Loma 8
8
Bwikalo bwa mwayila Mupashi
1Onkao mambo pano kechi kuji luzhachisho nangwa pacheche kwi boba baji mwi Kilishitu Yesu ne. 2Mambo muzhilo wa aye Mupashi wa bumi wankasulula#8:2 Wankasulula amo mabuku amu kigiliki muji obewa, akwabo muji, atweba. mwi Kilishitu Yesu kuyewa muzhilo wa bundengamambo ne wa lufu. 3Mambo Lesa wikyubile akya kyakankelwe kuuba Mizhilo na mambo a kunekena kwa mubiji wa buntunshi, byo atumine Mwananji mwine mu kipasha kya mubiji wa bundengamambo amba ekale ke kitapisho kya mambo, aye wibuzhachisha bundengamambo mu buntunshi. 4Amba byaoloka byatongola Mizhilo bifikizhiwe mwi atweba, tubula kwenda mwayila buntunshi, twenda mwayila Mupashi. 5Mambo aba baji mu buntunshi bo bata michima yabo ku bya buntunshi. Pakuba aba baji mu Mupashi bo bata michima yabo ku bya Mupashi. 6Mambo kuta muchima ku buntunshi lo lufu; pakuba kuta muchima ku Mupashi bo bumi ne mutende. 7Mambo muchima wata ku buntunshi washikwa Lesa mambo kechi unekenena Mizhilo ya Lesa ne, kine kechi wakonsha kwiinekenena ne. 8Kabiji aba baji mu buntunshi kechi bakonsha kutokesha Lesa pa muchima ne.
9Pakuba anweba kechi muji mu buntunshi ne poso mu Mupashi, umvwe Mupashi wa Lesa waikala kine mwi anweba. Kabiji umvwe muntu wabula Mupashi wa Kilishitu, kechi ye wa kwanji ne. 10Bino inge Kilishitu uji mwi anweba, nangwa mubiji wafwa na mambo a bundengamambo, aye Mupashi bo bumi bwenu na mambo a bololoke. 11#1 Ko 3:16Mambo umvwe Mupashi wa yewa wasangwile Yesu mu bafu waikala mwi anweba, yenkawa wasangwile Kilishitu Yesu mu bafu ye ukapana bumi ku mibiji yenu ya lufu kupichila mu Mupashi wanji waikala mwi anweba.
12Byonkabyo anweba bakwetu, nangwa twi bazha, kechi twi bazha ba buntunshi amba tulonde bya buntunshi ne. 13Mambo umvwe mwalonda bya buntunshi mukafwa. Pakuba umvwe mwaipaya na Mupashi byubilo bya mubiji, mukekala na bumi. 14Mambo bonse mobavujila bo batangijila ku Mupashi wa Lesa bo baana ba Lesa. 15#Mako 14:36; Nga 4:5-7 Mambo kechi mwatambwile Mupashi wa buzha amba mube moyo ne; bino mwatambwile Mupashi wa bwana bwa bene, motutaachila amba, “Abba, Taata!” 16Aye Mupashi mwine ushimuna pamo na mipashi yetu amba twi baana ba Lesa. 17Kabiji umvwe twi baana, byonkabyo kabiji twi banswanyi ba Lesa, ba kuswana pamo ne Kilishitu, umvwe twamanama nanji pamo, amba tukatumbijikwe nanji pamo.
Lukumo lwa kulutwe
18Mambo nalanguluka namba bya kumanama bya pa kino kimye kechi byafwainwa kwibyesakanya na lukumo loakamwesha kwi atweba ne. 19Mambo bilengwa byonse bibena kutengela kasa byazanza meso na kupembelela kusoloka kwa baana ba Lesa. 20#Nte 3:17-19Mambo bilengwa byonse byaalwilwe ke byatu, kechi ku kyaswa muchima wabyo bine ne, poso ku kyaswa muchima wa mwine Lesa wikyubile, mu luketekelo. 21Amba byalengelwe bine bipokololwe ku buzha bwa bubole, ne kutambula bwana bwa bene bwa lukumo lwa baana ba Lesa. 22Mambo twayuka namba bilengwa byonsetu bibenakubinza ne kumvwa misongo kufika ne buji leelo. 23#2 Ko 5:2-4Kabiji kechi abyo byonka ne, nanchi ne atwebatu pamo, nangwa twatambula Mupashi nobe nsomo, ne atweba tubena kubinza mukachi, kasa tupembelela kumweka kwa bu bwana bwetu, kokuuba amba, bukuuzhi bwa mibiji yetu. 24Mambo mo mulonka luno luketekelo mo twapulukijile. Pano luketekelo lwamweka kala kechi lolwa kuketekela ne. Mambo ng'anyi uketekela byo abena kumona? 25Bino umvwe twibiketekela byo twabula kumona, twibipembelela na muchima watekanya.
26Byonkabyo ne Mupashi naye witukwasha mu kunekena kwetu. Mambo kechi twayuka byo twafwainwa kulombela ne; bino aye mwine Mupashi witulombelela na mibinzo ya kubula kukonsha kwamba. 27Kabiji aye mwine ukebakeba mu michima yetu, yewayuka ne moayila muchima wa Mupashi, mambo aye wibalombelela bazhijikwa monka mwayila kyaswa muchima wa Lesa.
28Kabiji twayuka namba bintu byonse bingijila pamo mu kwibaletela byawama bamutemwa Lesa, bo boba baitwa monka mwayila kufuukula kwanji. 29Mambo abo boayukijile jimo, ibo bo atongwejile jimo amba bakapashang'ane pamo na Mwananji, aye aluuke ke mubeji mu balongo banji bavula. 30Kabiji aba bo atongwejile jimo, ibo boaita, ne abo boaita, ibo bo a bingisha, ne abo bo a bingisha, ibo bo atumbijika.
Butemwe bwa Lesa mwi Kilishitu Yesu
31Pano tusa kwamba amba ka, na mambo a bino bintu? Umvwe Lesa uji ne atweba, ng'anyi uketwimena? 32Aye wabujile kukana kupana Mwananji mwine, kabiji wamupaine na mambo a atweba bonse, akabule byepi kwitupatu bintu byonse pamo byonka byo etupeleye? 33Ng'anyi ukaleeta bya kwibashiina basalululwa ba Lesa? Ye Lesa ubingisha! 34Ing'anyi uzhachisha? Ye Kilishitu Yesu wafwile, kabiji ye wasangwilwe mu bafu, ye waikala ku kilujo kya Lesa, na kwitulombelela. 35Ng'anyi uketwabanya na butemwe bwa Kilishitu? Bya malwa nyi? Nangwa buyanji nyi? Nangwa lupato nyi? Nangwa nzala nyi? Nangwa bwamba nyi? Nangwa bya bulwanyi nyi? Nangwa mpoko nyi? 36#Sala 44:22Monka mo kyanembelwa amba,
“Na mambo a anweba tubena kwipayiwa juba jonse;
Twalamwa nobe mikooko yo basaka kwipaya.”
37Ine, mu bino bintu byonse twakila mu kushinda monka mwi aye witutemenwe! 38Mambo amiwa nayukishatu namba, nangwa lufu, nangwa bumi, nangwa bamalaika, nangwa bene bakatampe, nangwa bintu byakatataka, nangwa bintu bikeyako, nangwa bya bulume, 39nangwa bula bwa mwiulu, nangwa kuzhika kwa panshi, nangwa kilengwa kingi, nangwa kya byepi, nangwa kya byepi, kechi bikakonsha kwitwabanya na butemwe bwa Lesa mwi Kilishitu Yesu Nkambo yetu ne.
Currently Selected:
Loma 8: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
