1 Bami 19

Elija mbwaakatijila kucilundu ca Sinai

1Lino mwami Ahabu wakaambila mukaintu wakwe Jezibeli zintu zyoonse nzyakacita Elija, ambwaakabajaya basinsimi ba Baali boonse. 2Aawo mukaintu ooyo wakatumina Elija majwi aakuti, “Baleza bandisubule akwiindilila kuti naa juunza ciindi cino utakabi mbuli mbabo mboojaya aabo.” 3Naakamvwa boobo Elija wakayoowa wakatija. Wakatolelela amubelesi wakwe bainka ku Biiyasyeba mucisi ca Juda, ooko nkwaakaakumusiya. 4Walo wakaakweenda buzuba boonse munkanda. Wakaakulyookezya mucimvule camusamu, eelyo wakakomba kuti afwe buyo wakati, “O Mwami Leza mbubo ono cabonwa, ndijaya buyo. Ino ndime ni?” 5Wakalala mucisiko camusamu woona. Mpoonya mungelo wakazoomutikaanya wati, “Buka ulye.” 6Naakasinsimuka wakabona cinkwa cakakangilwa amabwe aapya anongo yamaanzi kumitwe. Wakalya wanywa, wabweedela alimwi walala. 7Mungelo wa Mwami Leza ooyo wakamutikaanya lwabili wati, “Buka ulye, nkaambo musinzo ucili mulamfu.” 8Elija wakabuka, wakalya akunywa, amane kulya wakaba aanguzu zyakukonzya kweenda lweendo lwakamutolela mazuba aali makumi one amasiku aawo mane waakusika ku Sinai, cilundu ca Leza. 9Ooko wakaakunjila mumpangala woona. Mpoonya Mwami Leza wakamubuzya kuti, “Elija, ucita nzi okuno?” 10Walo wakaingula kuti, “O Mwami Leza Singuzuzyoonse, mebo lyoonse ndali munkutwe, pele bantu ba Isilayeli bakaka cizuminano cako ambabo, bakamwaya zipaililo zyako, akujaya basinsimi bako apanga. Ndime buyo eecisyeede endikke, kwamana bayanda kundijaya ambebo.” 11Mwami Leza wakati kulinguwe, “Koya atala aacilundu ukaime kumbele lyangu, nkaambo ndiyanda kwiinda.” Mpawo guwo lyakaandaula zilundu akupwaya mabwe kumbele lya Mwami Leza, pele Mwami Leza taakali muguwo eelyo pe. Kumane guwo nyika yakazungaana, pele Mwami Leza taakali mukuzungaana ooko pe. 12Kumane kuzungaana kwakaza mulilo, pele Mwami Leza taakali mumulilo ooyo pe. Kumane mulilo kwakaza kauwo kaunga. 13Elija naakakamvwa wakalivumba jansi kubusyu, wainka waakwiimina amulyango wampangala. Eelyo wakamvwa jwi liti, “Elija, ino ucita nzi kuno?” 14Walo wakaingula kuti, “O Mwami Leza Singuzuzyoonse, mebo lyoonse ndali munkutwe, pele bantu ba Isilayeli bakaka cizuminano cako ambabo bakamwaya zipaililo zyako, akujaya basinsimi bako apanga. Ndime eecisyeede endikke, kwamana bayanda kundijaya ambebo.” 15Mwami Leza wakaamba kuti, “Pilukila uunke kunkanda ya Damasikasi. Waakusika ooko ukananike Hazayeli kuti akabe mwami wacisi ca Siliya. 16Alimwi ukananike Jehu, mwanaa Nimusyi, akabe mwami wacisi ca Isilayeli. Waakumana ukananike Elisya mwanaa Syafati uuzwa ku Ebelamehola, kuti akabe musinsimi mubusena bwako. 17Lino kufumbwa uutikatije kujaigwa a Hazayeli, uyoojaigwa a Jehu, nkabela ooyo uutikatije kujaigwa a Jehu uyoojaigwa a Elisya. 18Nikuba boobo njanda kukwaambila kuti ndilijisi bantu bali zyuulu zili ciloba mu Isilayeli, banditobela, batanakomba Baali nikuba kumyonta zikozyanyo zyakwe.”

Kwiitwa kwa Elisya

19Lino Elija wakainka kuzwa kooko waakujana Elisya mwanaa Syafati. Wakajana ulalima azipani zili kkumi azibili. Walo wakali kulimya cipani camamanino.

Elija naakasika wakasamununa jansi lyakwe wayabika Elisya. 20Mpoonya Elisya wakasiya cipani cakwe, wakazuzaanina Elija akuyooti kulinguwe, “Nkooko nduunke ndikalaye taata abaama kwamana ndizooinka ayebo.” Mpoonya Elija wakati, “Taakwe bubi wamana inga waboola.”

21Mpoonya Elisya wakaya kucipani cakwe wabajaya basune akubajisya joko ajamba ndibakali kukwela. Nyama wakiiaba kubantu balya. Mpoonya wakainka waakutobela Elija akuba mugwasyi wakwe.

Currently Selected:

1 Bami 19: Tonga96

Highlight

Copy

Compare