1 Bami 6

Solomoni mbwaakayaka ŋanda ya Leza

1Lino myaka iili myaanda yone amakumi aali lusele kuzwa ciindi nibakazwa mu Ijipiti Baisilayeli, mumwaka wane Solomoni kalela Baisilayeli, mumwezi wabili wa Zivu, Solomoni wakatalika kuyaka ŋanda ya Leza. 2Moili mukati yakali kulampa tukokola tuli makumi aali cisambomwe, bwaanda bwayo bwakali kulampa tukokola tuli makumi obilo, bulamfu bwakuya mujulu bwakali tukokola tuli makumi otatwe. 3Kkoce lyakumanjililo lyakali kulampa tukokola tuli kkumi, mbubonya mbuli bwamba bwaŋanda lwayo. 4Bwaanda bwakajisi mpulungwido zili mbuli moono. 5Kunze aabwaanda bwaŋada eeyi wakayakilila maanda aakajisi twaandaanda. 6Yaansi yakajisi tukokola tosanwe mubwamba, yaakati yakajisi tukokola tuli cisambomwe, yamujulu mwini yakajisi tukokola tuli ciloba. Maanda aaya akayakidwe munzila yakuti ciluli kacitagumi bwaanda bwaŋanda ya Leza.

7Lino mabwe aakayasigwa ŋanda ya Leza ngayaayo aakabezedwe kale kubusena ooko nkwaakajanwa, cakuti tiikwakali kumvwigwa kulila kwansando niciba cibulo cili buti ciindi nibakali kuyaka ŋanda ya Leza.

8Mulyango watwaanda twaansi wakali kumusanza waŋanda ya Leza, kwakali amatantilo aatola kumaanda aamujulu, kuli yabili ayatatu. 9Solomoni wakamanizya kuyaka ŋanda ya Leza. Lululi wakaluyasya masomo amapulanga aamulombe. 10Kwaamba zyamaanda aaya aakazingulukide ŋanda ya Leza, yomwe-yomwe yakali kulampa tukokola tosanwe, yakalikumanyizidwe kubwaanda bwaŋanda ya Leza amapulanga aamulombe.

11Lino Mwami Leza wakaambila Solomoni kuti, 12“Kuti naa koswiilila milawo amalailile aangu oonse, ndilakucitila zintu eezyo nzindakasyomezya uso Devedi. 13Ndiyookkala akati kabantu bangu Baisilayeli muŋanda eeyi njiyonya, nkabela nsikooyoobasiya pe.”

14Mbombuboobu Solomoni mbwaakayaka ŋanda ya Leza.

Zyamunanda ya Leza

(2 Makani 3.8-14)

15Lino bwaanda bwaŋanda ya Leza mobuli mukati bwakamatikidwe tupulanga twamukamba tufwalidwe cabuuya, twakali kutalikila kuciluli kuleta ansi. Lino acibuye kwakamatikidwe tupulanga twamulombe. 16Kaanda kabusena busalalisya, kakayakidwe nkoili kuntumba. Bwaanda bwako bwakali kulampa tukokola tuli makumi obilo, alimwi kakali koswedwe abwaanda bwamapulanga aamukamba. 17Busena bumwi kumbele lyakaanda aaka bwakali kulampa tukokola tuli makumi one. 18Aaya mapulanga aamukamba aakamatikidwe bwaanda mobuli mukati akacekawidwe tunkuli alimwi amaluba-luba. Mukati moonse mwakanamatikidwe tupulanga twamukamba cakuti mabwe aakayasigwa taakali kulibonya pe.

19Lino mukati kakaanda kabusena busalalisya mumwakabikkwa bbokesi lyacizuminano ca Mwami Leza. 20Kaanda aaka kakali kulampa tukokola tuli makumi obilo, abwamba bwakali tukokola tuli makumi obilo, alimwi bulamfu bwakuya mujulu bwakali kulampa tukokola tuli makumi obilo. Bwaanda oobu bwakazilulwidwe ngolida iini-ini. Cipaililo cakamatikidwe tupulanga twamukamba. 21Mbombuboobo Solomoni mbwaakasyingulula mukati angolida, eelyo wakalandabika tuwenge twa ngolida. Nkabela acalo cipaililo camukaanda kabusena busalalisya wakacisyingulula angolida. 22Ŋanda yoonse yakasyingulwidwe angolida, kubikkilizya acipaililo camubusena busalalisya.

23Bakelibu bobilo bakabezedwe amapulanga aaoliva bakaimikwa mubusena busalalisya, bwakali kulampa tukokola tuli kkumi. 24Bbaba lyakelibu wakusaanguna lyakali kulampa tukokola tosanwe, alyabili mbubonya. Kuzwa kumpela lyabbaba limwi kuyoosika kuli limwi kwakali tukokola tuli kkumi. 25Kelibu wabili wakaleelene awakusaanguna. 26Omwe-omwe wakali kulampa tukokola tuli kkumi. 27Solomoni wakabambanya bakelibu bobilo aaba cakuti bbaba lyaumwi aumwi lyakali kuguma kubwaanda, amwi obilo aaya akaligumene akati. 28Bakelibu bakalizilulwidwe angolida.

29Wakacekaula zikozyanyo zyabakelibu, zyatukunka azyamaluba-luba aalangezye. 30Acibuye wakasyungulula angolida.

31Mulyango wabusena busalalisya wakajisi zitendele zyobilo, nkabela cikunguzyo cakali suumene. 32Zitendele zyakacekawidwe zikozyanyo zyabakelibu, zyatukunka, azyamaluba-luba, aalangezye cakuti zyakali zibotu zyeebeka. Zitendele, bakelibu, atukunka, zyakalizilulwidwe angolida. 33Mulyango waŋanda imwi wakapangwa aamapulanga aaoliva acikunguzyo kubikkilizya acakukwida. 34Kwakali zitendele zyobilo zikonzya kuvungwa zyamapulanga, 35zyakalijisi zikozyanyo zyabakelibu, zyatukunka, azyamaluba-luba aalangezye zyakacekawidwe angolida.

36Bbuwa lyamukati lyakayakililwa amilongo yotatwe iiilikene yamabwe aabezedwe, atala kwakali mulongo wamapulanga aamulombe.

37Nkabela lwiimbi lwaŋanda ya Leza lwakatalika kusigwa mumwezi wabili wa Zivu, mumwaka wane wakulela kwa Solomoni. 38Mumwezi walusele wa Bulu, mumwaka wakkumi aumwi wakulela kwa Solomoni ŋanda ya Leza yakamana kuyakwa, mbubonya mbuli mbuyakali kuyandika. Ŋanda eeyo yakatola myaka iili ciloba kuyaka.

Currently Selected:

1 Bami 6: Tonga96

Highlight

Copy

Compare