasune bali zyuulu zili makumi obilo azibili, mbelele ampongo zili zyuulu zili mwaanda amakumi obilo. Mbombuboobu Mwami Solomoni abantu boonse mbubakapa Ŋanda eeyo ku Mwami Leza. 64Mubuzuba oobo mbubonya Solomoni wakasalazya bbuwa lyakali kumbele lyaŊanda ya Leza. Aawo wakapa cipaizyo cakutenta azituuzyo zyamaila, alimwi amafuta aacipaizyo calumvwano nkaambo kakuti cipaililo ca mukuba eeco cakali cisyoonto kupaizizya zintu eezi zyoonse. 65Lino mbombuboobu Solomoni mbwaakasekelela pobwe a Baisilayeli boonse ciindi eeco. Kwakali bantu banji-banji bamwi bakazwida kumweenya wa Hamati mane kuyoosika kumulonga wa Ijipiti. Bakalya pobwe eeli kumbele lya Mwami Leza wesu kwamazuba aali ciloba. 66Nkabela mubuzuba bwalusele mwami Solomoni wakalayana abantu, abalo bakamuleleka bamane bainka kuminzi kabatangede akaambo kazintu zibotu Mwami Leza nzyaakacitila Devedi mubelesi wakwe abantu bakwe Baisilayeli.
Currently Selected:
1 Bami 8: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
