1 Bami 18
18
Elija abasinsimi ba Baali
1Nikwakainda ciindi cili mbocibede mumwaka watatu wacilanga, Mwami Leza wakaambila Elija kuti, “Koya kumwami Ahabu, nkaambo ndiyootumina mvula.” 2Aboobo Elija wakainka.
Lino nzala ciindi eeci yakali kulunzya kasuko mucisi ca Samaliya. 3Aboobo Ahabu wakaita Obadiya ooyo wakali kweendelezya zyaŋanda yabwami. Obadiya wakali muntu wakalipede kuli Leza. 4Ciindi Jezibeli naakali kujaya basinsimi ba Mwami Leza, Obadiya wakasisa basinsimi bali mwaanda mumpangala kabali makumi osanwe mumpangala yomwe-yomwe. Wakali kubatolela zilyo amaanzi. 5Mwami Ahabu wakati kuli Obadiya, “Atweende katuya bulanga-langa tusensa twamaanzi mutulonga tubone naa inga twajana kuli bwizu bunji bwakusanina mabbiza amamyuulu eesu kuti zitamani kufwa. 6Bakaandaana umwi lubazu lumwi aumwi lubazu lumwi. 7Nkabela Obadiya naakali kuya bweenda wakaswaangana a Elija. Wakamuziba, eelyo wakamuvuntamina akumubuzya kuti, ‘Mwati ncobeni nduwe buya simalelaangu?’” 8Elija wakaingula kuti, “Iiyi, ndime Elija. Lino koya ukamwaambile mwami wako, kuti mebo nkwendi kuno.”
9Pele Obadiya wakaingula kuti, “Ino ndabisya nzi mebo ndemubelesi wako kuti undaabe kuli Ahabu kuti andijaye? 10Mbubonya mbuli Mwami Leza wako mbwali muumi mwami Ahabu wakakulangaula mumasi oonse aamunyika. Kuti naa waambilwa kuti yebo tomo mucisi eeco, inga wayanda kuti ooyo muleli wacisi eeco alumbile kuti yebo tomo ncobeni oomo mucisi. 11Lino uyanda kuti mebo ngunke kuli nguwe akuyoomwaambila kuti yebo nkoli kuno. 12Ambweni Muuya wa Mwami Leza ukutole kumwi kubusena butazizilwe. Ahabu atozookujani, caamba kuti ulandijaya. Kayi mebo ndemubelesi wako ndamukomba Mwami Leza kuzwa kubukubusi bwangu. 13Sena simalelaangu taakwe nookamvwa makani aakuti ciindi Jezibeli naakali kujaya basinsimi ba Mwami Leza mebo ndakali kubasisa mumpangala kabali makumi osanwe mumpangala yomwe-yomwe, alimwi ndakali kubapa zilyo amaanzi? 14Ino ono inga yebo wandaambila buti kuti nkaambile mwami kuti Elija ulookuno.”
15Lino Elija wakati, “Mbubuli Mwami Leza Singuzuzyoonse mbwali muumi ooyo ngwendibelekela, mebo lwangu ndalitondezya kuli Ahabu sunu.”
16Aboobo Obadiya wakainka kuli Ahabu akuyoomwaambila makani aaya, mpawo Ahabu wakainka kuyooswaangana a Elija. 17Ahabu naakabona Elija wakaamba kuti, “Mwati nduwe buya yebo oopenzya Isilayeli!”
18Elija wakaingula kuti, “Tandili ndime eepenzya Isilayeli, nduwe amukwasyi wauso. Wasiya malailile aa Mwami Leza wakomba ba Baali. 19Lino bunganya Baisilayeli boonse kuti tukaswaangane kucilundu ca Kaameli. Alimwi ukaletelele abasinsimi ba Baali aabo bali myaanda yone amakumi osanwe, abasinsimi baleza mukaintu Asyela aabo Jezibeli mbasanina.”
20Mpoonya Ahabu wakabunganya Baisilayeli boonse antoomwe abasinsimi aabo kucilundu ca Kaameli. 21Elija wakainkila bantu akuyoobaambila kuti, “Ino munoodonaika kusikila lili? Naa kuti Mwami Leza ngo Leza ncobeni, amumutobele, pele naa Baali ngo leza amutobele nguwe!” Pele bantu taakwe ncobakaingula nociba comwe pe. 22Mpoonya Elija wakati, “Mebo ndime buyo wabasinsimi ba Mwami Leza uusyeede, Baali ulijisi basinsimi bali myaanda yone amakumi osanwe. 23Amulete basune bobilo, basinsimi ba Baali basale omwe bamujaye akumukosoola muzituli-tuli bamubikke ankuni, kwamana batakutuli mulilo pe. Ambebo ndilacita mbubonya oobo kumusune ooyo umwi. 24Nkabela basinsimi ba Baali bakombe kuli leza wabo, ambebo ndilakomba ku Mwami Leza, ono Leza uutivuwe kwiindila mukutuma mulilo, ngo Leza wakasimpe.” Bantu bakaingula kuti waamba kabotu.
25Eelyo Elija wakaambila basinsimi ba Baali kuti, “Mbokuli kuti nywebo muli banji, amusale musune mumubambe, mwamana mukombe kuli leza wanu, pele mutakutuli mulilo acipaililo pe.”
26Mpoonya bakasala musune bamubamba, batalika kukomba kuli Baali kuzwa cifumo-fumo mane kusikila acilungu-lungu. Bakali kupozomoka kabati, “Baali tuvuwe!” Bakali kuzyana kuzinguluka cipaililo cabo ncobakayakide. Pele taakwe naakaingula pe.
27Lino acilungu-lungu, Elija wakatalika kubasabwida wati, “Kamupozomokesya ambweni kuli ncaciyeeya! Ambweni uli kusokwe, ambweni uli mulweendo! Ambweni uloona, aboobo mweelede kuti mumusinsimune.”
28Eelyo basinsimi aabo bakapozomoka akulinengaula amapanga alimwi amasumo mbubuli ciyanza cabo, bulowa bwakali kungwenga. 29Bakali kuvwanyauka akupozomoka mane zuba lyakasika acilangankumo. Pele taakwe naakabaingula pe, taakwe nikwakamvwigwa niliba jwi.
30Lino aawo Elija wakaambila bantu boonse kuti, “Amuswene aafwiifwi.” Lino bakaswena bamuzinguluka. Wakatalika kubambulula cipaililo ca Mwami Leza cakamwaikide. 31Amane wakabweza mabwe aali kkumi aabili, bbwe lyomwe-lyomwe lyakali kwiiminina mwana omwe-omwe wa Jakobo, ooyo Leza ngwaakaulika zina lya Isilayeli. 32Nkabela amabwe aayo wakayaka cipaililo ca Mwami Leza. Wakasya lwiimbi kuzinguluka cipaililo eeco, lwakali kukonzya kutilwa nongo zyone zyamaanzi. 33Mpawo wakabikka nkuni acipaililo, akukosoola musune muzituli-tuli wazibikka ankuni. 34Elija wakaamba kuti, “Amuzuzye nongo zyone amaanzi mwaatile aacipaililo aankuni.” Nibakamana kucita oobo wakati, “Amwiinduluke alimwi. Mpawo bakainduluka. Bamane wakati, ‘Kamutila alwatatu.’” Bakacita. 35Maanzi akali kukunka kuzwa acipaililo, mane azuzya lwiimbi.
36Lino aciindi litentwa cipaizyo cakumazuba, musinsimi Elija wakaswena kucipaililo akukomba wati, “O Mwami Leza, Leza wa Abulahamu, Izaka, a Isilayeli, tondezya kuti yebo nduwe Leza mu Isilayeli, alimwi akuti mebo ndime mubelesi wako, akuti eeci ndacicita kwiindila mukulaililwa anduwe. 37Ndivuna O Mwami Leza, ndivuna, kuti bantu aaba bazibe kuti yebo nduwe Leza, akuti uyanda kubaboozya kuli nduwe.”
38Mpoonya Mwami Leza wakatumya mulilo ansi, wakatenta cipaizyo, nkuni, mabwe, bulongo akuyuminizya maanzi aakali mulwiimbi. 39Bantu nibakabona eeci bakaliwaala ansi akwaamba kuti, “Mwami Leza, ngo Leza, iiyi, Mwami Leza ngo Leza!”
40Lino Elija wakalailila kuti, “Mubajate basinsimi ba Baali, mutaleki naba omwe wabo kuti atije.” Eelyo bakabajata boonse, mpawo Elija wakabatola kukalonga ka Kisyoni akuyoobajaya ooko.
Mbucakamana cilanga
41Mpoonya Elija wakaambila mwami Ahabu kuti, “Koya ukalye, ndamvwa kuzuma kwamvula.” 42Ahabu naakacili kulya, Elija wakatanta ansonje yacilundu ca Kaameli, wasunsumana wabikka mutwe akati kamazwi aakwe. 43Waambila mubelesi wakwe kuti, “Koya ukalange kulwizi.” Mubelesi naakainka, waakuboola akuzoomwaambila kuti, “Taakwe aciliko pe.” 44Elija wakamutuma ziindi zili ciloba, naakainka wakaakuboola akuzooti, “Ndabona kakumbi kasyoonto mbuli janza kakailamuka kuzwa mumaanzi.”
Eelyo Elija wakalailila mubelesi wakwe kuti, “Koya kumwami Ahabu ukamwaambile kuti atante nkalaki yakwe abweede kumunzi niitana mujana mvula.” 45Mukaindi kasyoonto buyo julu lyoonse lyakasizyanya, muuwo wakatalika kuunga, mvula mpati yakawa. Ahabu wakatanta nkalaki yakwe akubweeda ku Jezuliili. 46Nguzu zya Mwami Leza zyakasikila Elija. Eelyo wakafunka jansi lyakwe walyaanga mucibuno, amane wakazuzaana kumbele lya Ahabu wamwiindila kuyoosika ku Jezuliili.
Currently Selected:
1 Bami 18: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
